1 Haenagaa Yuta veamoya ala imu Yelusalemu negiya kana falote higeno Yisasia anilega hai-maine. 2 Yelusalemu kegiyafi nago fiana sipi sipi afuyagamo fiana hane. Ani fiama hanelela ti kotuna male-maine. Ani li kotumo agia Yuta vayamogami kefina Petesaitae. Ani kotutela faefua (5) fugagieta nona hane. 3-4 Mukia kali veala aulaga asu hu-mai anagaene aiya avayu hu-mainea anagaene aiyaaya api hu-mai anagaene ani fugagieta noyagafi alitalu huya fae-mainae.

5 Nago anile nemaiya kanomona kaliamoa teti eitia (38) kafu hu-maine. 6 Yisasia anima faeno mainea kanoa mogeteno “Mani kanoa ayaaya kana kalia alino maine.” huno huteno mage hie “Kalikamoma hanoma hisia yafena muse nehapio?” huno havige-maine. 7 Havigegeno kali kanomoa Yisasife mage hie “Humave-nelina kanomoga tima aikalafuma nehia kanalema naya huno navaleno tipi natesia vayala omaiya yafe nagainige oanagi nagaila ago nagaseya tipi aupaa nevae.” huno hie. 8 Higeno Yisasia mage hie “Hetika fae omanakaa nealika ka vuo.” huno hu-maine. 9 Higeno aupaa kaliamoa kanale hu-tegeno hetino fae omanaa nealino ka umaine. Kanalema hu-tenea kana Sapati kanalele.

10 Ani yafe Yuta vayamoya kaliama hano hutea kanomofe mage hae “Meni kana Sapati kanalele. Naa higeka faesana omanaka alika nevane? Tagaima kahegi kemoa Sapati kanalela ani kavala ohuo huno hu-maineane.” huya hae. 11 Hageno kenonaamia mage hie “Kalinia alino kanalema hu-na-tea kanomoa mage huno naha-pai-maine ‘Fae omanakaa nealika vuo.’ huno hu-na-tene.” huno hie 12 Higeya mage huya havigae “Mani kanoa hana kanomo kaha-paigeka faesana omanaka alika nevane?” huya hae. 13 Hayanagi mukia veama anile alitaluma hagenofena Yisasia aluale ago umainegeno anima kaliama hanoma hutea kanomoa mage hie “Oagoa kanomo ani kea hu-natene.” huno ha-mapaiye.

14 Haenagaa Yisasia kanale hu-tenea kanomona mono nopi mainegeno mogeteno mage hie “Kagaya ago menia kalikaa hano hu-ga-tegeka kanale huka mainanagi kefo kavala nagoene ohuo. Kefo kavama hisanana nagoa kana ya aligane.” huno hie. 15 Higeno mani kanomoa viayamo Yuta vayafena mage huno hama-paiye “Yisasia alino kanale hu-natenea kanoe.” huno nehie. 16 Hianagi Yisasima Sapati kanalema kaliama alino kanalema hu-tenea yafena Yuta vayamoya aepa heya amaipa kafa heteya Yisasina aliya haviya hu-neatae.

17 Yisasia mage huno hama-nepaiye “Nenafaa mukia kanalela aliyana nealigena nagaienena ania huna aliyana nealue.” huno hie. 18 Mani kehena Yisasia “Anumaya Kotia nagai Nenafae.” huno nehuno “Nagaya Anumaya Kotiene nago kana kana hutaa mainoe.” hunoma nehia kene Sapati kanale kahegi kema atagae-mainea yafeene Yuta vayamoya nagoene ke vaiteya “Haegahune.” huya hu-mainae.

19 Yisasia mage huno hie “Tamage-lafa huna tamaha-nepauve Nafaneamoa agaiage nagoke kavala nohianagi Nenafama nehia kavala age-maineafe ani kavala nehie. Nenafama nehia kavala Nafaneamoa ani kavala nehie. 20 Nenafaa Nafaneamofena aguafina nehaigeno agaima mukia nehia kavala ave-nelie. Ave-ligeno ala kavama ago hu-mainea kavala agaseno haenagaa tusia ala kavakefa ave-linegetama agetama atali atalu hugahae. 21 Nenafaa fali-mainea vayala ali he-ti-mateno hamaimua neamamianagino Nafaneamoa ania huno haiya veamogamina hamaimula neamamie.

22 Nenafaa nago kanomona fako hu noateanagi mukia veala fako hu-ma-tesia tokiya yana Nafaneamona ago amine. 23 Aminea yafe Nenafafema mukia veamoya agima alisaga hayana ania huya Nafaneamo agia alisaga hisae. Nagoa veamoya Nafaneamo agima alisaga ohisayana ania huya hu-tenea Nenafa agiene alisaga nohae.

24 Magi nagaya tamage-lafa huna tamaha-pauve nagoa veamoya kenia haviya hu-natenea kanomofe ‘Tamage nehie.’ huya amakupi maleya amametiti hisayana ani veamogamina agola maige maige hisaya hamaimula ago ali-mainae. Ani veala hagoteya fali-mai vaya kana huya mainafiti hetiya hamaimuamia ali-mainae. Haenagaa Anumaya Kotia kaiyekea hu oama-tegahie. 25 Tamage-lafa huna tamaha-nepauve nago kanamoma agoma falote hisiana amaku amamemaamoa fali-mainaya veamoya Anumaya Koti nafanemo ke haviteya akave malesayana he-tiya agola maigahae. Ani kana ago falote hu-maine. 26 Nenafana agaiafi haimumo aepa haneanagi ania huno Nafaneamofena ‘Hamaimumona aepaa maiyo.’ huno hu-tene. 27 Nafaneamofena ikapinagati emainea kanoa vayamo atenea kanoginofe kaiyekema hu-ma-teno fako hu-ma-tesia tokiyaa amine. 28 Mani kehena atali ohiho. Nago kana falote hisiana mukia agoma faligeyama komufi he-vai-matenaya veamoya Yisasini nagea havigahae. 29 Haviteya ani komufinagati he-tiya hati-lavisageya kanale kava hu-mainesaya veanea hetiya agola maigahayanagi kefo kava hu-mainesaya veanea he-tisageno Anumaya Kotia kaiyekea hu-ma-teteno kina hu-ma-tenageya haviya hugahae.

30 Nagainige nago kavala nohuanagi Anumaya Kotia nahapai-mainea keleti kea fako hu-neama-toe. Ani yafe fatago hulama huna kea fako hu-neama-toe. Nagainia nagesafiti ani kavala nohuanagi hu-na-tenea kanomoa agaia huo hea kavaage nehua yafe fatago hu-lama huna kea fako hu-neama-toe.” huno hie.

31-32 “Nagainigema hu-halena aepaanima tamaha-paisugenoa kenimoa haviya hugahianagi nago kanomoma nagaifema hu-haleno tamaha-nepaiyana nagaya ago havimainoe agayama nagaifema hia kea tamage nehie. 33 Tamakaya vayala hu-matageya Yonitega vageno Yonia nagaifena ke tamage tamaha-pai-maine. 34 Nagayama vayamoya nagaifema hu-mainaya kea ‘Afa ke nehae.’ huna huanagi tamakaya ani kea havisageno tamaugafa ali-gatisia yafe tamaha-nepauve. 35 Yonia kani kana huno maineno hanagaligenoma leana osi kanafi tamakaya agai kanimoma lea yafena musena hu-mainae. 36 Muse hu-mainayanagi nago tusia kanale yaaene nagai aepaene tamave-li-maine. Ani yana ali-mainoa aliyaniae. Nenafa naminea aliyama alina avaya-yesua yana Yonia nagaife hu-mainea kemo agase-mainegetama agetetama nagaifena havimainae. Ani aliyania Nenafa hu-na-tenea yafe tamave-li-maine. 37 Hu-na-tenea Nenafaa nagaifena ago tamaha-pai-maineanagi tamakaya agaila agea ohavitama agai aufina oagetama hu-mainae. 38 Hu-tenea kanomofena ‘Tamage nehane.’ hutama tamakupina maletama tamametiti nohaya yafe Anumaya Koti kea tamakupina alitama nomalae.

39-40 Anumaya Koti kea nayo kae-malenaya avopi hapalitama ati-yetama ago age-mainae. ‘Ani avopitila agola maige maige hisuna tahaimula aligahune.’ hutama tamakesa havimainae. Ani avona nagaife huya tamaha-pai-mainayanagi nagaitega esaya tamakesa nohaviye. Agola maige maige hisaya tamahaimula tamamisua yafena nagaitega nomae.

41-42 Veala muse hu-na-teyafene huna nohuanagi tamakaifena nagaya ago havimainoe. Tamakaya tamakuafina Anumaya Kotifena notama-haikena neagoe. 43 Nagaya Nenafa agile emainoanagi navaletama falu fala hutama nonatayanagi alu kanomoa agaia agile esigetama afaa avaletama ali falu fala hutegahae.

44 Tamakaya ‘Alu vayatimo alu vayatimoya muse hu-lateya ala tagi lamisae.’ hutama nehayanagi Anumaya Kotia agaiage mainegi alu Anumaya Kotia omaineanagitama Anumaya Kotia muse hu-lama-tesia yafena notamahaiye. Naa nehayanagi hanaa hutama nagaifena tamakupina maletama tamametitia hugahae? 45 Tamakaya nagaife ma ke hutama ohaviho ‘Nefate kaiyekea hu-la-tegahie.’ hutama tamakesa ohaviho. Aao, nagaya kaiyekea hu otama-tegahuanagino tamakayama taya hugahiema hutama nehaya kanomo, Mosesema tamaha-paiya kemoa kaiyekea hu-lama-tegahie.

46 Mosese kema havitama tamakupi maletama tamametitima haleasina nagai kene ania hutama tamametitia haleasine. Mosesea nagaife huno kae-maleneafe ania haleasine. 47 Tamakaya Mosesema kae-malenea kema havitama tamakupi maletama tamametitia ohunayanagitama hanaa hutama nagai ke havitama tamakupi maletama tamametiti hugahae?” huno hamavi-nege.