1 He"a Apu Dios di mi'alig hi mumpastol i da'min holag Joseph an tinanud Israel an alyom hi wa'ahnan inumbun hinan tronom hinan numbattanan nadan Kerubim ya daan mo ta ipatigom nan ongal an abalinam

2 ya nan anabaktum i da'min holag Epraim ya holag Manasseh ya holag Benjamin ta ipapto' da'mi.

3 Ya hanat wagahan da'mi ta mumbangngad nan a'atmi tuwali.

Ya hom'on da'mi ta ihwang da'mi.

4 He"an ongal di abalinanan Dios, ngalngalam bahan tatawwa on adi mabaoy bungotmun da'mi ta ingganah ad uwani ya adim donglon di dasalmi.

5 Ta pamaag tayya ya pi'pi"anmiy luwami te nunhiglay emi umukayungan.

6 Ta ngihngihilan da'mi ya pihpihullon da'mi hinadan nunhituh nunlini''odan tun boblemi.

7 Hanat wagahan da'mi nimpe ta mumbangngad nan a'atmi tuwali.

Ya hom'on da'mi ta ipapto' da'mi.

8 Da'mi din mi'alig hi himmangon greyp an inilpum hi ad Egypt.

Ot pa'aanom nadan numboblehtu ta paddungnay intanom da'mihtu.

9 Ya paddungnay ginabutam tun luta ya da'mi nan ni'aligan diyen greyp an itanommuhtu an nanginhahaping ot kumayabba ituwen boble.

10 Ta nihinap ami ituwen boble an nihipun hinadan billid hi nangappit hi muyyadna ta ingganah nadan billid an nungngadan hi Lebanon.

11 Ya nihipun boh nan baybay an nungngadan hi Mediterranean ta ingganah nan wangwang an nungngadan hi Euprates.

12 Mu tanganu on ad uwani Apu Dios ya dinadagmu nadan binattun alad tuwen boble ta kumpulnay hawwangon nadan umalin mangubat i da'mi on nun'aladan namin nadan nun'abalol ituwen boblemi?

13 Ta umatdah nadan atap an animal an nunhiglay nanadagda ituwen boble.

14 Ot he"a an ongal di abalinanan Dios an wah ad abunyan, uhdungam'e bahan hantudan ma'ma'at hinan paddungnay intanommun greyp an ni'aliganmi.

Daan mo bahan ta ihwang da'min tatagum.

15 Ta umali'a bahan ta ibaliw da'mi an paddungnay intanommu ituwen boble.

16 Te paddungnay nungkohatda nan greyp ot pu'ulanda.

Daan mo bahan ta ipatigom di bungotmu ta dadagom pibo dida.

17 Mu da'mi'en pinto'muh tatagum an gapuh boddangmu ya nundongol ami ni' ya hanat ipaphodmuy nitaguwanmi.

18 Ta adi da'a mo du'gon i da'mi.

Ot hanat boddangan da'min umunud i he"a ta wan he"a moy dayawonmi.

19 Ot he"a an ongal di abalinana ya hanat wagahan da'mi nimpe ta mumbangngad nan a'atmi tuwali.

Ya hanat hom'on da'mi ta ipapto' da'mi.