Yaubada aba numisa
bei ina kanasíuna ana katótula iguinuwedi
9
(Roma 9:1—11:36)
Yaubada ina livala imalatomota:
Ina bodao mooitamoidi moe atótula goi
1  Guyau ina vakeda goi abóbwara moitamo. Geya apoleta geya unana Baloma Kimaasabaina nukotogu goi isanayato, e nukotoguyana geya isabutukoeta. Tauna guna bóbwara moitamo. 2 Abóbwara moitamo bego ategu goi guna nuwomou gagaina be nakae guna kategeda geya sikavaveta. 3 Neta itoboinegu, latuwogu segowo guna bodao Diyuu sakava ana dadava goi avaitedi bei Guyau sinumise. Bego atagonegu yau kidi adi katumapu bei Yaubada ina liuna ababane be nakae Guyau itavileiyegu, e bei tauyadi nakona dedevidi Guyau taiyao. 4 Segowoyadi Isileli tubunao yau nakae. Boi nimatu Yaubada tubumao ivanatunedi,†a Tat 4:22, 6:7; Atu 7:6. ina togaga ana káeyana sigite,†b Ibe 9:5. ikanasíuna tauyadi yaidi,†c Abv 17:2; Atu 4:13; Gui 3:25; Epe 2:12. ina Katukeda ivinidi,†d Tat 20:17; Sam 147:19. Vada Kimaasabaina ana paisewa ivinidi†e Ibe 9:1. be nakae ina katótula bogina ivinidi.†f Abv 12:1-3, 15:5,18-21, 17:1-8; Gui 13:32; Gal 3:16. 5 Tubumao koroto gagaidi maniyedi nakae maa yoidi. Tauyadi yaidi sakava ana dadava goi Guyau isowóduwo ima. Yaubada, Tauyana kaga liliuna itobuukukuidi, aba yapali vata!† Luk 1:68; Rom 1:25; 2Ko 1:3, 11:31; Epe 1:3; 1Pi 1:3.
E nakae!
6 E Diyuu maniyedi Yeisu geya sinumiseyeta go, manakae? Yaubada ina livala yaidi goi geya imalatomoteta? Geya, imalatomota. Bogina koyagoi. Geya kada Isileli tubunao liliudi moitamo toina Yaubada ina bodao toina geya. 7 Nakae Eberamo tubunao yaidi goi maniyedi geya ina bodao toidi geya, go sem Yaubada Eberamo ilatuwoko idigo kana,
 
‘Guna katótula tubumowo manudi Aisake goi bei imalatomota.’† Ibe 11:18.
Aba Vatowo 21:12
 
8 Moe livalayana ana yagoina ame nakae: Eberamo tubunao sakava goi moe geya Yaubada natunao geya, go sem avatauwa neta Yaubada ina katótula goi sisowóduwo moe Yaubada natunao. 9 Ame moitamo. Atotulayana kana,
 
‘Tukówana ainima aivasi nakae sikavava, bei akaluvila go, Serayana bogina bei ivenátuna, natuna koroto.’
Aba Vatowo 18:10,14
 
10 Go Sera geya anetava atótula goi ikéuwama geya, go sem Ribeka nakae. Koroto tayamo goi ikéuwama lalavi; korotoyana moe tubuda Aisake. 11 Moitamo ina keuwamayana moe atótula goi. Kidi lalaviyadi nava geya sibibineta nakae geya tayaamo kaga dedevina o goyogoyoina siguinuwe go, tuwo Yaubada tayamo ikinave, moe Yakobo. Moe bego ina kinavayana goi ina yúpuna nava iisowóduwo. 12 Go Yakoboyana ana kinava moe geya ina guinuwa pasina geya, go sem ana Toduduwo Yaubada pasina. E tutayana lalaviyadi nava geya sibibineta, Yauwe Ribeka ilatuwoko idigo kana,
 
‘Bogomane bei ietolovina botomoya yaina goi.’
Aba Vatowo 25:23
 
13 Moe nakae Yaubada ina tokabivalavala tayamo igini idigo kana,
 
‘Yakobo amatakoiye gagaina namliyeta Iso,
tauna Yakoboyana akinave.’
Malakai 1:2-3
Yaubada ina kinava moe ina nuwokapisi goi
14 E tauna manakaeda Yaubada ina guinuwayana manuna? Kada,
‘Yaubada ina lovina Yakobo be Iso manudi geya ivavaseta’?
Geya, geya toina! 15 Moitamo. Mosese nakae igini Yaubada ina guinuwayana manuna idigo kana,
 
‘Avatau neta latuwogu akanuwoiye, bei akanuwoiye. Avatau neta latuwogu anuwokapisiye, bei anuwokapisiye.’
Tateta 33:19
 
16 Tauna Yaubada ina kinava unana moe geya kada kaga tomota latuwodi o idi poisógana goi geya, go sem moe Yaubada kina Tonuwokapisi ame tauna. 17 Moitamo. Geya kada tomota idi guinuwa goi geya. Gínina Kimaasabaina nakae idige. Gininayana goi Yaubada Pero ilatuwoko idigo kana,
 
‘Ame pasina tauna atagonem maa yawoim: Latuwogu guna togaga kom goi avagitakoe go, aiyuwoina bei valegu inúnuwo ina poyapoya ana madabokina goi.’
Tateta 9:16
 
18 E tauna avatau neta Yaubada latuwona inuwokapisiye, bei inuwokapisiye go, neta latuwona avatau dabana ikaukase, bei ikaukase.
19 Tauna tayamo yaimi nakona bei idigo kana,
‘Neta Yaubada ina sinapu nakae, kaga unana nava iwowokoida toogoyoida? Avatau itoboine Yaubada ina nuwonúwana ivakaleye? Geya!’
20 Kom tomota! Moe geya toina, go sem kom vatau itoboinem Yaubada kukaubodebode? Manakae? Vaega itoboine ana tokalitaoya ilatuwoko kana,
‘Kaga unana ame nakae kukalitaoegu?’
Geya ae?† Ais 29:16, 45:9. 21 Manakae? Tomolúluwo mana lovina bei kula tayamo goi vaega tayamo ikalitáoe kelamo aba wowoina manuna go, vaega tayamo ikalitáoe moe vaega beso geya ana kaba wowoinamo? U nakae!† Yer 18:5-10. 22 E livalakaibalayana ataligei. Nakona Yaubada latuwona ina egamogamogu ivagitakoe be nakae ina liuna goi ina togaga ikaiwoduwe bego tomota siyagoi go, tuwo toogoyoidi bogina ikatubaayasidi adí mtula manuna, e yaidi goi imesayágana gagaina be adi liuna itoto. Neta nakae latuwona, itoboine nakae iguinuwe. 23 Moitamo toina Tauyana itoboine ina togaga ana káeyana ivagitakoe tauyadi inuwokapiisiyedi yaidi bego ana kaeyanayana dedevina toina. Amo tauyadi moitamo igimikatubayasidi bei ana káeyana tomoeeyalina sisiuko. 24 Kita iduduweda go, geya kada Diyuu adetava geya, go sem Totuyoyowo nakae. 25 Moe nakae Yaubada ina livala boi Oseya italavaite idigo kana,
 
‘Kidi boi mainao geya guna bodao
bei aduduwedi kidi guna bodao.
Nakae kidi boi mainao geya amatakoiyedita,
bei amatakoiyedi.’
Oseya 2:23
 
26 Aiyuwoina kana,
 
‘Nako goi boi alatuwokoidi kagu,
“Komi geya guna bodao geya”,
e amoko goi bei siduduwedi kadi,
“Kidi Yaubada maa yawoina natunao.” ’
Oseya 1:10
 
27 E kina go Aiseya Isileli tubunao manudi italavaita idigo kana,
 
‘Nakona Isileli tubunao adi badabada
moe ediédila ana badabada nakae go,
adi taiyuwomo taudi adi yava bei sibabane.
28 Moe moitamo.
Yauwe ina takínona bei woilina
iguinuwedoko poyapoya ame goi.’
Aiseya 10:22-23
 
29 Moe nakae Aiseya ina talavaita Yaubada manuna, idigo kana,
 
‘Neta Yauwe Tokalikumatana maniyema geya iyavemeta
bego maa yawoima kakaaiyaka,
e kai tuusaolima
Sodoma nakae o Gomora nakae.’
Aiseya 1:9
Ida numisa pasina
Yaubada ivayokoida kita kiboobosida
30 E tauna mae guna livalayadi manudi manakaeda? Ame nakae: Totuyoyowo enao geya silusaleyeta bego kidi kiboobosidi Yaubada matana goi go, tuwo moe sibabane. Go moe numisa goi sibabane. 31 E kidi go Isileli tubunao latuwodi Yaubada ina Katukeda sisokikine bei Atukedayana ana guinuwa pasina kidi kiboobosidi Yaubada matana goi go, moe geya sibabaneyeta. 32 Kaga unana geya sibabaneyeta? Unana idi sokikinayana moe geya kada numisa goi geya, go sem Atukedayana ana guinuwa kaka goi. Tauyadi Gurewa aba sapákwana isapakoidi sikapusi.† Ais 8:14. 33 Moe nakae Gínina Kimaasabaina goi Aiseya Yaubada ina livala italavaite idigo kana,
 
‘Konovēgu. Saiyoni goi Gurewa tayamo ayato;
gurewayana aba sapákwana nakae aba satupe.† 1Pi 2:8.
Go avatauwa neta Tauyana sinumise,
Yaubada bei geya igieomaemaedita.’
Aiseya 28:16, 8:14
 

†a9:4 Tat 4:22, 6:7; Atu 7:6.

†b9:4 Ibe 9:5.

†c9:4 Abv 17:2; Atu 4:13; Gui 3:25; Epe 2:12.

†d9:4 Tat 20:17; Sam 147:19.

†e9:4 Ibe 9:1.

†f9:4 Abv 12:1-3, 15:5,18-21, 17:1-8; Gui 13:32; Gal 3:16.

†9:5 Luk 1:68; Rom 1:25; 2Ko 1:3, 11:31; Epe 1:3; 1Pi 1:3.

†9:7 Ibe 11:18.

†9:20 Ais 29:16, 45:9.

†9:21 Yer 18:5-10.

†9:32 Ais 8:14.

†9:33 1Pi 2:8.

© 2019 Wycliffe Bible Translators, Inc.