Mini Bayale Gigabi
Mbuga ogoha gilibu ngarunaga nemandi ogo
Isaraele wali agalime tinaga holene mo tiga bilo bi mana tumagi dendebi dewa lowialu mo mogo buwa mbuga ogoniha gilibu wini. Bi duniniore mbira gilibu ngago ogo
Mbirale bayuwa manda bule hame lariyagua ala Anduane Homogo ibu gibiore ka manda buwa ibu andaneha habe. (1.7)
Bi mbira piganegome lalu bayale holene mana ogoni wali agali waneiginirunaga mini bayale wulenebi manda bayale bulenebi lowini. Bi ogoni bayuwa mamage halu bayale hangu dabalu bulene wulebira. Lawai hagarume Isaraele wandari igiri daliahe hearuhondo mana lawai henego lo nga. Iname horo bibahendengi Anduane Homogonaga deni howa bialu holene mana lo nga. Isaraele wali agali lawai halu henerume wali agali mini gigabiwi karume biagabi mini nawi karume biagabi lawai halu henegonaga mana lo nga.
Mana maru lawai henego uru
Agalini onene waneiginiru heba holenebi wali agali maru heba holenebi biyinaya biabe bayale bulenebi mini haru holenebi mana lo nga. Bi maru ledagome inanenaga mini yaraga holene nawi lalu ina mo dindihaore halubi yagibano karu dara halu biamogo bulenebi wali agali maru nenege hinalu holenebi lowigi bida.
Bu̱lu̱ baga buwa kuni gilibu ngago (1.1–9.18)
Mini gigabi wulene iba gana ale lenego 10.1–29.27
Solomonohanda mini gigabiwi howa bi bayale tara tara lenego 30.1-33
Aguhanda bi bayale lenego 31.1-9
Lemuele ai̱yahanda bi bayale lenego 31.10-31
Agali oneme mana bayale bialu holenenaga iba gana ale lenego
1
Bi lo ngarume wali agali bibahende ta nabiore biamogo biaga nga
1 Mbuga ogoha bi bayaore lowigi bidago ogoni Debidi igini Isaraele wali agalinaga Kini Solomonohanda laga binigo lo nga.✡ 1 Kin 4.32
2 Bi baya gibiore lowigi bidarunime ina mitangi bulene bayaleore ngialu ina mana bayale bulene biawai haga nga. Ani bialu tígua mbirale bibahende bi lo ngarunaga tene handarimiyagua bi uruninaga irane bayuwa manda buleberami. 3 Mbuga ogoha bi baya lo ngarume tí wali agali miniwi howa mbirale bigi bialu halimulonaga lo nga. Ani bialu mana bayalebi tigabibi bialu wali agali bibahendehondo mana tigabi mbiraore ogobi dege dege bilimulo biawai haga nga. 4 Ani bialu bi ogonime wali agali maru manda emenebi karu ti manda bayuwa bilo biamogo bulebira. Ani bialu wandari igiri daliahe karubi ti mana bayale bialu helo walia haga. 5 Mbuga ogoha bi lo ngarume wali agali mini dingi dangiale karunaga minibi mo gigabiaore halu wali agali sigulu bini karumebi mbirale manda bayuwa buwa mana bayale bigi bilo biawai haga.✡ Min 9.9, 14.6, Aga 9.11 6 Mini giga bulene bi lo ngarunaga galone palia do karu bi yobage lowa lowigi bidago uruninaga galonego handa walia halu agali wahe miniwirume genda ngaria handaga bidago lamogo bibehe holebira.
Wandari igiri daliahehondo bi ledago ogo
7 Mbirale bayuwa manda bule hame lariyagua ala Anduane Homogo ibu gibiore ka manda buwa ibu andaneha habe. Wali agali mbirale bayuwa manda nabiaga mini nawi karume ti mini bayale gigabi holenego hame nale howa mbirale lo manda bua nahaga ka.✡ Yob 28.28, Iba 111.10, Min 9.10, 15.33
8 I̱naga igini-o í̠naga aba ai̱yalame bi langiragoore bayuwa hale halu mo wanahe laradagua bibe. 9 Í̠naga mandani yári baya bidegomebi í̠naga mani gurubu gele baya ngegomebi í̠naga dengui mo baya hagadagua í̠naga aba ai̱yalame bi larago hale halu mana bayale beregome í̠ mo baya holebira.
10 I̱naga igini-o mana ko biaga layagoli kagome í̠ ko bibelo ndole biyagua tigua bi larago hale halu bima laradagua buleni nabibe.✡ Man 13.8, Iba 50.18, Min 16.29 11 Tigua í̠hondo lalu, Wali agali mbira homelo bo wahami̱ya maíbu nabulenebe, lolebira. Harigani yu bira do howa wali agaliyaguabi mbira ibirago tanabi bami̱ya. Bo waholene irane nawiniyaguabi bame agali boanaga halu mbira bo wahami̱ya maibu, lolebira. 12 Homame abaleore ibalu wali agali bo yalu humbirini andaga piagadagua mbirali dinini liahe ibirago abaleore porabu ede howa bo wahalu mali̱ya maibu, lolebira. 13 Wali agali uruninaga mbirale tara tara bu yidaru gingila mialu yalu puwa ina andagani mo hombedo to̱lo tagiho ngelami̱ya. 14 Iname wali agalinaga pagepage bialu mima ibaga beremago bibahende mo yu ngoai howa inane talebu yu pugupugu beremagola pagepage bini degeme homogo hami̱yago í̠ maibu, lolebira.
15 I̱ igini-o pagebibi layagoli karume í̠hondo bi ogonidagua layagua tigua bi laragoni haleore holeni nahabe. Tigua bi larago hale nahe í̠ wahalu pobe.✡ Iba 1.1, 119.101, Min 4.14 16 Horo bibahendengi agali ko biaga uruni aleme ko tara tara bulenego hangu manda bialu ko bule hame timbuniore lo haga. Ti horo bibahendengi howa wali agali bo waholenego hangu manda bialu haga ka. 17-18 Ani biagago áyu agali uruni ti tini hai biragoni ale mo mulebira. Ti do wulenenaga gono tini wama ibaga biragoni holebira. Ega bedaru ti dehe miniwi beda. Agali mbirame ibu bole lowa danda edararia handayagua ega ibu biraabo nahe ibida polebira. Egame ani biagago áyu ai pagebibi layagoli hearuni ti ega ale ndoya. Ti mana ko bule hongo gibi howa bialu heagome ti do wialu homolenenaga gono tinime waga bialu heagoni. 19 Pagepage biagabi wali agali bo wahagabi agali ko anda andabi ogoni ale biagago lu naholebira. Pagepage biyadaruni ibuni homolenenaga kango tigi hene holebira.
Wali agali mini gigabiwi holene hadowa hararu ti genda timbuniore hondolebirago ogo
20 Agalime hariganibi magedinibi howa olagadagua mini bayale gigabi wuleneme wali agalihondo olalu ka.✡ Min 8.1-3 21 Tano timbuni ngagoha wali agali ubanda tagi biaga harabani howabi wali agali dewa mo ngoaiho haga ngarunaga howabi mini bayale gigabi wuleneme olowa agua lalu ka.
22 Wali agali mini nawi karu aibe. Tí mini nawi ogonibi dege haabo hole hame ledamibe. Tí wali agali lulu ale kamigoni. Tí manda bayale bulenego hame nale howa manda bayale tigabi bulenego mege bialu kamigoni. Mana ko o bialu kamigoni angi yu wahole kamibe.✡ Iba 1.1, Min 1.4, 1.32, 9.4, 22.3 23 Tí mana ko yu kamigoni wahalimulo i̱na tí talialu bi hongo howa loleberogo hale halimu. I̱na tíhondo mbirale agua bidaba lalu langialu i̱naga manda bulene bayaleru tí talebu nguleberogo tígua bayuwa hale halimu. 24 I̱na tí i̱ kogoria ibidaba lalu olalu haabo harugoyu tí hale hoa nahe harimi. Tí i̱ kogoria ibulenego manga harimi. 25 I̱na tíhondo agua bidaba lalu langirugo tí hale howa nahe tingi halu i̱na tí mo tiga buliya hame naleore harimigoni.✡ Iba 107.11, Min 15.10, Lg 7.30 26 Ani birimidago karulapego i̱na nde tígua birimidagua dege bulebero. Genda bulene tara tara tí kamigoria anda íbu ngagola genda timbuni yu kamingi i̱na tí hondo oba hagua. Tí genda timbuni yu kamingi i̱na tí lo guralu mege biagua. 27 Genda bulenego gibi hiriribiore dalu puyabula haru ibiradagua ibuwa tí bu dambi haragola tandaga nalu gendaore yu kamingi i̱na tí hondo obaore halu mege biagua. 28 Gendaore yu howa tígua i̱na biamogo bule íbu lalu mini gigabi wulene ololeberemigoyu i̱na hale halu tí biamogo nabuleorebero. Tígua i̱ hai bialu taya bume holeberemigoyu i̱ handa walia naholeberemi.✡ Iba 18.41, Ais 1.15, Mai 3.4, Seg 7.13 29 Tí mini bayale gigabi wulenego hame naleore halu Anduane Homogo andaneha howa giho halu ibugua laradagua hale halu bulenego mangaore haabo ho harimigoni. 30 Mbirale agua bidaba lalu i̱na tíhondo bi bayale langigi biruru tí hale holene hame naleore halu i̱na tí bayale halimulo mo tiga birugola tí hame nale i̱ erembira ngirimigoni. 31 Ani birimigonigo ai tíni mana ko bialu harimigonaga emena ko nolene winigo tíni noleberemi. 32 Wali agali mini nawi odahe karume i̱ mini bayale gigabi wulene kogo hame nalagaya. Hame nale howa tigua i̱ erembira ngiaganego mana ani biragome tini bo home lagane. Wali agali marume ti mbirale bibahende manda biaihe kama lo manda biaganego uruni ti lulu ale ka. Tininaga mitangi ogonibi bu kagome tini balu home lolebira. 33 Ani bulebiragoyu ai wali agali i̱na bi larogo baya hanguore hale halu bialu karu ti bayaleore holebira. Uruni tigua mbirale ko ngarubi gendabi ngarubi mbira ti kagoria naibu wulebira manda buwa ti genda mbira nayi gi nahe hada payabu baya holebira.✡ Iba 25.12-13, Min 3.24-26