1-2 Sitivenima hayageno falia yafena Soloa “Kanale kava hae.” huno tusia muse humaineanagi nagoa veamoya Anumaya Koti kema nehaviya veamoya Sitivenifena tusia avi ateteya aliya mo hevaitetageya ani kanaleti aepa heya Yisasi kema haviya amakuama aminaya vayamogamina Yelusalemuma nemaiya veamogamina aliya haviya humatageya ani veamoya faleya Yutia kotegaene Samelia kotegaene ute ete hageya Aposolo vayala amakaiamige Yelusalemua mainae. 3 Mainageno Soloa Yisasi kema haviya amakupi malenaya veamogamina alino haviya humateno amakaiami noyagafi haino mukia veala amavaleno kina mo humatene.

4 Kinama humatageya nagoa umainaya veamoya alu kote kote faleya ute ete huya Yisasina kanale mono kea hamapai-mainae. 5 Filipia nagola Samelia hanea kumate tavino mage huno mo hamapaiye “Yisasina Anumaya Kotia taugafa aligatigahema hutenea kano emaine.” huno hamanepaiye. 6-7 Hamapaigeya mukia veamoya agai kea haviteya agaiama humainea tokiya avame yamoa Satani Avamuyaga veamogami amakupitila ala amake neaiya hatilaviya nevageno amaiya amaya avayu hulavi-mainea veanene amaiya haviya humainea veanene alino kanale humategeya ageteya nagoke amaku amakesa haviya kea aliya amakupi malenae. 8 Amakupi maleteya ani kumate veamoya tusia muse humainae.

9 Muse hayanagi ani kumatela nago kanomo agia Saimonie “Nagaya tusia ala kano mainoe.” huno tokiya avame yana higeya mukia Samelia veamoya ageteya tusia amamayo neaiyane. 10 Amamayoa aiteya ala amakima hanea veanene osi amakima hanea veanene agai kea haviteya mage huya humainae “Ma kanoa Anumaya Kotia ala tokiyaa aminea kanoe.” huya humainae. 11 Kasagoya yupa tokiya avame yama higeya agaya yafe tusia amamayo aigeya agai ke havimainae. 12 Haviyanagi Filipia anile evayi huno Anumaya Kotima kava yagaisia kanale kene “Yisasina Anumaya Kotia taugafa aligatigahema hutenea kano emaine.” hunoma hia kanale kene haviteya Yisasina amakua amitafa hageno veala tina falematene. 13 Saimonienena Yisasina agua amitafa higeno tina faletetegeno Filipiene vaineayegeno Filipia tokiya avame yana higeno ageteno tusia amayo aimaine.

14 “Samelia nemaiya veamoya Anumaya Koti kea haviya amakupi aliya malenae.” huya haya kea Yelusalemuma nemaiya Aposolo vayamoya haviteya Pitaene Yoniene hunatageana ani kumatela elavi-mainae. 15 Elaviteana Anumaya Kotima ani veamogamima Alu Aotage Avamuama amamisia yafe Anumayamotega havige-mainae. 16-17 Amakaya Yisasi agile ago tina falematayanagi Alu Aotage Avamumoa amakaitela eotavine. Eotavinea yafe Pitaene Yoniene anaya amaugafale avate hulinaageya Alu Aotage Avamula avale-mainae.

18-19 Aposolo kanolatamogania anayama nemalaageya Alu Aotage Avamula avalageno Saimonia ageteno mage huno hie “Mone lanamisugetana tokiya yana nagaila namisaagena naya malesugeno veamoya Alu Aotage Avamula avalesae.” huno hanavige.

20 Higeno Pitaa mage huno hapaiye “Kagaya Anumaya Kotia afaama neamamia yafema miya hugahue hukama kagesa havina yamoa monikaaene kagaikaaene Anumaya Kotia alino haviya hugatesie. 21 Anumaya Koti aulagafina kagai kagupina kanale ohunea yafe ani aliyana kagai yana omaletafa huno omalene. 22 Menima kefo kavama hana yafena kagua aiyahae huka Anumayamotega havigesanageno ani kagu kagesafima havi kagesama havina yakaa aigekateno kefo yakaa atalegatesie. 23 Nagaya kagupima agoana kaipamoa haviya humainea yafe atuage nehigeno kefo yakamoa nofi hugatene.” huno kenonaa hapaiye.

24 Higeno Saimonia mage huno hapaiye “Nehana yamoa nagai naugafalela falote ohisia yafe tanakaya nagaila nunamuna hunateo.” huno hanapai-maine.

25 Pitaene Yoniene Anumayamo ke hamapaiana mage huana hae “Taagaya Yisasina agetetaa agaifena taagupi malenoe.” huana hamapaiteana eteana Yelusalemu ugahe kategama vaana Samelia kola alu kumate kumate uana Yisasifena kanale mono kea hamapai-mainae.

26 Nago ensole kanomoa Filipifena mage huno me hapaiye “Hetika Yelusalemuti Kasa kumatema nevaya katega vuo.” huno hapaiyana ani kana kame kotega umainea kane. 27-28 Higeno Filipia hetino ani katega viayamo mogeana nagola anupa kanoa Itiopia kotega kava kanoe mukia ala sauve aala, Kanatesie huya agia neayaya amo, mone afenoyate kava neyagaiyane. Ani kanoa Anumaya Koti agi alisaga hugahe Yelusalemu uteno ani yupa eteno nomaalega ugahe hosi afumoma avayu huno nevia kalefi haino maineno Anumaya Kotina aune kanoamoa, Aisaiya, kae-malenea autamafi hapalime hapalime umaine. 29 Nevigeno Alu Aotage Avamumoa Filipife mage huno hapaiye “Kagaya ani kalefi mo haisaga humaika agaiene tokaeka vuo.” huno hapaiye. 30 Hapaigeno Filipia aiyayeno avate neuno mo haviana Aisaiyama kae-malenea autamafima hapalimema via kea mo haviteno mage huno hapaiye “Kagaya mani kemona aepaa havilama nehano?” huno havige. 31 Havigegeno ani kanomoa mage hie “Nago kanomoma naveotisiana hanaa huna havigahue?” huno huteno Filipifena “Nagaya mainole ehaika nagaiene emaiyo.” huno hapaiye.

32 Anima Anumaya Koti kema kae-malenea kema hapalia kemoa mage huno humaine

34 Hapaliteno ani kava kanomoa Filipife mage huno havige “Ani aune kanomoa tafe mani kea huno humaine? Agaiahe humainefi nago kanomofe mani kea humaine?” huno havige.

35 Havigegeno Filipia aepa heno mani kemo aepaa hapaiteno Yisasina kanale mono kea hapaimaine. 36 Hapaime hapaime katega neuana nago tite uvayi huteana ani kava kanomoa mage huno hapaiye “Tina ma hanegi ago kanale mani lina falenategano?” huno havige.

37 Havigegeno Filipia mage huno hapaiye “Mani kema havika kagupi malekama kametiti hisanana kanalelagina lina falegategahue.” huno higeno ani kanomoa mage hie “Nagaya Yisasi Kalaisia Anumaya Koti nafane maine. Tagai taugafa aligatigahe hutenea kano maine huna alina nagupi malena nametiti nehue.” huno humaine.

38 Nehuno hosi afumoma avayu nehia kalemo talaiva kanomofe “Male atafa huo.” huno higeana Filipiene ani kava kanoene tipi taviteana Filipia tina faletene. 39 Faletetegeana tipitima ehaiagenoa Alu Aotage Avamumoa aupaa Filipina avaleno vigeno ani kava kanomoa nagoene Filipina oageanagi katega tusia muse hume hume umaine. 40 Utegeno Filipia Asotasi evayi huteno Yisasina kanale mono kea mukia kumate veamogamina hamapaime hamapaime uno Sisalia uvayi humaine.