15
Nqmq Ngr Gct Myaszpxle Nqmq Kr Melrmqgung
Mak 7:1-13
1 Kzdq zbq kzdung Farzsi x kxnzalvztrng mz Lou sc Mosis nzvzkimlr Jerusalem. X nzveatibzlr mz Jiszs kx, 2 “?Memule ncblo nemqng tzrnzlvzo-ngrdr nqmq kr melrmqgung? Trnzvz-nqblqlru nqmq krgu mz nzrycpq-kaingr mq x ncblo kc tqmu ate.”
3 Jiszs ayzlu-ngrbzle natqdr kx, “?A' memule tqrnzlvzo-ngrnamu Lou sc Gct mz nztekqtr-krmule mz nzalvztr-krmu nqmq krmung? 4 Murde mz Nzryrngrkxtr Gct rpibzle kx, ‘Amrlue zvz trtem x lxem. Murde doa kx tramrlueleu trtede x lxede, a' pibqtile nidr, takitxtrpwzle nzrnibqngr.’ ✡ Nzrlaszngr 20:12; 21:17; Livae 20:9; Lou Kcpwz 5:16 5-6 A' rpi-alzu-ngrnamu kx takitrde doa trokatr-ngrdeu trtede x lxede mz trau scde, nzmu dzu r da kx naokatrle nidr yrlqpx-bekapele nangi blz kxtr sc Gct. A' mz nzale-krmu da lc yrlqtxpxamu Lou sc Gct, murde navz-nqblqamu nzalvztr-krmu nqmq krmung. * 15:2 Mc Matiu 15:12 x natq kxtopwz elr. 15:5-6 Blz kx myapxbz mz nzobqkr Gct ngi nzvz-nqblq-kaingr natqde, x nzrka-ngrbz blz bade kc ate. [Sam 4:5; 34:10-14; 50:15; 51:16-17; 73:24; 81:83; Hosia 6:6; Mak 12:33]
7 Nimu leplz kx narpi-ngrbz kx rlxngitiamu, murde narpi-ngrbz kx vz-nqblqamu Lou sc Gct, a' mrlz txpwz bamu nzalvztr-krmu nqmq krmu! Gct ycmnetr-ngrde leplz kxnzapulr nimu mz nzngi-batr-krbzle mz profet Asaea nzryr-krde kx, 8 ‘Leplz lcng nzamrlue-txpwzlr ninge mz naodr. A' trnzvz-nqblqlru natqnge murde nqmq nr nabzdr yc-rlrup bange. 9 Nzangio-krdr ninge mane mz drtwrnge murde nzrpilr da kcng tzalvztr-ngrdr leplz nzvzpxmqng bange. A' trtingr.’ ” ✡ Asaea 29:13
Leplz Kcng Trnztakitrdru Nzprtrngr Mz Nzangiongr
Mak 7:14-23
10 Zbz Jiszs kqle-moule zbo ngr leplz kcng, sc tqrpipebzle kx, “Lalztq-angidrmamu bange x abzamu nzyrlq-krmu da kc napibo bamu. 11 Da kcng tzmale leplz mz mqdr x tzyrlqtrlr mz naodr trnzbatrpwzlru trnztakitr-krdru nidr nzprtrngr mz nzangiongr. Trtingr. A' ngi da kcng tzvzpxmqng mz nao leplz kx nzbatrpzlr trnztakitr-krdru nidr.”
12 Zbz vzkr x rpibzkr bade kx, “?Krlz-kzq kx nzycmne-krm nzxngitrlr Farzsi?” † Farzsi kcng nzvz-nqblqlr kzdung nqmq kxnzyrlq-pnzng mz nzbatr-krbzle mz leplz nzvz-nqblq-krdr Lou sc Mosis mz nzvz-nqblq-krdr nqmq lcng. Nzalvztr-ngrdr kx ncblo kx trvz-nqblqleu nqmq kr melrmqdr lcng, trtubq-kzu mz nzobqkr Gct. Mz kzdq nqmq kr melrmqdr lcng, leplz naycpq-kailr mqdr x dakxnzng mz lue, x sc tzmu-ateng. X ncblo neng Jiszs nzvz-nqblq-kzlr nqmq lcng mz zbq kang kqlu. A' Jiszs alvztr-ngrde kx nqmq lcng trtubqu, murde nzvzpxmqng mz ncblo, a' trnzvzpxpqngqu mz Gct. Nzalvztrkr Jiszs lc, atrkati-kzle nzalvztrkr Farzsi. X batr-kzpzle trnzmnc-zpwx-krdru badr.
13 Jiszs ayzlu-ngrmle natqgr kx, “Trtenge kc Heven sa natabotilzmle nzalvztrngr amrlx kcng trnzvz-nqblqlru me pnz drtwrde. 14 Mz nzmu-krde lcde, bzkq lalztqbzmu mz Farzsi lcng. Murde kxnzetu lcng nzapulr ncblo kx mztr mwi kcng tzmailzbzlr leplz kcng mztr tzmwing mz Gct. A' mz nzale-krdr da lc, dzbede lcng li nztaong rlilrdr mz gq mz nzvz-rbr-krdr.”
15 Zbz Pita rpibzle bade kx, “Yokaetipxm bagr nzycmne-ebzpx-krm mz da kcng tzvzpxmqng mz nao leplz.” 16 Jiszs rpimle bagr kx, “Rlr! ?Narmu tryrplatrkapz mz natq lc? 17 ?Trkrlz-zpwxkalamu kx da kcng tzyrlqtr leplz mz naodr vztr mz lzng krdr, x mz nibrde sc tqvzpxpe-mop mz nrkrdrtq? Da kxnzmulr lcng trnzbatrpwzlru trnztakitr-krdru nidr. 18 Natq kxtrka amrlx kcng tzvzpxmqng mz nao leplz, nzvzdz-kaipqng mz nabzdr. X nzbatrpzlr trnztakitr-krdru nidr. 19 Murde drtwr kxtrka lcng nzvzdzmqng mz nabz leplz. X nzmailzlr nidr mz nzale-krdr alwx lcde seleng: nzrpibqtingr leplz, nzrpokiatitrngr leplz, nzpnangr da, nzrnibqngr, nzrmwimingr leplz kx trngiu krnalzdr, x kzdung kz da kxtrka. 20 Da kxnzmulr lcng nzbatrpzlr trnztakitr-krdru leplz x trnztubq-krdru mz nzobqkr Gct. A' mz trnzycpq-ngru mq x leplz kc tqmupe, trbatrpwzleu trnztakitr-krdru leplz.”
Olvz KxtrngiulrJiu A' Nzrlxngiti-krde Etu
Mak 7:24-30
21 Zbz rlaszkr badr Gzlili Provins, x sc tqvzkipekr mz nrlarnrlc kc Fonisiz mrkc Siriz Provins, mz taon kcng etu Taea x Saedon. Provins lc nyz leplz kxtrngiulrJiu. 22 Zbz kzdq olvz kxtrngiulrJiu kx mnc mrlcde, vzm mz Jiszs x sc tqycmne-katopebz bade, mz nzrpi-krbzle kx, “Kxetu, Mrlx Devet, nayc mz drtwrm ninge! Inyxnge drtqde etqtx zlwz mz drka' kc tqmncpxm bade.” 23 Kxmule-esz', a' Jiszs traotrpwzleu nrlarde bade x trayzlupwzleu natqde. Zbz sc tqrpipebzkr bade kx, “Ayzlutxpe olvz lc, murde sc tqkq-nqblq-zvzmle nigu.” 24 Zbz sc tqrpipebz Jiszs bade kx, “Gct atwzlr-ngrmle ninge mz nzokatr-krnge txpwz lr Israel kcng tzmnc-mrbrng.” 25 Kx xlrbzle natqde lcng, vzm x sc tqrweopebz zpr bade, mz nzrpi-krbzle kx, “Kxetu, okatrp ninge!” 26 Jiszs ycmnebz bade mz kzdq nzycmne-ebzpxngr kx, “Trmrlzu nzoti-krbzme dakxnzng nan doa kxnztopwzng x kabzme mz kuli.” 27 Rpibz olvz kc kx, “Kxetu, da zpwxtx la tqpiq, a' nzrlr-kz-ngrbz mz kuli nzngq-krdr dakxnzng kc tqtao mz nabz tebol.” 28 Zbz Jiszs rpibzle bade kx, “Olvz lc, nzbrtikr drtwrm ninge etu-esz'ngr! Sa na-alebo da kc tqsuti drtwrm.” X mzli kcpwz drka' kc sc tqprszpxpele inyxde x sc tqmnc-zpwxpe mou. ‡ Mz nzycmne-ebzpxngr lc, doa kxnztopwzng drtwr ngrde lr Jiu, x kuli drtwr ngrde kxtrngiulrJiu. Dakxnzng drtwr ngrde da kxnzmrlzti kcng tzvzpxmqng mz Gct. Suti drtwr Gct nzamrlz-krde leplz amrlx mz nzwzkr lr Jiu, leplz nedeng angidr kcng tqmcpxleng. Delc Jiszs tqvz-kai-ngrbzle mz lr Jiu. Be lc drtwr ngrde kx trmrlzu nzamrlz-krde kxtrngiulrJiu x lr Jiu kc ate. A' natq olvz kc aelwapx-ngrde kx lxngiti-angidrle Jiszs, x takitrde nzokatr-krde nide.
Jiszs Apuleng Ncblo Siu-pwx (4,000)
Mak 8:1-10
29 Rlaszkr badr nrlarnrlc kc, x sc tqyzlupe-moukr Dxbu Gzlili. Vzdzkr mz nrlar kzdq nra x Jiszs sc tqwxbuope. 30 Zbo ngr leplz nzvzmqng bade. Nzrvzmimqng kxnzvz-tengineng, kxnzbxplong, kx mztr mwi, kxnznabung, x kzdung kz kxnzdwatibzng zyagox kx bletipx-lxblrng. X amrlzle nidr. 31 X leplz kxkqlu nzkctipx-zlwzlr nzrmc-krdr nzvznekr kxnzvz-tengineng, nzmrlz-moukr kxnzbxplong, nzobqkr kx mztr mwi, x nzycmnekr kxnznabung. X nzglqlzlr x nzawibzng mz Gct rdr, nidr lr Israel.
32 Jiszs kc tqkqlepemle nigr x tqrpipemle bagr kx, “Ycpengr drtwrnge leplz lcng. Murde nzmnctipemlr bagu mrka zbq tqpe x dakxnzng nadr yrkrtxpe. Trmrlzu nzatwzlrtxngr nidr mz nelzdr kxbrtale, ma mztr tqtclvrne mz lrpzki.” 33 A' rpibzkr bade kx, “Trpnzngr me nzxpe-ngrgr dakxnzng kx natakitrde leplz lcng mrka.” 34 A' Jiszs veam bagr kx, “?Bret tqlvr kx ycbz bamu?” Rpibzkr kx, “Rlimz, x nc kxsupe pipzne.”
35 Rpibz Jiszs mz leplz kcng amrlx nawxbuong. 36 Zbz otitxde dapu bret kcng rlimz x nc kcng, awitx-ngrbzle mz Gct, lopxititxdeng, x sc tqkatipemleng bagr tqakipebzkr mz leplz kcng amrlx. 37 Nzmung amrlx x nelzdr krlc. X atakqtikr mulide kcng tqyctxo x nulvzo-ngrgrle topla kxetu rlimz. 38 X mz nzrlwxngr ncblo txpwz krlzbzle siu-pwx (4,000) kcng tzmung mz zbq lcma, a' trnzrlwxtrpwzu olvz x doa kxnztopwzng. 39 Zbz sc tqatwzlrpengr Jiszs leplz kcng mz mztea nyzdrng. X sc tqprtzpekr mz bot, sc tqalilvckiopekr mz nrlarde kc Magadan.
✡15:4 Nzrlaszngr 20:12; 21:17; Livae 20:9; Lou Kcpwz 5:16
*15:5-6 15:2 Mc Matiu 15:12 x natq kxtopwz elr. 15:5-6 Blz kx myapxbz mz nzobqkr Gct ngi nzvz-nqblq-kaingr natqde, x nzrka-ngrbz blz bade kc ate. [Sam 4:5; 34:10-14; 50:15; 51:16-17; 73:24; 81:83; Hosia 6:6; Mak 12:33]
✡15:9 Asaea 29:13
†15:12 Farzsi kcng nzvz-nqblqlr kzdung nqmq kxnzyrlq-pnzng mz nzbatr-krbzle mz leplz nzvz-nqblq-krdr Lou sc Mosis mz nzvz-nqblq-krdr nqmq lcng. Nzalvztr-ngrdr kx ncblo kx trvz-nqblqleu nqmq kr melrmqdr lcng, trtubq-kzu mz nzobqkr Gct. Mz kzdq nqmq kr melrmqdr lcng, leplz naycpq-kailr mqdr x dakxnzng mz lue, x sc tzmu-ateng. X ncblo neng Jiszs nzvz-nqblq-kzlr nqmq lcng mz zbq kang kqlu. A' Jiszs alvztr-ngrde kx nqmq lcng trtubqu, murde nzvzpxmqng mz ncblo, a' trnzvzpxpqngqu mz Gct. Nzalvztrkr Jiszs lc, atrkati-kzle nzalvztrkr Farzsi. X batr-kzpzle trnzmnc-zpwx-krdru badr.
‡15:28 Mz nzycmne-ebzpxngr lc, doa kxnztopwzng drtwr ngrde lr Jiu, x kuli drtwr ngrde kxtrngiulrJiu. Dakxnzng drtwr ngrde da kxnzmrlzti kcng tzvzpxmqng mz Gct. Suti drtwr Gct nzamrlz-krde leplz amrlx mz nzwzkr lr Jiu, leplz nedeng angidr kcng tqmcpxleng. Delc Jiszs tqvz-kai-ngrbzle mz lr Jiu. Be lc drtwr ngrde kx trmrlzu nzamrlz-krde kxtrngiulrJiu x lr Jiu kc ate. A' natq olvz kc aelwapx-ngrde kx lxngiti-angidrle Jiszs, x takitrde nzokatr-krde nide.