5
Nqmq Kr Doa Neng Gct
Luk 6:20-23
1 Mzli kc tqmcngr Jiszs zbo ngr leplz kcng tzvzmqng bade, sc tqvzdzpe mz kzdq nra mz nzalvztr-krde nidr. X ncblo nedeng nzwxbu-ngalelvzlr nide mrkc tqwxbu-ngrde. * Krlc nqmq kr lr Jiu mz nzalvztr-krdr leplz. Matiu 5:2—7:27 nzrpibz Nzalvztrngr mz Nra. Mz nzalvztrngr lc, Jiszs ycmnebz mz krkcng tzlxngitipelr nide, kxmule-esz' leplz kxnzkqlung nzlalztq-kzpzng bade.
2 X sc tqrpipebzle mz nzalvztr-krde nidr kx,
3 “Ngi da kxmrlz nzkrlz-krmu kx mnc-xgleamu nzokatrkr Gct, murde Gct sa nakabzle bamu da kx vzpxm mz nzngini-krde King rmu.
4 “Ngi da kxmrlz nzvzkr drtwrmu, murde Gct sa na-amqtrpzle nabzmu. ✡ Asaea 61:2
5 “Ngi da kxmrlz nzavzo-lzbq-krmu, murde Gct sa nakabzle bamu zmatq mz nzaclve-krmu mz nrlc. ✡ Sam 37:11
6 “Ngi da kxmrlz nzpqkr nabzmu mz nzrtangrti-krmu Gct, murde Gct sa naokatrle nimu mz nzvz-nqblq-krmu me pnz drtwrde. ✡ Asaea 55:1-2
7 “Ngi da kxmrlz nzyckr drtwrmu leplz mz nzokatr-krmu nidr, murde Gct sa nayc kz mz drtwrde nimu.
8 “Ngi da kxmrlz nztubqkr nabzmu, murde sa nakrlz-angidramu Gct x nqmq kxtubq. ✡ Sam 24:3-5
9 “Ngi da kxmrlz nzaodutr-lxblr-krmu leplz mz nzmnc-krdr mz nrwx, murde Gct sa narpile kx nimu doa nedeng.
10 “Ngi da kxmrlz nzatrkatingr nimu mz nzale-krmu da kxtubq, murde mnclzbzmu mz Gct mz nzngini-krde King rmu. ✡ 1 Pita 3:14
11 “Ngi da kxmrlz nzatrkatingr x nzrpibqtingr x nzobqszongr nimu mz nzvz-nqblq-krmu ninge mz nrlc ka. ✡ 1 Pita 4:14 12 Mzli ka na-abrtzlvzamu nzapu-krmu profet ne Gct kcng tzatrkati pnz melrmqmung. Murde mz nrlc kc navzm, sa natwz-kzamu da kc tqmyapx-esz'ngr.” ✡ 2 Be Ngrdr 36:16; Aposol 7:52
Doa Neng Gct Nzapulr Dcpiz X Zyzlr
Mak 9:50; Luk 14:34-35
13 Jiszs rpi-mopwzle mz nzycmne-ebzpxngr kx, “Na-apuamu dcpiz kxmrlz mz nrlc ka. Murde na-amnc-angidr-kzamu leplz da kc tqwai dcpiz nzayc-angidr-krde dakxnzng. A' nzmu nilwz dcpiz kx tqmrbrle la, trpengr nzamrlz-moungr. Trpnzngr da kx takitrde, a' takitxtrpwzle nzrtctxngr mrkc tzvz-ngrdr leplz. Mz nzmu-krde lcpwz, bzkq esaki nzvectr-krmamu leplz bange mz nzarlapx-krnge nidr. 14 X nzmu na-apu-kzamu zyzlr kc namailzbzle leplz mz Gct. ✡ Jon 8:12; 9:5 Murde nztubqkr nqmq krmu naopx-angidrbz badr, da kc tqwai zyzlr ngr taon kx ycom mz newz tryc-kapqu. 15 X navz zvz nzale-krmu da kxmrlz, murde trpnzngr doa kx rtekatr lam sc tqyrlq-kapqpele. X tralalvzo-kzleu topla. A' lam nzadolzpwz wq, murde leplz namclr zyzlr mz nzdwatr-krmlr brma. 16 Mz nqmq lcpwz, na-aelwapx-ngrbzmu mz leplz nztubqkr nqmq krmu, kc navz-nqblqbzlr mz Trtemu kc Heven, mz nzglqlz-krdr nide.”
Natq Gct
17 Rpi-mopwz Jiszs kx, “Bzkq rpiamu kx vzmc mz nzayrkrpx-krnge Natq Gct kxnzyro mz Lou sc Mosis x nzalvztrkr profet. Murde trvz-ngrpwc'u mz nzayrkrpx-krngele, a' mz nzatukztr-krngele. † Nzatutr-krde natq Gct drtwr ngrde nidr seleng: 1) Atutrle natq Gct kxnzplzpx amrlx kx nzyapwxtipxngr Kxnzmcpx. 2) Atutr-kzle da amrlx kcng tqesalz-ngrbz Gct mz leplz nedeng. 3) Vzm mz nzngini-krde ncblo kx tubq-esz'ngr kx trpnzngr alwx ngrde, mz nzvz-nqblq-angidr-krde lou sc Gct amrlx. 4) Vzm mz nzalvztr-krde drtwr angidr ngr natq Gct mz Nzryrngrkxtr kc kai. 5) X vz-kzp mz nzrka-krbzle kzdu-kzng nzalvztrngr, murde Nzryrngrkxtr kc kai x natqdeng namwitr-lxblrng.
18 Dekc tqvz-ngrmc mz nrlc. X trpnzngr natq kxpipz mz Lou sc Gct kx nakatxpx mzli ka bongavz x nrlc tqycbe-ngrdr. A' natqdeng amrlx na-atutr-kaing. ✡ Luk 16:17 19 Mz nzmu-krde lcde, doa kx rnzlvzole kzdq natq Gct, x alvztr-rbrle da, sa nanginide ncblo kxmane mz leplz amrlx kcng tzmnclzbzng mz Gct, kxmule-esz' ncblo lc rpile kx natq lc mane. A' kx vz-nqblq-zvzle natq Gct x alvztr-angidr-ngrde leplz, sa nanginide ncblo kxetu mz drtwr Gct. 20 Napibo bamu, rblx nzmnclz-krbzmu mz Gct mz nzngini-krde King rmu, a' ngi txpwz nzmu nzvz-nqblq-krmu natq Gct namyaszpxle Farzsi x kxnzalvztrng mz Lou sc Mosis kcng tzvz-nqblqlr drtwrdr esz'-krdr.”
Bzkq Drtwrm Ngya
21 Jiszs rpi-mopwzle kx, “Krlzamu kx mzli kc bqnc Gct kabzle natq lc mz melrmqgung, mz nzrpi-krde kx, ‘Bzkq rnibqq leplz. Murde sa na-ayrplapxx doa kx rnibq leplz.’ ✡ Nzrlaszngr 20:13; Lou Kcpwz 5:17 22 A' rpibo bamu kx Gct sa na-ayrplapx-kzle mrlx kc tqngyati drtwrde kztede, kxmule-esz' tratrkatileu nide. X nide kc tqrpibzle mz kztede kx, ‘Nim dcvi r leplz,’ o ‘Nim brmrda ngr leplz,’ sa navzmi nide mz Kansrl. X nekc mz drtwrde rpile kztede takitrde Hxl, mz nzrpi-krbzle bade kx, ‘Nim bo-ngqngu,’ takitrde Gct nzrtctr-krde nide mz nyr ngr Hxl.
23-24 “Mz nzmu-krde lcde, tubqti-lzbq-kaiamu mz kztem kc tqngyati drtwrde nim. Na-aleq da lc nzmu navzq mz Mangr-nzangiongr Yawe mz nzrka-krm blz mz olta, a' dcpx mz drtwrm kx kzdq doa ngyati drtwrde nim. Bzkq kaq blz kc, a' yrlq txpwz ena, x tubqti-lzbq-kaiamu mz kztem. Zbz takitrde nzyzlu-kr-mopwe' Mangr-nzangiongr mz nzrka-krm blz kc. ✡ Nou 4:4-7; Nzyrplapxngr 15:8; Asaea 1:10-15; Jeremaea 6:20; Emos 5:21-24
25 “Mz nqmq kcpwz, mz nzvz-krmu mz lrpzki, tubqti-lzbq-kaiamu mz ncblo kc natwzle nim mz kot. Murde ma tqaprcbzle nim mz majzstret kc na-aprc-alzupwzle nim mz pulis, x pulis sc tzadwatrpelr nim mz presin, 26 mrkc namnc-ngrn x nakrlz-zpwxbzle nzxpepx-krm trau amrlx kcng nakapxq.”
Bzkq Kcmnzngr Mzpq Doa Kx Trngiu Krnalzm
27 Jiszs rpi-mopwzle kx, “Krlzamu kx mzli kc bqnc Gct kabzle natq lc mz melrmqgung, mz nzrpi-krde kx, ‘Bzkq rmwimiq doa kx trngiu krnalzm.’ ✡ Nzrlaszngr 20:14; Lou Kcpwz 5:18 28 A' rpibo bamu kx mrlx kx mzte rkcmnzngr doa, x rpile namwimile, mz nabzde rnzlvzopele natq Gct kc tqrpile kx bzkq rmwimiq doa kx trngiu krnalzm.
29-30 “Mz nzmu-krde lcde, aclveti-lzbq kz. Bzkq rlr-ngrbzme mz alwx nzaclve-krde nim. A' mz mzli r nzatalzngr arlapx-lzbq. X katxpx-lzbqm mz nzatalzngr kx batrpzle nztao-zvz-krm. Murde nzwz-kato-krm mz nzmncngr kxtubq mzli ka, x nzmnc-zvz-krm Heven kalr, myaszpx-zlwzle nzaxtx-krbzme nzrlxngiti-krm mzli ka, x nzmnc-zvz-krm mz Hxl kalr.” ✡ Matiu 18:8-9; Mak 9:43-47; Luk 17:1-2
Bzkq Axtxbzme Krnalzm
Matiu 19:9; Mak 10:11-12; Luk 16:18
31 Jiszs rpi-mopwzle kx, “Krlzamu kx mzli kc bqnc Gct kabzle natq lc mz melrmqgung, mz nzrpi-krde kx, ‘Ncblo kx na-axtxde krnalzde, naka-kaipzle bade pepz ngr nzaki-lzbq-krdr.’ ✡ Lou Kcpwz 24:1 32 A' rpibo bamu kx ncblo kx axtxde olvz rde kx tr-rmwimiu ncblo kzble batrpzle bade nztao-krde mz alwx ngr nzrmwingr ncblo kzble nzmu nayrlz-moule. X ncblo kc tqyrlztile olvz lcde tao kz mz alwx lcdepwz.” ‡ Mz mzli nyz Jiszs, ncblo txpwz kx krlzle nzaxtx-krde olvz rde. A' mz nztwz-krgu drtwr lc mz nzmnc-krgu, nakrlzku kx drtwr ngrde doa amrlx bzkq nzaxtxdr krnalzdr.
Bzkq Yrlq Nzesalz-krm Mz Kzdq Da
33 Jiszs rpi-mopwzle kx, “Krlzamu kx mzli kc bqnc Gct kabzle natq lc mz melrmqgung, mz nzrpi-krde kx, ‘Bzkq pokiaq mz nzesalz-krm, a' atutr zvz da kx esalz-ngrbzme mz Gct.’ ✡ Livae 19:12; Nzkqlu-krdr 30:2; Lou Kcpwz 23:21, 23 34 A' rpibo bamu kx bzkq yrlqq nzesalz-krm mz kzdq da, murde rblxbz bam nzatutr-krm natqm, a' da amrlx yc mz mq Gct. Bzkq yrlqq nzesalz-krm mz Heven murde ngi me mncngr Gct. 35 X bzkq yrlqq nzesalz-krm mz nrlc ka, murde nyz-kzde. X bzkq yrlq-kzq nzesalz-krm mz Jerusalem, murde krlc mzteadau kx nzangiongr Gct, King kxmatq. 36 X bzkq yrlqq nzesalz-krm mz narm, murde rblxbz bam nzaprkingr x nzabongr nqnginarm, murde da lc yc kz mz mq Gct. 37 Setzn kc Tqdrka'ngr tqngi nou da kxtrka amrlx batrpzle mz leplz nzpokia-krdr x nzrpilr nayrlqlr nzesalz-krdr mz kzdq da. Mz nzmu-krde lcde, da kx napi-txpwzme mz nzycmne-krm, ‘Eu’ o ‘Trtingr.’ A' bzkq pokiaq x bzkq yrlqq nzesalz-krm mz kzdq da.” § Mzli kznike ncblo yrlqle nzesalz-krde mz kzdq da, opxm kx nide kxpokia, murde natqdeng esz'-krdr trtakitrdeu nzatutr-krde nzesalz-krde. A' kxmule-esz' ncblo yrlqle nzesalz-krde mz kzdq da, a' kzdung mzli pokia. Delc na-aelwapx-ngrgu mz nqmq krgu kx pi-zvzku da angidr. X na-atutr-zvzku da kx piku. Mc Jon 8:44 x Jemes 5:12.
Bzkq Ayzluq Da
Luk 6:29-30
38 Jiszs rpi-mopwzle kx, “Krlzamu kx mzli kc bqnc Gct kabzle natq lc mz melrmqgung, mz nzrpi-krde kx, ‘Nzayrplapxngr narsakrlr-ngrpwz mz nike nzvz-rbrngr. Doa kx tz-batrpzle mz kztede, natz-batr-kzpzle mzte. X doa kx tzlqpxbzle nqngi kztede, natzlqpx-kzpzle nqngide.’ ✡ Nzrlaszngr 21:24; Livae 24:20; Lou Kcpwz 19:21 39 A' rpibo bamu kx bzkq ayzlubzme nike nzwaisr-ngrm, a' ayzlu-alzupwz mz nivz. Nzmu ncblo naobqszole nim mz nztztr-krbzle blzmznaom kxrtc, bzkq ayzluq, a' ao-lxlvr-kzpz nrlarde kxmc mz nztz-kz-krpzlele. 40 X nzmu ncblo natwzle nim mz kot murde rpile nrz scmqng nangi scdeng, ka-kzpz bade bot scm. * Nzycmnekr Jiszs angidr dese: Nzmu ncblo natwzle nim mz kot murde rpile nzkq scm kc tqyctxtr kai nangi scde, ka-kzpz lrpz ngr zbao scm.
41 X nzmu kzdq kxetu kx rtulrtrpzle bam nzglq-krbzme bxli scde mz kilomita kxesz', bzkq kabzme, a' glqtibzle kilomita nali. 42 Doa kx rlxbz bam da murde rpile nangi scde, x mcq kx takitrde nzokatrngr, kabz. X kx rlxtibzle da scmqng mzli kxmrbcne, rlr-ngrbz.” ✡ Lou Kcpwz 15:9-11; Sam 112:5, 9; Nzyrplapxngr 19:17; Luk 6:35
Bzkq Mwati Drtwrm Enqmi Rmqng
Luk 6:27-28, 32-36
43 Jiszs rpi-mopwzle kx, “Krlzamu kx mzli kc bqnc Gct kabzle natq lc mz melrmqgung, mz nzrpi-krde kx, ‘Mrlzti kztemqng, a' namwati drtwrm enqmi rmqng.’ ✡ Livae 19:18 44 A' rpibo bamu kx namrlzti-kzamu enqmi rmung. X nakrka'-ngrnamu leplz kcng tzatrkatilr nimu. 45 Murde mz nzale-krmu da lc, sa nanginimu mrlxng Gct Trtemu kc Heven x na-apuamu nide. Murde mrlztile leplz kxmule-esz' kxdrka'-ngrng o kxnzmrlzng, mz nzati-krbzle nepi x nzadc-krbzle tewa mz leplz amrlx. 46 Nzmu namrlzti-txpwzmu kxnzmrlztilr nimu, Gct ma trkapwzleu da kxmrlz bamu. Murde tr-rblxu nzalengr, x kxnzatakqting takes nzale-kzlr da lc. 47 Nzmu narpi-txpwzmu kx, ‘Nimu la,’ mz kztemung, trmyaszpxleu leplz kc-kzng. Murde tr-rblxu nzalengr, x kxnzmnc-mrbrng nzale-kzlr da lc. 48 Mz nzmu-krde lcde, namrlztiamu leplz amrlx, da kc tqwai Trtemu kc Heven nzmrlzti-zlwz-krde leplz amrlx.”
*5:1 Krlc nqmq kr lr Jiu mz nzalvztr-krdr leplz. Matiu 5:2—7:27 nzrpibz Nzalvztrngr mz Nra. Mz nzalvztrngr lc, Jiszs ycmnebz mz krkcng tzlxngitipelr nide, kxmule-esz' leplz kxnzkqlung nzlalztq-kzpzng bade.
✡5:4 Asaea 61:2
✡5:6 Asaea 55:1-2
✡5:12 2 Be Ngrdr 36:16; Aposol 7:52
†5:17 Nzatutr-krde natq Gct drtwr ngrde nidr seleng: 1) Atutrle natq Gct kxnzplzpx amrlx kx nzyapwxtipxngr Kxnzmcpx. 2) Atutr-kzle da amrlx kcng tqesalz-ngrbz Gct mz leplz nedeng. 3) Vzm mz nzngini-krde ncblo kx tubq-esz'ngr kx trpnzngr alwx ngrde, mz nzvz-nqblq-angidr-krde lou sc Gct amrlx. 4) Vzm mz nzalvztr-krde drtwr angidr ngr natq Gct mz Nzryrngrkxtr kc kai. 5) X vz-kzp mz nzrka-krbzle kzdu-kzng nzalvztrngr, murde Nzryrngrkxtr kc kai x natqdeng namwitr-lxblrng.
✡5:21 Nzrlaszngr 20:13; Lou Kcpwz 5:17
✡5:23-24 Nou 4:4-7; Nzyrplapxngr 15:8; Asaea 1:10-15; Jeremaea 6:20; Emos 5:21-24
✡5:27 Nzrlaszngr 20:14; Lou Kcpwz 5:18
✡5:29-30 Matiu 18:8-9; Mak 9:43-47; Luk 17:1-2
✡5:31 Lou Kcpwz 24:1
‡5:32 Mz mzli nyz Jiszs, ncblo txpwz kx krlzle nzaxtx-krde olvz rde. A' mz nztwz-krgu drtwr lc mz nzmnc-krgu, nakrlzku kx drtwr ngrde doa amrlx bzkq nzaxtxdr krnalzdr.
✡5:33 Livae 19:12; Nzkqlu-krdr 30:2; Lou Kcpwz 23:21, 23
§5:37 Mzli kznike ncblo yrlqle nzesalz-krde mz kzdq da, opxm kx nide kxpokia, murde natqdeng esz'-krdr trtakitrdeu nzatutr-krde nzesalz-krde. A' kxmule-esz' ncblo yrlqle nzesalz-krde mz kzdq da, a' kzdung mzli pokia. Delc na-aelwapx-ngrgu mz nqmq krgu kx pi-zvzku da angidr. X na-atutr-zvzku da kx piku. Mc Jon 8:44 x Jemes 5:12.
✡5:38 Nzrlaszngr 21:24; Livae 24:20; Lou Kcpwz 19:21
*5:40 Nzycmnekr Jiszs angidr dese: Nzmu ncblo natwzle nim mz kot murde rpile nzkq scm kc tqyctxtr kai nangi scde, ka-kzpz lrpz ngr zbao scm.
✡5:42 Lou Kcpwz 15:9-11; Sam 112:5, 9; Nzyrplapxngr 19:17; Luk 6:35
✡5:43 Livae 19:18