1  2:1 Met 24:11; Zud 4Ta khøuwa-te ndøgo, Izlael bawan mokho-te, khavozam manqa vevezam ezoqam ndøgoám. Yaq até zo mokho-té-a, khokho nømendim ezoqam ndǿfakház, neka khonoam-te manqat vini vǿndapāv. Geté manqat av nqægo, ezoqa géngiæzó. Nginik nømendim ezoqam, até tigí Evezøzá-ya, gó꞉naumát, ndego genqovotaz. Geté ta mokho-te ndøgo, ndigu ekeza kha géngiú. Nakhamas-té ginǿ-soqoéz. 2 Ndigu mambe møqǽ. Yaq ezoqa kopoáv, ekeza kha Klisten ezoqam ndi꞉vewe, tiqa matev mbópavát. Yaq ta zapaya ndøgo, ezoqa unimanqatin nakhoa géngenøitát. 3 Nginik khokho nømendim ezoqam, moni møqǽ. Ndigu tiqa khavozam manqat mokho-te, ekeza matavap-te mba ndøndo-fakhate, zogi moni upøgim-qa ndǿgoát. Geté Mbumbukiam, nupøkhan mba, é-møndæpøoá. Ndego ti-te yaq-fia ndø̀tá. Ndego géqaqavaták. Geté géngiæzó.

4  2:4 Zud 6Até enzol ezoqám-a, ndigu Mbumbukiam-qa manqat giqavotøvem, ndego ambá av nqǣgo, sègezøtāk. Geté ndego gøinam manqei-té genø-nqagevém. Yaq ndøgo auli sén gini-møpøsáp. Bøivun-té. Neka manqa ovøyam khøuwa-qa mo꞉keogé.

5  2:5 Gen 6–8; 2 Pita 3:6Até ndigu ezoqám-a, nupøkhan mba giyagam, ndigu Mbumbukiam gisanqawam, ndigu sa takeáv, av gi꞉yagam, geté ndego khøuwat-qape ndonqonqotáv, ti-te. Yaq ezoqa eit-mba ndøkhandí꞉z. Noa-za mba ndøkhandí꞉z, ndego ezoqa gezø-akha, Mbumbukiam-te tiqambuz neka matev eqeieqei-te vǿyagāt.

6  2:6 Gen 19:24; Zud 7Até Sodom neka Gomolá-ya, ta taon kandakanda menas, Mbumbukiam ezoqam-qa manqa-zapazapa-qa yaq-fia ndøtá, vø̄sonqotav, vø̄pakhak, ezoqam namba. Ndego tene-matanám ndǿgo: Ezoqa gé꞉zømás, gekha ezoqām ndigu, ndisanqawe, matev āv tøzømbé-fakhán. 7  2:7 Gen 19:1-16Lot-za mba ndøkhandí꞉z. Zapa ndǿgo, ndego ezoqam eqeieqeí. Ndego mbøni mbonqosøgeapám, ndigu Mbumbukiam-qa manqat ginqagimam, neka mambe si vøzø̄wagam. 8 Ngenek ezoqam eqeieqei, khøuwa kopoav ti mokho-te geyagam, tiqa matev soqøsoqa vø̄qeivam-a, vø̄-ewagam, ndego andé enqoni me mbøevitám.

9 Nqanek matev vinivinimba, ni āv qani-nømendím nqǽgo: Mbumbukiam ndego kopømbaqapé. Ezoqa ndaføya-ndaføya, ndipotonam, segé-khandí꞉z. Geté manqa-zapa-us ezoqam, ndego yaq-fia zøtaév. Ndego manqa ovøyam khøuwa kandambaqape nonqo zøgeawát. 10  2:10 Zud 7-8, 16Ezoqam ndigu, ekeza kha-qa poev soqøsoqa vinivinimba ndimbopaev neka Mbumbukiam-qa Megeat Matev ndisanqawe, ndego yaq-fia nøme mba zømbótá.

Nginik khokho nømendim ezoqam, sapí neka ekeza kha mba ndø-eqawát. Ndigu até nqova iz kandakanda-té-a, møe mbaín, geté sège-ngenøzotatún. 11  2:11 Zud 9Geté até enzol ezoqám-a, oskiá ndøgo, tiqa bazaføgakh, ndigu khokho nømendim ezoqam-qa bazaføgakh uni ndæløvui, ndigu nqova vinivinimba-qa iziz ngenøgimáv, Evezøza-qa bugug-te. 12  2:12 Zud 10Nginik khokho nømendim ezoqam, andé søvakha gigiap me me꞉gó, søvakha gigiap ndigu, leg-te khøuwag nqazifeam, nqazi-zitøge. Ndigu mokho ndàpeáv. Ngenøgim manqat khokhó sege-manqatatún. Nginik ande søvakha gigiap khobokhobos me, gésoqoéz. 13 Ndigu ezoqa nøme, soqaqape-te ndi-abam, ndigu yaq-fia soqaqape āv tiníndapém. Khøuwa ate ndægo nqa-okho, ndigu lou loge si zøwág. Tiqa poev sa ndǿgo. Até ndøgó-a, zo namba lou gi꞉logatun, ndigu matev soqøsoqa neka khavozam manqat zø-okhoatún. Ndigu zoqa Klisten bawan mokho-te, andé khavim me me꞉gɨɨ́t.

14 Tiqa bøi, mambe møqæ sakheis-qa mba me꞉vawé. Tiqa manqa-zapazapa, sègezø-okhó. Neka ezoqa nøme ndigu, Klisten matev-te bazaføgakh mbain ndigu, ndigu manqa-zapa-te ituza-qa ndøgó. Tiqa qovet matev, vaev mbaín. Mbumbukiam géngiæzó, ndigu. 15  2:15 Num 22:7; Zud 11; Veve 2:14Ndigu matev eqeieqei, mø̀ndø-ivøvém, neka ande leg-te me vø̄e-ewaz. Ndigu Balam-qa me꞉qeivím, ndego Beol-ge yo. Até ndegó-a, manqa-zapa matanam mokho-te, moni qaqasam-qa mbogoám. 16  2:16 Num 22:28-35Geté Mbumbukiam gèmboponqóm, teqa manqa-zapa matanam zapaya. Tege donki, ezoqa manqat mbo-eín, ndego manqa vevezam ezoqam vø̄tokav. Zapa ndǿgo, teqa matev mokho mbaín.

17  2:17 Zud 12-13Nginik khokho nømendim ezoqam, andé kea kumbutap ibøkha-yav me me꞉gó. Neka ndigu andé khaiya ozoz me me꞉gó, khamøe tøkhamba, ndoqo-matavap, qæ ndø̄lanqā, getē qæ mbaīn. Mbumbukiam manqei mø̀ndøzømbo-mendeó. Ta manqei-qa bøivun, kandamba tantáv. 18 Ndigu manqat kandakanda, sège-manqaté. Geté ndøgo mokho mbaín. Ezoqa nøme ndigu, ndakin mba gikhokhoz, manqa-zapa matanam-te, av ezoqa nøme gi꞉goatun, ndigu nginik kha-qa poev soqøsoqa-te neka mambe matev-té ginø-ituzá. 19 Nginik khokho nømendim ezoqam, ezoqa manqa mbusa āv gizømbe-aumatún nqǽgo: Tiqa nømendim manqat, génqovotáz. Geté ndigu ekezan, tokøzát. Manqa-zapa ndønønøsám. Yaq ndøgo géngiæzó. Zapa ndǿgo, gekha matēv ndøgo, ezoqa ndønøzøiwat, ndøgo génønøtám.

20  2:20 Met 12:45Gekha ezoqām ndigu, nigi Evezøza neka Khandi Etoam Ezoqam Yesu Keliso gi꞉zøtez, neka manqei-qape matev vø̄-ivøvem, ndøgo ezoqa ndøngiæzoat, yaq vaev nqawa manqa-zapa-te tivesez, vǿgutāz, yaq ti-te ndigu unimé꞉-soqá. Taqa soqain ndø̀møløvú, av bugukhokhof qægoam, ndigu unimanqatinteav qagoam. 21  2:21 Luk 12:47-48Ndigu nakhoa eqeieqei amba zøtezateav tøgonɨn, ndøgo ambá kopømbá ti-te. Geté ndakin ti-te ndigu, unimé꞉-soqá. Zapa ndǿgo, nakhoa eqeieqei mø̀ndæzøtéz. Geté zitá gini-wuøém, neka Mbumbukiam-qa guguna manqat, ezoqa ndigu gi꞉zømesimam, vø̄-ivøvem. 22  2:22 Prov 26:11Tiqa matev até kopó, av manqat nøme, nqazi-manqate. “Gaqo qometa tuqoza, nangó gunølogɨ́n,” neka “Bøsik ibøkha-te tukhakuam, nango mø̀ndø-vesezɨn, qoq-pakha-te vømø̄-khakuamɨn.”