1-2 Nagaya anile havugeno kasagoya ikapinaga mainaya veamoya ala kegefafiti mage huya hae “Tagaya Anumaya Koti agia alisaga hisune. Anumaya Kotia kaiyekema humategahena kanaleya huno kelamage keleti fatago huno kaiyekea hu neamateno ani kumai amona tokiyaama hanegeno mukia ma mopafi veafena ‘Kefo yama hiho.’ huno ali haviya hu neamatea yatetila Anumaya Kotia ani kefo yamo anonaa ago amine. Ani kumai amoa Anumaya Koti aliya veala hamaeno falimateneanagino ani yateti Anumaya Kotia kefo yamaamo anonaa ago amine. Amineanagita Anumaya Koti agia alisaga hisune. Anumaya Kotitimoa agaiage tokiyaage hale yamo aepa maineanagino tagu tamena ago aligati-maineanagita agia alisaga nehune.”

3 Eteya ala kegefaleti nagoene mage huya hae “Tagaya Anumaya Koti agia alisaga hisune. Ani kumala atama leno asagali-talia yapiti halinamoa agola haige haige huno nehaiya yafe Anumaya Koti agia alisaga hisune.” huya humainae. 4 Nehageya tueti foa (24) kava vayamoyaene foa (4) hamaimuene anagamoyaenena ala sauve kanomo siale mainea Anumaya Kotite asaga hulaviya amakoya yemaineya agia alisaga nehuya mage hae “Tamagelafa huya nehayanagita Anumaya Koti agia alisaga hisune.” huya humainae. 5 Nehageno ala sauve kanomo sialeti nago kemoa falote huno mage hie “Tamakaya Anumaya Koti aliya nealitama aiyafinagama mainaya veamogatamaene afa veanene tamakima hanea veanenena Anumaya Koti agi alisaga hiho.” huno humaine.

6 Anile nago kea havuana kasagoya veamoya alitalu huya maineya ailalupeya haya kemoa, timoma anama nelavino agema neaiya avamete nehuya, monagemoma nehia avamete huya ala kegefafiti mage huya hae “Anumaya Koti agia alisaga hisune. Anumaya Kotiti mukia tokiyaa hanegeno kasagoya kava veamogamina amakaseno agaiage ala kava kano maineanagita agia alisaga hisune. 7 Sipi sipi nafanemoa ama alisia kanamoa ago falote higeno alisia amoa ago talo tala huno maineafe tagaya tusia muse nehuta taipa kanale yapiti yagamea huta Anumaya Kotina tokiyaage hale yamaa hanea agia alisaga hisune. 8 Anumaya Kotia oniya ohuno efeage humainea kena ani amona amigeno fai-line.” huya humainae. Ani kenahema hiana Yisasina amakuama amitafa huteya alu aotage veanema fatago huya nemaiya veamogami auavafe humaine.

9 Anile ensole kanomoa Yisasina amakua aminaya veafena mage huno nahapaiye “Kagaya mani kea avopi kao. ‘Sipi sipi nafanemoa ama alisia imua ago kimalegeno ‘Eho huno ke humalenagiya esaya veamoya tusia muse hisae.’ Mani kea Anumaya Koti kelamage kea hugeka nehavine.” huno humaine. 10 Higena nagaya ani ensole kanomo agia alisaga hugahe aiyafi asaga hulavina nagoya yemaugeno “Aaogi kagaya naa ohuo. Nagaya kagaiene kafu-kaganayaenena, Yisasi kema havitama atafa hu-linetama huhaletama nehaya veamogatamaene nagoke aliya nealuna kano mainogi nagai nagia alisaga ohuganagi Anumaya Koti agiage alisaga huo. Yisasima humainea kemoa Anumaya Koti kema huhaleya hisaya tokiya veamogami amamine.” huno nahapai-maine.

11 Ikamoa aihagalo higena agogeno nagola efeage hosimoa mainegena age-mainoe. Ani hosimo agupifima maiya kanomo agimoa maa humaine “Efi efi huno kanale aliya nealia kanoe. Kelamage kegeya nehia kanoe.” huya agia aye-mainae. Ani kanomoa fatago huno kaiyekea humateno nagoa veamoyaenema tuma hisiana fatago yateti huno tua nehie. 12 Aulagamoa atamo kani kana huno aiha nelegeno anutela ala Sauve vayamogami tumano kuyaga kasagoya vai-linegeno augafalela nago agia kae-malegeno ani agia agaiage havilinea agi haneanagiya mukia veamoya ani agia ohavinae. 13 Agaiama fai-linea kolamoa ayaaya kenaale tusiya hu-mainegeno Anumaya Koti aepama hugafino humainea yafe agima ayayana “Anumaya Kotina keae.” huya agia ayemainae. 14 Ikapinaga ati vayamoya efe hosiyagamo agupifi maiteya kanaleya huno efeage huteno oniya ohu kena, faili faili huya akavela umainae. 15 Nevageno mukia ma mopafi veanema hamaesia avenene humainea naepea avayafina aniline. Ani-lineanagino amakaseno hagote Sauve kano maineno tokiyaage huno mukia veamogamina kava humategahie. Humateneno veamoya nofi alagayaga amaiyaletima aye lata-pageno timaamoma nelavia avamete kava huno ani kanomoa tusia tokiyaama hanea Anumaya Kotia haima vai neamatea kame vayaa kefo yamo anonaamia amamigahie. 16 Neamamino kenaaleene aiya amoteenema kae-malenea agimoa maa humaine “Ala Sauve vayamogamina ala Sauve kanoamie. Ala kava veamogamina ala kavaami mainea kanoe.” huno agia kae-malene.

17 Kae-malenegena neagogeno nago ensole kanomoa yagemo aufi hetino mukia ikamo amunote haleya vai-yayea namayagahena mage huno hie “Tamakaya Anumaya Kotia ala kavema taloma humalea kavetela melitalu hiho. 18 Melitalu hutama fali-mainaya Sauve veanene ati veate kava veanene mai-lokiya vaiya nemaiya veanene hosi afuyagaene ani hosimo agupifi nemaiya vayaene, nofipi maineya miya oali aliya nealiya veanene afaa mainaya veanene, ala amakiene veanene, osi amakima hanea veanene mukia falisagetama amakaila amaugafamo amamela negahae.” huno humaine.

19 Higena nagaya agoana ani kefo afai afuene ma mopafi Sauve vayaene ati vayaamienena efe hosimo agupifima maiya kanoene ati vayaaene tu hugahe melitalu humainae. 20 Naa hayanagi anima efe hosimo agupifima maiya kanomoa kefo afai afuene havigegeyama nehia aune kanoene alino nofi hunatene. Ani kefo afai afumoa hapaigeno ani havigegeyama nehia aune kanomoa tokiyaage avame yana humaine. Nehuno anima tokiyaage avame-name yama humainea yateti amaugafalela kefo afai afumo agia kae-malenageya kefo afai afumona amemaamo agima alisaga nehaya veanena havige aye mavataga humaine. Anima aye mavatagama humainea kefo afai afuene havi aunema laga humainea kanoene hanaegeana ofalinaagi afaa hanaimula hanegeya anavaleya tusia komugefa himanaage yafayagama hanegeno atama tegelege nehia komufi anasaga huno vai-talenae. 21 Vai-taleteno efe hosimo agupifima maiya kanomoa mukiama melitalu humainaya ati vayamogamina ayaaya naipea avayafina ani-lineanagino ani naipeleti hamaegeya fali-mainae. Faligeya mukia namayagamoya ani veamogami amaugafa aye laga-feya nageno tusiya huno amamupa-napa ayemaine.