1 Yisasia ani kea Anumayamotega havigeteno tuelufua (12) anagaaene hati-laviya Kitaloni lina mo lakaeya umainae. Atu kaiyaga nago olivi yosa kali-malenaya hoya hanegeya Yisasia agaiaenema tokaeya nemaiya anagaamoyaene ani hoyafinaga umainae. 2 Umainayanagi mukia yupa Yisasia tuelufua (12) anagaamoyaenena ani hoyafinaga molitalu huya nemaiya yafe Yutasia, agesima huno Yisasina kamema hu-tesia kanomoa, ani hoya ago age-maineane. 3 Age-maineanagino Yutasia viayamo ala mono note kava vayateene Falasia vayateene vigeya mono note ati vayaene Lomu ati vayaene amigeno amavaleno ani hoyafinaga kaniene lamu kaniene tu hisaya yaene aliya emainae.

4 Ayanagi Yisasia mukia augafalema falote hugahema hia yana ago haviteno amakaite viayamo mo hama-vige “Tamakaya tafe atineayae?” huno hie. 5 Higeya kenonaa mage huya hae “Nasaleti Yisasife ati-yeta neone.” huya hageno Yisasia mage hie “Nagaya ma mainoe.” huno higeno agesima huno Yisasina kamema hu-tea kanoa, Yutasia, ani vayaene tokaeno maine. 6 Mainegeno Yisasia “Nagaya ma mainoe.” hunoma hia yafe amakavelegati eteya valega mo fae-laka-ti-mainae.

7 Fae-laka-ti-tageno Yisasia nagoene eteno hama-vige “Tafe ati neayae.” huno higeya amakaya nehuya “Nasaleti Yisasife ati neayone.” huya hae. 8 Hageno Yisasia kenonaamia mage hie “Nagaya ago tamaha-nepauve nagaya ma mainoe huna nehue. Tamakaya nagaifema nati neayenutamahena ma ma nagaienema mainaya vayala amatalegeya afaa viho.” huno hie. 9 Yisasia agoma hu-mainea kea mage huno hu-maineane “Naminana veala nagoke kanoa ata-oayegahie.” huno hu-maineane. Anima hu-mainea kemoa falote huno tamagema hisia yafe Yisasia “Amatalegeya viho.” huno hu-maine.

10 Higeno Saimoni Pitaa ayaaya naepea ali-lianagino alisagino ala mono note hagote kava kanomo aliya kanoa, Malakusina, ai-koligeno tamaga kaiyaga agesa aifa-kali-talegeno asaga hu-lavi-maine. 11 Ai-fakaligeno Yisasia Pitafena hapaino “Ayaaya naepekaa tafugepi vaiyo. Naugafaene nagu name nagata aisia yania satuage hia tima hanea masu keayola Nenafaa naminegi nagaife onesie huka nehano?” huno hie.

12 Lomu ati vayaene ala kava kanoamiene mono note ati vayaene Yisasina atafa huya nofi ki-mainae. 13 Nofi k-iteteya hagoteya Anasite avaleya umainae. Anasia Kaiyafasina aamona nefa maineanagino Kaiyafasia ani kafufina ala mono note hagote kava kano maineane. 14 Kaiyafasia Yuta vayafe mage huno hama-pai-maineane “Kanalele nagoke kanomo mukia veamogamitefe huno falisie.” huno hu-maineane.

15 Saimoni Pitaene nagola Yisasienema tokaeno nemaiya kanoene Yisasina akave anatiana umainae. Nevaageno mono note kava kanomoa ani Yisasienema tokaeno nemaiya kanomona ago age-mainea yafe agaya Yisasiene ala mono note kava kanomo no kegiya kovefinaga hai-fale-maine. 16 Haigeno Pitaa fiate he-tino mainegeno anima Yisasienema tokaeno nemaiya kanomoa fiatema yagai-mainea munamofena mo hanepaino Pitana avaleno emaine. 17 Neegeno fiatema yagai-mainea munamoa Pitafena mage huno havige “Kagaya mani kanomona tuelufua (12) vayapiti kano mainano?” huno havigegeno “Aao nagaya ani vayapiti kanoa omainoe.” huno hapaiye. 18 Tusia yasimo higeya aliya vayaene ati vayaene ata kae-taleya he-tiya tota huya mainageno Pitaa amakaiene atale he-tino augafa tota huno maine.

19 Ala mono notema hagote kava kanomoa Yisasifena “Kagaienema tokaeya nemaiya anagakaheene kagayama hu-ma-veli mainana keheene naha-paiyo.” huno havinege. 20 Havigegeno Yisasia mage hie “Nagaya mukia veamogamina fufute hama-nepauvane. Mukia yupa Yuta veanea melitaluma haya mono nopiene ala mono nopiene hama-nepauvane. Fala-kina hama-opainoe. 21 Naa higeka nagaila nahavi-negane? Nagai kema nehaviya vayafena hama-nepauva kehena hama-vigo. Nagayama hama-pai-mainoa kea ago havilinae.” huno hie. 22 Higeno nago ati kanomoa he-tino maineleti Yisasima mani kema nehiana augosafi ai-ko-nelino mage hie “Naa higeka kagaya ala mono note hagote kava kanomo aulagafina mani kea nehane?” huno hie. 23 Higeno Yisasia kenonaa mage hie “Kefo kema hu-mainesugekahena nagaya kefo kema hua kea hu-falote huka naha-paiyo. Nagayama kanale kema hu-mainesugekahena naa higeka nai-ko-neline?” huno hie. 24 Higeya nofima kitaya nofila kalu he-oa-teneya Anasia ala mono note hagote kava kanoa, Kaiyafasitega hu-tegeya avaleya umainae.

25 Nevageno Saimoni Pitaa atale maineno ata lota huno mainegeya agaife mage huya hae “Kagaienena mani kanomona tuelufua (12) vayaamopiti kano mainano?” huya hageno Pitaa avane huno mage hie “Aao nagaya ani kanoa omainoe.” huno hie. 26 Higeno ala mono notema hagote kava kanomo aliya kanoamona, Pitama agesama ai-fakali-talegeno asaga hu-lavi-mainea kanomo anagapiti kanomoa mage huno hie “Kagaya Yisasiene hoyafina mainaagena kage-mainoe.” huno hie. 27 Higeno Pitaa nagoene avane huno “Aao nagaila onagenane.” huno higeno aupaa kokolemoa age ai-maine.

28 Yisasina Kaiyafasi nopinagati Lomu kamanile ala kava kanomoa kaiyekema hu-neamatea note kegeafiti avaleya umainae. Yuta vayamogamina mono keamimoa mage huno hu-maine “Afa vayaene tokaetama maisayana amakai kava hutama kefo vaya mainaya yafe ala imu kavela onegahae.” huno hu-mainea yafe Yuta vayamoya ala imu kavema mo nesaya yafenagiya ani nopina ohainae. 29 Kumatega mainageno Pailatia, Lomu kamanile ala kava kanomoa, amakaite eno mage huno hama-vige “Tamakaya naane keleti mani kanoa kaiyekea hu-tegahae?” huno hie. 30 Higeya kenonaa mage huya hapaiye “Mani kanomoma kefo kavama ohuneleasipa avaleta kagaitela omoteasine.” huya hae. 31 Hageno Pailatia eteno mage huno hama-paiye “Tamakaya avaletama tamakaitami mono keleti kaiyekea hu-teho tamakaitami yane.” huno hie. Higeya Yuta vayamoya mage huya hu-mainae “Kagaya kamanimoga huka taumono malenana kemoa nago kanoa haegeno ofalino.” huka hu-mainane huya hae. 32 Nayona Yisasia mage huno hu-maine “Nagayama falisua yana yafaga yosale nahaeya nasaesagena faligahue.” huno hu-maineane. Lomu kamani vayamoyage vayala yafaga yosalela hamaeya asaigeya fali-mainae. Yisasia agoma hu-mainea kemoa falote huno tamage hisia yafe Yuta vayamoya mani kea hu-mainae.

33 Hageno Pailatia ataleno kaiyekema hu-neama-tea nopinaga haino maineno Yisasife ke higeno vigeno mage huno havige “Kagaya Yuta veanogami sauve kano mainano?” huno havige. 34 Havigegeno Yisasia kenonaa mage hie “Kagaya kagu kagesafiti mani kea nehapi ifi nagoa vayamoya nagaifena kaha-paigekahe nehano?” huno eteno havige. 35 Havigegeno Pailatia kenonaa mage huno havige “Nagaya Yuta kano mainogeka nehano? Kagai nofi vayaene ala mono note kava vayaene kavaleya nagaite neaya yafena kagaya na havi kava hu-mainane huna kahavi-negoe.” huno hie.

36 Higeno Yisasia kenonaa mage hie “Nagaya kava yagaisua kumala ma mopafina omalene. Inagi ma mopafima kava yagaisua kumaniama haneleasipa aliya vayanimoya kamea hageya nagaila navaleya Yuta vayamogami amayapina onataleasine. Inagi nagaya kava yagaisua kumania ma mopafina omalene.” huno hie. 37 Higeno Pailatia mage huno hie “Ala sauve kano mainoe huka nehano?” huno higeno Yisasia kenonaa mage hie “Kagaya nagaife ala sauve kano mainane hukama hana kea tamage nehane. Nagaya itanimoma natenelegatima emaineana ke-lamaage hu-falote hisua yafe ma mopafina emainogi ke-lamama haviya amakupi malenaya veamoya nagayama hua kea nehaviye.” huno hie. 38 Higeno Pailatia Yisasife mage hie “Ani ke-lamage kea naane ke?” huno nehuno Pailatia hati-lavino kumatega viayamo Yuta vayate mage huno mo hama-paiye “Kefo kavama hia yana ati ayegetoana omalene. 39 Tamakaya mukia yupa ala imuma kigahena naha-vigagena nago kanoa kina nopitila afaa avalena nelamamuanagi na yafe nelamahaiye Yuta veamogatamina sauve kanotamia afaa atalesugeno visio?” huno hama-vige. 40 Hama-vigegeya ala kefiti mage huya hae “Agaila neataleka Palapasina tamisane.” huya hu-mainae. Palapasia vaya nehamaeno musufa yamaage hume hume nehaiya kano mainea kanohe hu-mainae.