1 Ala mono note hagote kava kanomoa Sitivenifena mage huno havige “Mani kema hugataya kea tamage nehao?” huno havige. 2 Higeno Sitivenia mage huno humaine nenafagatamaene naganani-mogatamaene haviho. Taginagomoa Apalahamue yaufa Halani kotega ouno Mesopotemia kotega mainegeno tokiya hale yamaaene Anumaya Kotia Apalahamute efalote humaineane. 3 Efalote huteno mage huno hapaiye “Kagaika mopakaaene vayakamogamienena neamataleka kavelisua mopalega vuo.” huno humaineane. 4 Higeno Apalahamua anile Kalatia vayamogami mopa neataleno Halani kotega umaineno anilega nefaa falitegeno Anumaya Kotia eteno hutegeno tamakayama menima mainaya mopalela emaineane. 5 Emaineanagi Anumaya Kotia agaia atafa hisia mopa nago atupa kanoa ani mopa nagoke aiya malesia mopa oaminegi “Haenagaa kamigahue. Ani mopa atafa hulinesanageya kagaipiti falote hisaya nafaneyagamoya aligahae.” huno hianagi ani kanafina Apalahamua namo kano maineane. 6 Maineanagino Anumaya Kotia agaifena mage humaineane “Kagaikaa kaginagomoya Isaleli nofima omainaya vayamogami mopale visageya ani vayamoya amatafa huya ‘Aliyatia aliho.’ huya tusi yate ali haviya humatesageya ani mopalela fo hataletia (400) kafu maigahae. 7 Maigahayanagi amatafama huyama ‘Aliyatima aliho.’ huya humainaya vayamogamina nagaya kaiyeke humatetena alina haviya humatesugeya kagai kaginagomoya ani kotegatila eteya ma mopale emaineya nagai nagia alisaga hugahae.” huno humaineane. 8 Anumaya Kotia mage huno humaine “Nagai anagama maisaya yafe hagelafita maisuna kavala nafanekamogamina amakoya anoya taga huo.” huno higeno Apalahamua Aisakina nafanea ateteno napa eitia (8) kana maiteno agoya anoya taga humaineane. Haenagaa Aisakia nafanea Yekopuna ategeno Yekopua haenagaa tuelufua (12) nafaneyaga tagai taginagomogamina amatene. 9-10 Ani Yosefena nepuamoya Yosefefe tusia amaipa kafa heteteya avaleya alu vayamogami neamamiya mone aligeya Isipi kotega avaleya vayanagi Anumaya Kotia agaiene maineno kanama haiya yana alitaleno kanale agu agesa amigeno Isipi sauve kanoa, Felona, aulagale hetigeno Feloa muse huno “Hagote kava kano maineka nagai noyagaene mukia Isipi kotega kava yagaigane.” huno hutene. 11 Hutetegeno mainegeno Isipi kotegaene Kenani kotegaene nagola tusia kafu haya kana efalote higeya tototimogamina kaveamia omalegeya tusiya huno amakala lemainae. 12 Amakala legeno Yekopua “Isipi kotema kavela hanema.” huya haya kea haviteno nafaneyagaa hagoteno humategeya kavema hanelega umainae. 13 Haenagaa eteya anile vageno Yosefea “Nagayae tamakanatamimona mainoe.” huno higeno Feloa Yosefe afamofena havimaine. 14-15 Havitegeno Yosefea nefafena Yekopufeene mukia anagaa seveti faefua (75) anagaaene ke higeya Isipi kotega umainageno Yekopua anile faligeya nafaneyagaaene tototimoya fali-mainayane. 16 Faligeya eteya aliya Sekemu kumala, Apalahamua moneleti Hamolo nafaneyagamogami mopa miya higeno amigeno ali-mainea mopafi mo hevaitenae. 17-18 Anumaya Kotia Apalahamufema hulokiya vai-malenea kemoa fatago huno efalote hisia kanamoa aupa higeya tagai taginagomoya Isipi kumatela falote huya kasago humainageno alu sauve kanoa, Yosefefena oagenea kanomo, eteno sauvea alino humaineane. 19 Falote huno maineno tagai nofi vayala ayemavataga huno huhaviya huneamateno “Nafaneya-gatamia hamaesunageya faligahae.” huno tokiyaage ke humaineane. 20 Higeno ani kanafina Mosesena itaamoa atetegeno Anumaya Kotia hau-mainea nafanegino itaamogani nefagania talia (3) ikana noanifinaga kava huana ataageno mainae. 21 Kava huteteana kumate atenaageno Felo munamoa ani nafanea avaleno agaia nafane kana huno yagai-maine. 22 Yagaiteno avo nopi ategeno Isipi vayamoyama havilinaya yana Mosesena huve-ligeno aliteno tusiya huno tokiyaa haneteno kanale kea nehuno nehia kano maine. 23 Maineanagino fotia (40) kafu huteno mage hie “Isaleli vayanimogamina momakegahue.” huno agesa havimaine. 24 Haviteno mogeana nago Isipi kote kanomoa Isaleli kanomona aiko-neligeno Mosesea moli-neataleno anonaa ani Isipi kote kanoa haegeno fali-maine. 25 Faligeno Mosesea ma agesa havimaine “Vayanimoya mage huya hugahae ‘Anumaya Kotia Mosese ayapiti taugafa aligatigahie.’ huya hugahae.” huno agesa havianagi vayaamoya ani amakesa ohavinae. 26 Ohavigeno Mosesea faeteno mogeana tole Isaleli kanolatana tu nehaageno monaketeno moli-neanataleno mage huno hie “Nenafugatanae tanakaya nagoke konagalata mainaagi naa higetana tua nehae?” huno hie. 27 Higeno anima tuma aepa henoma aganaamoma aiko-lia kanomoa Mosesena ayetu-nefeno mage huno hie “Kagaila tagaite kava kano maika kaiyeke fatago hu kano maiyo kea ta kahapaigeka ania nehane? 28 Kagayama egama Isipi kanoma hayana kava huka nahaegahe nehano?” huno hie. 29 Higeno ani kema hia kehe Mosesea faleno Mitiani kotega mo maineno ala aliteteno maineno haenagaa tole ne nafanelata anatene. 30 Anilegama maiyana fotia (40) kafu maiteno Mosesea kame kotega Sainai agoyafi haino mainegeno nago osi yosalela ala ata anefela nelea yapiti nago ensole kanomoa evayi higeno age-maine. 31-32 Ageteno amayo neaino agelama hisue huno nehuno avate neegeno Anumayamoa anileti age aino mage huno hie “Nagaya kaginagomogamina Anumaya Kotiami mainoe. Apalahamuagi Aisakiagi Yekopugami Anumaya Kotiami mainoe.” huno higeno Mosesea atali talu huteno ani yama nagoene agesia yafena tusi koli huno oagene. 33 Koli nehigeno Anumayamoa mage huno hie “Mamona alu aotage mopa nagainia mopagika kaiya anona asagika maletekao. 34 Nagayama nagai nofi vayama Isipi nemaiya veanimoga-mina ali haviyama humataya kavala ago age-mainoe. Avima atayana ago havimainena amaugafa aligatigahe emainogi. Kagaya eno Isipi kotega hugategahue.” huno Mosesefena hapai-mainea ke huno Sitivenia hamapai-maine.

35 Mani Mosesefena nayona mage huya humainae “Kagaila kava kano maineka kaiyekea ali fatago hugane huya kea ta kahapaigeka ania nehane?” huya amakaveno hutenae. Anima amakaveno hutaya kanomona osi yosalema vayima humainea ensole kanomoa aya higeno Anumaya Kotia kava humateno amaugafama aligatisia yafe huteneane. 36 Hutegeno Mosesea Isipi kotega umaineno ani kotegati amavaleno fotia (40) kafu Isipi kumateene haesa titeene kame kotegaene kasagoya tokiya avame yayaga humaineane. 37 Ani Mosesea Isaleli veamogamife mage huno hamapai-maine “Anumaya Kotia tamakai vayapiti nagayama huaya huno aune laga hisia kanoa avaleno hetitegahie.” huno hamapai-maineane. 38 Ani Mosesea kame kotega maineno mono kema havigahema melitalu humainaya taginagomoyaene maiteno Sainai agoyafi haitegeno nago ensole kanomoa evayi huno Anumaya Kotina tahaimuma lamisia mono kea Mosesena hapaigeno Mosesea taginagomogamina hamapai-maineane.

39-40 Hamapai-mainegi taginagomoya “Mosese kea akave omalegahune.” huya amakaveno huteteya Isipi kotega eteya visaya amakesa nehaviya Elonife mage huya humainae “Kategama lavaleno visia yana Anumaya Kotitima maisia yana talo hulato. Mosesea, Isipi kotegatima lavalenoma emainea kanoa hanatepi vigeta noagone.” huya humainae. 41 Mani kea huteya nagola pulamakamo nafanea amayateti talo humaleteya “Anumaya Kotitia ma maine.” huya anima amayatetima talo humalaya yafena tusia muse huya afua heya kaeteya aliya mominae. 42 Ani kavama haya yafena Anumaya Kotia akaveno humateteno amatalegeya yagema kanefima ikama naa yama hanea yate “Anumayati mainae.” huya muse nehuya amakua amitafa huya ani yaayagamogami amaki alisaga humainaya yafe Anumaya Kotina aune vayamoya kae-malenaya autamafina mage huya humainae “Tamakaya Isaleli nofi veamogatama fotia (40) kafu kame kotega umainetama pulamakaene sipi sipiene hetama kae salamana humainayanagi nagaifena muse hutama mani kavala nehafi alu kanomofe musena nehae? 43 Tamaa omalenea Anumayamona agia Molekifena tusia muse hutama agai agi alisaga hisaya nona kitetama alitama utama tamaa omalenea Anumayamona agia Lefanifena tusia muse hutama kanefi kana yana talo hutama ani augafa yayagale musena hutama tamakula amitafa hutama amakia alisaga nehae. Naama haya yafe kame vayamoya humatesugetama kotamilegatila tamavaleya Papiloni kola agasetama ame kaiyaga umaigahae.” huno humaineane.

44 Taginagomoya kame kotegama mainagenoa Anumaya Kotia “Ma kava huka talo huo.” hunoma Mosesena huveli-mainea kavala huno mono nona kenaleti talo humaleteno kimalenegeno Anumaya Kotia ani nopi eno amakaiene me lokaeno kelamage kea hamapai-maineane. 45 Haenagaa Mosesea falitegeya taginagomoya ani yuguletima kimalenaya mono nona aliya Yosuaene Yuta vea omainaya veanene tua huteya mopaamia ali-mainae. Anumaya Kotia taginagomogami amaulagafima Isaleli nofima omainaya veamoya ani mopaletila amanatigeya ani yuguletima kimalenaya mono nona aliya ani mopafi eya me malageno anile hanegeno Tevitia falote humaineane. 46-47 Anumaya Kotia Tevitina kanaleya huno hamaegeno Tevitia mage humainene “Yekopu Anumaya Kotiga kanale nona kigatesue.” huno hianagi ani nona okinegi haenagaa nafaneamoa Solomoni ani nona kimaleneane. 48 Kianagi analema mainea Anumaya Kotia veamoya amayatetima kimalenaya nopina nomaiye. Naama humainea yafena nagola Anumaya Koti aune kanomoa mage huno humaineane

51 Tamakaya kea ohavi veane mainetama tamaku tamakesafinaga “Anumaya Koti kea ohavigahune.” hutama Alu Aotage Avamumona tamakaveno hutetetama tamakinagomoya nehaya kavaage nehae. 52 Tamakinagomoya mukia Anumaya Kotina amaune vayaamogamina ali haviya humatenae. “Kanale Fatago Kanoa egahie.” huya amaune vayamogamina tamakinagomoya ago hamayageya falimainayanagi tamakaya ani Kanale Fatago Kanomona ago agesi hutama hayageno fali-maine. 53 Ensole vayamoya ayaamoya kahegi kea ago tamahapaiyanagi tamakaya tamage hutama akavela nomalae. Mani kea Sitivenia huno humaine.

54 Higeya anilema mainaya veamoya Sitivenima hia kemona haviteya amaipamoa tusi amakata aiteno hamai-vaigeya amavaya mumu mama humainae. 55 Naa nehageno Sitiveni agupina Alu Aotage Avamumoa hiya higeno ikapinaga aulu heno ageana Anumaya Kotina tokiya hale yamaaene Yisasia Kotina tamaga ayatega heti-mainegeno age-maine. 56 Ageteno mage huno hie “Agegeho nagaya agoana ikamoa ago aihalegeno ikapinagati emainea kanoa vayamo atenea kanomoa Anumaya Kotina tamaga ayatega heti-mainegena nagaya neagoe.” huno hie.

57 Huno hianagi melitaluma humainaya veamoya agai kea ohavisaya yafe amayateti amakesa ailineleya ala kenake nehuya tusia ke nevaiya aiko-ligahe motafa humainae. 58 Motafa huya avayu huya kumategati malaga hagayu hutaleneya yafa kayoteti hagayu huya aiko-neliya “Fatago kava nehune” huya hisaya yafe siotaamia asagiya kava kanoa, Solo aiyafi mo-malenae. 59 Maleteya yafa kayoteti aiko-neligeno Sitivenia Anumayamotega havigeno mage huno hie “Anumayaniamoga Yisasigae nagu namemaa kagai kayapi nemaloe.” huno hu-maine. 60 Mani kea nehuno aleya ayeno ala kegefafiti Anumayamotega mage huno hie “Anumayamogae mama kefo kavama nehaya yaamimona anonaamia hu-oama-to.” huno nehuno anile fali-maine.