1 Yisasia mani kea huteno ikapinaga age-saga hu-maineno Anumayamotega mage huno hie “Nenafagae falisua kanania ago efalote hie. Nekamona kagi ali-saga hisua yafe falitena he-tina kagaitega haisua yafe lokiya hale yania nekamonina namio. 2 Nekamonia mukiama naminana veamogamina agola maige maige hisaya hamaimuamima amamisua yafe mukia veamote kava yagaisua tokiyania ago naminane. 3 Anumaya Kotiga kagaikage ala tokiya kanoa tamagemona tamaa nagokeage Anumaya mainanagi veamoya kagaifema havilama huya maisayana hu-tenana kanoa ‘Yisasia veamogami amaku amamemaa ali-gatisia kanoa ikapinagati emainea kano maine.’ huya havilama hisayana maige maige hisaya hamaimula aligahae. 4-5 Naminana tokiya hale yatetia ma mopalela kagia alisaga hu-mainoe. Naminana aliyana ago alina avaya aye-mainoa yafe Nenafagae meni kanafina kagai kavate mainesugeka tokiya hale yania namio. Ma mopama talo ohunana kanafina kagaiene mainoanagina tokiya hale yania haneanagi menia eteka ani yana namio. 6 Ma mopafi veapitima naminana veamogamina ago aepakaa hu-falote huna hama-pai-mainoe. Ani veala kagaikaa veanegika nagaila ago naminane. Naminanageya ani veamoya kagai kea atafa hu-linae. 7 Atafa hu-lineya mukia naminana yana kagaikaalegati emaine huya menia ago havilinae. 8 Naminana kea ago amamugeya ago atafa huya havilama hulineya nagayama kagaitegatima emainoa yafena tamage nehie huya havilama hu-lineya kagayama hu-na-tanagena emainoa yafena amakupi maleya amametiti nehae.

9 Amakaifena Nenafagale ke huna kahavi-negoe. Ma mopale yafema amaugafa aliya nehaiya veafe Nenafagale menia kahavi-nokogi kagaikaama naminana veanea kagai veane mainaya yafe naminana veafe kahavi-negoe. 10 Nagai veala kagai veale. Kagai veala nagai vea mainageya ani veanimoyama nagai tokiyaleti haya kavala nehageya mopale veamoya ageteya nagai nagia alisaga nehae. 11 Ali-saga nehagena menia ma mopaletila atalena kagaitega ugahuanagi nagaifema amakupi nemalaya veala ma mopafi maigahagi alu aotage Nenafaga kagaika kagileti naminana nagilema hanea tokiyaleti auvai-ma-tesanana taagaya nagoke kanolatama mainoa ya huya amakaya nagoke kate maleya nagoke veane maisae. 12 Nagaya amakaiene mainena kagayama naminana nagilema hanea tokiyaleti auvai-ma-togeno nagomoa hani-ki-mainea yapima tegelege nehia atafina ougahagi Anumaya Koti kema kae-malenaya kemoma efalote huno tamagema hisia yafe anima hani-ki-mainea yapima tegelege nehia atafima visia kanoa Yutasia agaiage ugahie.

13 Menia etena kagaitega egahugi nagayama nehua muse yaniamoa amakai amakupina hava-tesia yafe ma mopale mainena mani kea hama-nepauve. 14 Hama-nepaina kagai kea ago amaminogi nagaya ma mopafi kanoa omainoe. Alu nagu nameene kano mainogeya amakaya nagayama hua kava huya ma mopale veane kana vea omainae. Alu amaku amameene veane mainaya yafe ma mopale veamoya amakaife amaipa kafa he-ma-teya kamea hu-neama-tae. 15 Kamea hu-neama-tayanagi nagaya veanimogamifena ‘Ma mopaleti amavalesaga huo.’ huna kahavi-nokogi ‘Satanima aye-mavataga hu yafe auvai-mateka amaugafa ali-gatisanageya kayeya maisae.’ huna kaha-vi-negoe. 16 Nagaya ma mopale kanoa omainoe. Alu nagu nameene kano mainogeya amakaya nagai kana huya ma mopale veanea omainae. Alu amaku amameene veane mainae. 17 Mainayafe kagaika ke-lamage kekaleti alu aotage veane maisaya amaku amakesa amamio. Kagayama hu-mainana kemoa tamageage nehie. 18 Kagaya ma mopafima nagaima hu-natanagena emainoa kava huna naminana veanea nagaya mopale veamogami amunopi ago hu-ma-tenoe. 19 Nagi tamage huya amaku amamemaamona kagaila kamisaya yafe nagaya nagu namemaamona kagaila negamue.

20 Nagaienema mainaya veaneagefena kahavi-nokogi amakayama hisaya keleti nagaifema haviya amakupi maleya amametitima hisaya veafeene kahavi-negoe. 21 Nenafagae mage huna kahavi-negoe kagaya nagaienema mainagena nagaya kagaienema maugetaama hua kava huya nagaifema amakupi malenaya veala nagoke vea kanoa taagaiene maisageya mukia mopale veamoya kagayama hu-na-tanagenama emainoa yafema haviya amakupi maleya amametiti hisae. 22 Taagayama nagoke taaipalema maua kava huya nagoke amaipale maisaya yafe naminana tokiya hale yania ago amaminoe. 23 Amakaya nagoke vea kanoa mai-lama huya maisaya yafe nagaya amakaienena maugeka kagaya nagaienena mainane. Kagaya hu-na-tanagena emainoa yafema mukia mopale veamoya havisaya yafeene nagaifena kahau kayamopafi negahaigeka ania huka ma mopale veafeene kahau kayamopafi kahau-mainea yama havisaya yafe kagai kema havimalenaya veamoya nagoke vea kanoa maisae.

24 Nenafagae ma mopama taloma ohunana kanafina nagaifena kahau kayamopafi kahaigekama naminana tokiya hale yania nagaima naminana veamoya agesaya yafe nagaya maisua kumate maisae huna nehue. 25 Kanaleya huka fatago hu-mainana Nenafagae ma mopale yafema amaugafa aliya nehaiya veamoya kagaila okagenagi nagaya ago kagaila kage-mainoafe ma ma mainaya veamoya nagaima hu-na-tanagena emainoa yafena ago haviya ageya hu-mainae. 26 Nagaifema kahau kayamopafi kahau-mainea yana amakai amakupi malesana yafe aepakaa hu-falote huna hama-pai-mainoanagi nagoene hama-paigahue. Nagaya amakupi maisua yafe aepakaa ago hama-pai-mainoe.” huno hu-maine.