1 Nagaya Yonina agogeno nago ensole kanoa ikapinagati elavi-maine. Ani kanomo ayapina ayola omale komule ki nofiene ayaaya seni nofiene hanegeno elavi-maine. 2-3 Elaviaamo ani osifavea metafa humaine. Ani osifavea ehe kanafima mainea osifavea kame kanotigino agia Satanie. Ani Satanina metafa huno tokiyaage seni nofila kiteteno anima ayoma omale komufina asaga huno vai-taleteno avaya tileno tokiyaage hutegeno Satania vani tausenia (1,000) kafu ani komufina nofipi maineanagino ani kanafina veamogamina havigea aye mavataga ohugahianagino vani tausenia (1,000) kafuma hano hutesigenoa ani komufitila atalesigeno aupa kana kanoafi ute ete hugahie.

4 Anile nagaya agoana nagoa veala ala sauve vayamogami siale mainageno Anumaya Kotia kaiyekema humateya ali fako hu-matesaya aliyamo tokiya amamine. Ani veamoya Yisasina amakua amiteya agai kene Anumaya Koti kene hamapai-mainaya yatetima amakeya hataga hageya falimainaya veamogami amamena age-mainoe. Ani amamema agoa veamoya kefo afai afuene talo hu-malenaya ameene agiene alisaga ohuya kefo afai afumo agienema hamanileene amayateenema omalene. Omalea veamoya eteya hamaimula aliteya ala kava veane maineya Kalaisiene vani tausenia (1,000) kafua kava yagaiya maigahae. 5 Ani veanema heti-mainaya kana hagote-lamateya fali-mainaya veala hetisaya kana hane. Haneanagi nagoama fali-mainaya veamoya ani kanafina heotigahagi vani tausenia (1,000) kafumoa hano hu-tesigeya hetigahae. 6 Anima hagoteya hetisaya veala Anumaya Kotina alu aotage veanea mainayanagiya tusi muse hugahae. Anumaya Kotia tegelege nehia atafina amatesigeya nagoene eteya tole molia kanalela ofaligahae. Ofaligahayanagiya Anumaya Kotigani Kalaisigani anakia alisaga nehuya aliya veaani maineya vani tausenia (1,000) kafua Kalaisiene sauve kava maigahae.

7 Haenagaa vani tausenia (1,000) kafumoa hanoma nehigenoa Satanina nofima hutenea nopitila atalesigeno ehaigahie. 8 Hati-lavino visiaamo mukia mopaene mopaene mainaya veamo-gami amakia Kogi nofi veanene Magogi nofi veanene Satania havige huno aye-mavataga hisiaamo “Melitalu hutama tu hiho.” huno amavaleno melitalu hu-matesigeya ani veamogami napamoa ti kahaepa kana hu-maineanagiya huyo okigahae. 9 Ani veamoya mukia kotega vai neayeya Anumaya Kotina amakua aminaya veamogami kumala, Anumaya Kotia muse nehia ala kumamona meli kagiya amavayagigahayanagi ikapinagati atamoa elavisiaamo ani veamogamina tesagali hano hugahie. 10 Hano hinageno Anumaya Kotia Satanina, havigema aye mavataga humainea kanomona, ata neleno himanaage nehia yafayagama tegelege nehia komufina asaga huno vaigahie. Ani komufina kefo afai afuene havigema nehia aune kanoene mainaa komufinagino ani lagufa (3) vayala anifinaga maineya kegeene felugaene mukia kanafina agola amagata aige aige hisia yamoa hanetafa huno hanemategahie.

11 Anile nagaya Yonina himonafi kana yapi agoana ala efeage ala Sauve kanomo sia hanegeno ani siale mainea kanoa age-mainoe. Agogeno mopamoene ikamoenena agai aulela faleana fanane huana nagoene omaletafa humainae. 12 Nagaya fali-mainaya veama agoana amaki hanea veanene, amakima omale veanene, ala Sauve kanomo aule heti-mainageno ensole vayamoya avoyaga ali vakaye-mainae. Nago avona, maige maige hisaya hamaimuma hanea veamogami amakima hanea avoene vakayeya ani avopina agoma humainaya auava kavaamimo kema kae-malenaya keleti fali-mainaya veala Sauve kanomo siale maiya kanomoa kaiyekeamia fako humatene. 13 Hage lipima fali-mainaya veala ani limoa amatalegeya uvayi huya mo heti-mainageya fali yamoene fali-mainaya veamoya nevaya kotegaene anakaipima mainaya veamogamina amatalaageya eteya hetigeno Anumaya Kotia humainaya auava yateti kaiyekeamia fako humatene. 14-15 Kaiyekea humateteno mukia veamogami amakimoa maige maige hisaya hamaimuma hanea veamogami amaki hanea avopima amakima okaenesaya veala Anumaya Kotia atama tegelege nehia komufi amavaleno hagayu huma-talegahie. Fali yaene fali veamoya unemaiya koene ata tegelege nehia komufi anasaga huno vai-talesigeana hano hutafa hugae. Ani atama nelea komufima visayana tole (2) yupa eteya faligahae.