1 Apu Dios, hinggop nadan binuhulmu an nalpuh udum hi boble tun ad Jerusalem an ibilangmuh boblem ta nunhiglay ena nadadagan hi nangatda.

Ya nalgom di inatdahdih nan Templo ta nibilang moh nalugit hidiyen niyappit i he''a.

2 Ya awagillang nadan numpatedan ibbamin tatagum ta nun'a'an di hamuti ya nadan atap an animal di adolda.

3 Ya dimmuluy di daladah nan bobleh ad Jerusalem.

Ya ma''id ha e mangilubu' i dida.* 79:3 Ma"id ha e mangilubu' i dida te numbalindah balud nadan agge ni'yate.

4 Ta dildilahon da'mi on nginihngihilan da'mih nadan nunhituh nunlini''odanmi.

5 Ot undan ahan tatawwa ingganah ad uwani Apu Dios ya nunhiglan ay dumalang di bungotmun da'mi?

6 Daan mot hanadan wah udum hi boble an adi umunud ya adi mundayaw i he"a di pangipahdaam hi bungotmu.

7 Te aay an numpateda nadan ibbamin tatagum an tinanud Jacob ya dinadagda nan numboblayanmi.

8 Apu Dios, hanat adim bahan ibohol i da'mi nadan numbahulan handidan a'ammodmi.

Ta hom'on da'mi bahan te ma"id mahan mo tayya ha namnamami.

9 Boddangan da'mi bahan ta ihwang da'mi.

Ya pakawanon da'mih nadan numbahulanmi.

Ot i naen atom ya dayawon da'a hinadan tataguh udum hi boble.

10 Ta adida alyon di, Daan boy aton nan Dios da.

Ot agam bahan ta ipatigom i da'miy pangi'awitam hinadan ibbamin pinaten nadan binuhulmi.

11 Ya hanat donglom bahan di palak nadan ibbamin nibalud ta ihwangmu dida an gapuh nan ongal an abalinam te tuwen madatngan nan eda atayan.

12 Ya hanat mumpipituy pangiballohmu hi nama'bainan nadan binuhulmun he"a Apu Dios.

13 Ta wan da'min tatagum an paddungnay kalnerom ya dayawon da'ah ingga'inggana.