1 Haenagaa Yisasia tipi kalefi uno Kalili li kotuna takaeno umaine. Ani li kotumona nago agia Taipiliasie. 2 Mukia veamoya kaliamima alino kanale hu-ma-teno tokiya avame yama higeyama agaya yafe akave umainae. 3 Vageno Yisasiene agaiaenema tokaeya nemaiya anagaaene agoyale haiya mopale mainae. 4 Yuta vayamoya Anumaya Kotima amakinagomogami amaugafama ali-gati-mainea yafe amakesa havisaya imu kisaya kanaa ago aupa hu-maine.

5 Yisasia ageno ataleno ageana mukia veamoya agaitega neageno amaketeno Filipife mage hie “Hanateti ani veamoyama nesaya kavela miya hugahune?” huno hie. 6 Yisasia Filipina ayevataga huno mani kea nehuno agayama hugahema hia yana ago havimaineno hu-maine.

7 Filipia mage hie “Nago kanomoa tu hataletia (200) kanale aliyana aliteno miya alino ani monea ataleno kavema miya hisiana ma mukia veakefafina osi osi huya kavela alite alite hugahae.” huno hie. 8-9 Higeno nago kanoa agaiaenema tokaeya nemaiya anagaamogamipitila, Saimoni Pitana aganaamoa Etalua, mage huno hie “Nago nafanemoa faefua (5) mayagi tole noyamegi huno ali-lino maine. Veakefamo alino ala higeno mani kavela osi kanoa haneanagi hanaa huno taya hisie?” huno hie. 10 Higeno Yisasia agaiaenema tokaeya nemaiya anagaamofe mage hie “Mukia veakefa ‘Mopale maiho.’ hutama hama-paiho.” huno hama-paiye. Ani kumala mukia apeage hanea kumalagiya mukia veakefa mopale mainae. Ani veala faefu tausenia (5,000) venene mainae.

11 Yisasia ani maya alino Anumaya Kotitega muse huno havigeteno mukia mopale mainaya veamogamina fako huno amamite amamite hu-maine. Noyamene ani kava higeno mukia veamoya ani kavela nageno amamu hu-maine. 12 Nemamu hu-male-tageno Yisasia agaiaenema tokaeya nemaiya anagaamofena mage hie “Mukia atupa-tapa kavela alitalu hu-tama maleho. Nagoa osi osi atupa vitali vitali ohiho.” 13 Amakaya mukia veala faefua (5) maya kanoafiti neteya atalaya atupayaga alitalu huya tuelufua (12) kula ai-havate-mainae.

14 Anifima mainaya veakefamoya Yisasima hu-mainea tokiya avame yana ageteya mage hae “Tamage huno Anumaya Kotina aune kanoa hu-tesigeno ma mopafima egahiema huno hu-mainea kanoa mama ago emaine.” huya hae. 15 Hageno Yisasia vayamoyama hisaya kavala aguafinaga mage huno havimaine “Mani vayamoya nagaila sauveami maisua yafe navalegahe nehae.” huno nehuno neamataleno agaiage agoyafi hai-maine.

16-17 Yagemoa lavi-falegeno une avamemaa agaiaenema tokaeya nemaiya anagaamoya ala ti agegayalega uteya tipi kalefi asaga hu-maiya Kapaneamu vayana Yisasia amakaienena oune. Ovigeya yaufa uge uge huya nevageno hani ki-ma-tene. 18 Ala yasigefamoa eno tina melino mo ai-yahae me ai-yahae huno tusiya hu-maine. 19 Tusiya higeya tipi kalefima mainaya vayamoya yosaleti vailagai-liya vayana nagoa ayaayaa sikisia (6) kilomita ti kotumona amunopi neuya agayana Yisasia ti avoyale aiya ayeme ayeme tipi kalema hanelega neegeya ageteya tusiya huya kolia hu-mainae.

20 Koli nehageno Yisasia mage huno hama-paiye “Kolia ohiho mamona nagayae.” huno hama-nepaiye. 21 Hama-paigeya vayamoya Yisasina tipi kalefi haisaga hu-maisia yafe muse nehuya tipiti avalesaga nehae. Ani tipi kalemoa visaya kumatela aupaa uvayi hu-maine.

22 Faeteya kotigeya tikotumona atu kaiyaga mainaya veamoya ageteya mage hae “Nagoke tipi kaleage hanegeta age-mainone. Yisasienema tokaeya nemaiya anagaage ani lipi kalefi vayanagi Yisasia ounegi ani vayala amakaiamige umainae.” huya hae. 23 Ani kumala Yisasia Anumayamotega nunamu huno muse huteno kavela amamigeya ne-mainaya kumate nagoa lipi kaleyaga Taipiliasi kumateti anile neae. 24 Neeya mukia veamoya megayana Yisasienema tokaeya nemaiya anagaene omainageya megeteya tipi kalefi asaga hu-maiya Kapaneamu Yisasife mo atiye-mainae.

25 Atiyeme valegati atu kaiyaga umaineya Yisasina mogeteya mage hae “Hulave-nelina kanomoga na yu ma kumala meli-mainane?” huya havinegae. 26 Havigageno Yisasia mage hie “Nagaya tamagelafa huna tamaha-nepauve tamakaya kavema tamamugetama nageno tamamuma hu-mainea yafe natia neayayanagi nagaila tokiya avame yama hugetama age-mainaya yafena natia noayae. 27 Tamakaya kasalisia kavefena maitama ati oayeho. Maige maigema hisaya kavefeke maitama atiyeho. Nagaya Nenafaa, Anumaya Koti hu-na-tenea kanomona ikapinagati emainoa kanoa vayamo natenea kanomona mani kavela tamamigahue.” huno hie.

28 Higeya mage huya havinegae “Tagaya hanaa huta Anumaya Koti aliyana alisune?” huya havinegae. 29 Hageno Yisasia mage hie “Mani aliyana Anumaya Kotia muse nehia aliyane. Agayama hu-tegeno emainea nafanemofe tamakupi maletama tamametiti hisaya yafe muse nehie.” huno hie. 30 Higeya mukia veamoya mage hae “Hana augafa tokiya avame yana tave-lisanageta ageteta tagupina maleta tametiti hisune? 31 Nayona taginagomoya vaya omai kotega maineya nago kavela agia manae nehaya kave ne-mainayane huno kae-maleneane

32 Hageno Yisasia mage hie “Nagaya tamage-lafa huna tamaha-nepauve ikapinagati elavi-mainea maya Mosesea agaia oamaminegi Nenafaa ikapinagati tama maya menia nelamamie. 33 Anumaya Kotima tamamia mayamoa maa hu-maine nago kanoa ikapinagati ea maya mainea yafe ma mopale mainaya veala hamaimula amamine.” huno hie.

34 Higeya mage huya hae “Ala kanomogae mukia kanalela ani maya tamige lamige huo.” huya hae. 35 Hageno Yisasia mage huno hama-nepaiye “Nagaya hamaimu amamisua maya mainoe. Nagaitegama esia veamoya nagoene amakala otegahae. Nagayama hu-lama-tesua yafe amakuafi maleya amametiti hisaya veamoya tifena oamakegahae.

36 Nagaya ago tamaha-paugetama nagaila ago nagemainayanagi nagaya hu-lama-tesua yafena tamakupina maletama tamametitia nohae. 37 Mukia Nenafama naminea veamoya nagaitega egahae. Nago kanomoma nagaitegama esigenahena ‘Eteka vuo.’ huna hu oategahue. 38 Hu-na-tenea kanomoma haisia kavama hisua yafe ikapinagatila hu-nategena emainoe. Nagainia nagesafiti kavala hugahe omenoe. 39 Hu-na-tenea kanomoma haisia kavama hisuana maa hu-maine naminea veanefitila nagoke kanoa fanane ohisagena ma mopama hanoma hisia kanafina mukia fali-mainesafiti ali he-ti-matesugeya agola maige maige hugahae. 40 Nenafaa maa yafe musena nehie mukia veamoya nafaneamona neageya agayama hu-matesia yafe havilama huya amakupi maleya amametiti hisayana agola maige maige yana aligahae. Alitesagena ma mopama hano hisia kanafina nagaya fali-mainesafitila ali he-ti-ma-tesugeya agola maige maige huya maigahae.” huno hu-maine.

41 Yisasima “Nagaya ikapinagati elavi-mainoa maya mainoe.” huno hu-mainea kehe Yuta veamoya Yisasifena ke vaiya kasagoya ke hu-tenae. 42 Mage huya nehae “Ma kanoa Yisasia, Yosefe nafanefi? Nefaene itaamoene ago age-mainone. Naa higeno menia ‘Ikapinagati elavi-mainoa kano mainoe.’ huno nehie.” huya hae.

43 Hageno Yisasia kenonaamia mage huno hie “Tamakaya tamakaitamifima kasagoya kema hatagaya kea ataleho. 44 Nago kanomoa nagaitega agaia nomegi hu-na-tenea Nenafa avayu hinageno nagaitega enagena nagaya ma mopama hano hisia kanafina fali-mainesifiti ali he-ti-tesugeno haimula aligahie.

45 Anumaya Koti aune vayamoya mage huya kae-malenayane

47 Tamage-lafa huna tamaha-nepauve nagaifema haviya amakupi maleya amametiti hu-mainaya veamoya agola maige maige hisaya hamaimula ago ali-mainae. 48 Nagaya nagainia hamaimu amamisua maya mainoe. 49 Ani tamakinagomoya vaya omai kotega maineya nago kavemo agia manae huya nahaya kave ne-mainayanagi ago fali-mainae. 50 Fali-mainayanagi maa augafa ikapinagati elavia maya nesaya veamoya ofaligahae. 51 Nagaya Ikapinagati elavi-mainea maya mainoe. Ani mayamona haimua hane. Nagoa veamoya mani mayama nesayana agola maige maige hugahae. Ani maya nagainia naugafae. Ma mopalema mainaya veala agola maige maige hisaya yafe naugafa ataletena faligahue.” huno hie.

52 Higeya Yuta vayamoya mani kehena ke vaiya mage huya hae “Mani kanomoa hanaa huno augafaa taminegeta nesuna yafe nehie?” huya hu-mainae. 53 Nageno Yisasia mage hie “Nagaya tamage-lafa huna tamaha-nepauve tamakayama ikapinagati emainoa kano vayamo na-tenea nafanemoni naugafaene kolaniaenema onesayana maige maige hisaya tamahaimula tamakupina omalegahie. 54 Nagoa veamoya naugafaene kolaniaenema nesayana agola maige maige hisaya hamaimula ago ali-mainayanagina ma mopama hano hisia kanafina fali-mainesafitila ali he-ti-ma-tegahue. 55 Nagai naugafa, kave tama hane. Kolaniaenena tama li hane. 56 Nagoa veamoya naugafaene kolaniaenema nesayana nagai nagupi mainagena nagaya ania huna amakai amakupina mainoe. 57 Nenafaa haimuaene kanomoa hu-nateneanagino nahaimula namigena mainoe. Nagoa veamoya nagai naugafama nesayana nagai tokiyafiti hamaimula aliteya maigahae. 58 Ikapinagati elavi-mainea maya maa augafa maya hane. Yuta vayamogami amakinagomoya ne-mainaya maya kana ohune. Ani maya neteya ago fali-mainayanagi nagoa veamoya ikapinagati elavi-mainea mayama nesayana agola maige maige hugahae.” huno hie. 59 Yisasia mani kea Kapaneamu mono nopi huno hama-pai-mainea ke.

60 Mukia akavema nevaya veamoya ani kea haviteya mage huya hae “Manima hu-mave-lia kemoa tusia kana nelahaiye. Hana kanomo mani kea haviteno akave malesia amukoa hane?” huya hae. 61 Hageno Yisasia ani kehena akavema nevaya veamoya kasagoya kema haya kea ago aguafinaga haviteno mage huno hie “Mani kemoa otamahaifi? Natalesaya tamakesa nehavifio?” huno hamavi-nege. 62 Nagayama, ikapinagati emainoa kanoa vayamo natenea kanomona, etenama hagotena nemauva kumatema visugetama nagesayana hanaa hugahae? 63 Anumaya Koti Avamumoa maige maige hisaya tamahaimula nelamianagi tamakai tamaugafamoa nagola kanale yana notamamie. Nagaya Anumaya Koti Avamumoa naminea ke tamaha-pai-mainoe. Ani kemoa maige maige hisaya tamahaimula nelamamie. 64 Mani kea tamaha-pai-mainoanagi “Nagoamogatama ani kehena tamakupina alitama nomalae.” huno nehuno nayoma aepa he-mainea kanafina Yisasia amakupi maleya amametiti ohisaya veaene agaiama agesi huno kame ya hu-tesia kanoene ago haviline. 65 Yisasia nagoene mage hie “Ani yafe mage huna tamaha-pai-mainoane nagoke veala amakaiamia nagaitega omegahagi Nenafa esaya amaku amakesa amamisigeya nagaitega egahae.” huno hie.

66 Mani kema higeya kasagoya akavema umainaya veala eteya mai-yahae huya ataleya umaineya nagoene agaienena me vai-oayenae. 67 Yisasia tuelufua (12) anagaamogamife mage huno hamavi-nege “Tamakaya ania hutama nagaila natalegahao?” huno hamavi-nege. 68 Hamavi-gegeno Saimoni Pitaa kenonaa mage hie “Anumayamoga hana kanomote visune? Kagai kemoa maige maige hisuna tahaimula nelamie. 69 Tagaya ago havilinone kagaya alu aotage kavaage kanoa Anumaya Kotia hu-gategeka emainananagita kagaifena tagaya tagupi maleta tametitia ago hu-mainone.” huno hie.

70 Higeno Yisasia mage hie “Tamakaya tuelufua (12) anaganimogatamina nagaya ago hapali-lama-tenoamagi tamakaipina nago kanomoga Kefo Avamuene mainane.” huno hie. 71 Mani kema hiana Yutasife hu-maine. Yutasia Saimoni Isakaliotina nafaneamoe. Tuelufua (12) anagapiti Yisasina agesi huno kame ya hu-tesia kanohe hu-maine.