9
Yeisu Vada Kimaasabaina yábana goi
isiu toinina ikaikaina ikasale ada yava manuna
isiu toinina ikaikaina ikasale ada yava manuna
1 E Yaubada ina kanasíuna vakuumgoina mana lovina tomota idi taimámina Tauyana yaina manuna be nakae mana lovina ina Kaba Kaiyaka yoyou† Tat 25:1-9,35-36. kimaasabaina poyapoya ame goi manuna. 2 Guna nuwonúwana alumavivisi. Yaubada ina Kaba Kaiyaka yoyouyana siyowo go, vabodaupa kaarekoina†a Tat 26:31-33. ivabodaupe, dadava aiyuwo. Dadavayana vakuumgoina goi rampa adi kaba yata†b Tat 25:23-40, 26:35, 37:10-24, 40:4. be beredi kimaasabaidi ma teboroina†c Tat 25:23-30, 37:10-16. sikaaiyaka. Moe dadavayana yoina Bateta Kimaasabaina.†d Tat 10:3-5, 26:33. 3 Go Aba Kaiyakayana sinaena vabodaupa kaarekoina mlina goi dadava aiyuwoina yoina Tukunu Kimaasabaina Toina.† Tat 26:33. 4 Tukunuyana ana kaba siu goi insensi ana kaba kasala goura†a Tat 30:1-10. ikaaiyaka. Ago Tukunuyana sinaena goi Yaubada ina kanasíuna dedeogaina†b Tat 25:10-22. ikaaiyaka. Dedeogainayana toluyena madabokina goura go, sinaena goi mana ma botorina goura,†c Tat 16:13-36. Eroni ina kaituko tabotaboina,†d Yoy 17:8-10. be nakae Yaubada ina kanasíuna ana lovina ma gurewaidi‡ Yaubada ina kanasíuna ana lovina ma gurewaidi: Ame youyuwoina moe aba vatulúkwana (Tat 16:34, 40:20). sikaaiyaka. 5 E dedeogayana yatana yábana ana tomatakavatayao‡ Yábana ana tomatakavatayao: Diyuu niyadi goi ame dogoiyadi yoidi kerub neta tayamo go, kerubim neta badabadaidi. Tomota geya siyagoiyeta ame tauyadi kaga. Nakona anerose o nakona kaga ituli. Tayagoi ma panepanedi.†a Abv 3:24; Tat 25:18-20. adi tapata sikaaiyaka sitaakabobo aba núwala†b Tat 25:17-22, 26:4, 30:6, 31:7, 35:12, 37:6-9; Rom 3:25; 1Iy 2:2, 4:10. sivainugone; tauyadi moe Yaubada ana káeyana. Ame tuta geya itoboineguta moe dogoiyadi ataligeidokoidi.
6 E tutayana amo dogoiyadi Yaubada ina Kaba Kaiyaka manuna sikatubayasidi nakae ikavava, Tonúwala tuta liliuna sisiusiu Yaubada ina Kaba Kaiyakayana dadava vakuumgoina goi madi taimámina Tonúwala ina paisewa siguuinuwedi.† Yoy 18:2-6. 7 Go dadava aiyuwoina sinaena goi Tonúwala Toolagaina anetava sivatayamo tala tamo tamo bei isiu. Go tutayana isiu, ikaika ime bei ikasale toinina ina goyo manuna be nakae tomota idi goyo madi tamogemoge siguuinuwedi manudi.† Vin 16:2-34. 8 Baloma Kimaasabaina ame ivatulukoida: Neta dadava vakuumgoina ana paisewa nava ikaaiyaka, e Tukunu Kimaasabaina Toina ana siu ana kenao geya ikatupaeveta. 9 Ame dadava vakumgoinayana moe livalakaibala tayamo ame tuta manuna. Livalakaibalayana goi tayagoi yabobona be vininabeso yoguyogu takasaledi Yaubada yaina go, dogoiyadi geya itoboinedita bei kita Yaubada ana tosakululuyao sikimatuweda bei nuwoda geya isabutukoidita. 10 Amo guinuwayadi moe lovina awoinu be nim be níkina kaka manudi. Go amo guinuwayadi geya nuwoda manudi geya, go sem moe sakava ana lovina Yaubada boi ivinida tasabokuuliyedi ana kadókana enao vau iyato.
11 E kina go Guyau ada Tonúwala Toolagaina bogina isowóduwo go, dogoi dedevidi bogina iguinuwedi. Tauyana Bateta Kimaasabaina goi isiu go, ame Batetayana tomota nimadi goi geya siyowoeta nakae geya Yaubada ana madágina poyapoya ame goi geya. Bateta Kimaasabaina poyapoya ame goi ikalisave be nakae idedevinasave. 12 Bateta Kimasabainayana yábana goi isiu ina Tukunu Kimaasabaina Toina goi go, geya kada goti ikaikaina goi o bulumakau bonatuna ikaikaina goi geya, go sem toinina ikaikaina goi sivatayamo Tukunuyana isiu, e ina guinuwa goi itatetevataeda. 13 Tayagoi ikaikaina ana paisewa moe moitamo. Boi avatauwa neta ma baailidi, itoboinedi sina Tonúwala yaidi goi go, Tonuwalayadi goti o bulumakau bolamo sikaumate, ikaikaina sikabi, tauyadi ma baailidi siseulidi sikimasabedi Yaubada umana, tauna idi báila goi simavada. O nakona bulumakau sikabi, sivakasave. Ikavava, selekauna sikabidi, bwae taiyao sipopolidi, tauyadi ma baailidi siseulidi, sakavaidi sikimasabedi Yaubada umana, tauna idi báila goi simavada.† Vin 16:14-16; Yoy 19:2,9,17-18; Sam 50:13. 14 Amo yoguyoguyadi ikaikaidi tomota toluyedi kaka sikimavadedi go, Guyau kina ikaikaina ikalisavedi. Tauyana geya ana pikwanamo Baloma aiyako vaatayaina ina togaga goi toinina ikasale Yaubada yaina. E ida guinuwa aba kámasa bolotodi goi nuwoda ina sabutuko ikimavadedi, e bei Yaubada maa yawoina yaina tataaimámina. Tauna amo yoguyoguyadi ikaikaidi kina Yeisu ikaikaina ikalisavedi, e nuwoda ikimavadedi.
Yaubada ina kanasiuna vau ana togúdala moe Yeisu,
e ina kámasa goi anasiunayana isowóduwo
e ina kámasa goi anasiunayana isowóduwo
15 Moe pasina tauna Yeisu moe Yaubada ina togúdala ina kanasiuna vau manuna, e bei kita, Yaubada bogina iduuduweda bego ina bodao, itoboineda bei ada vaiwowana vata ikaatotule tababane. Go Guyauyana Yaubada ina togúdala ina kanasiuna vau manuna ame nakae: Tauyana ikámasa bei ida goyo boi taguuinuwedi tutayana Yaubada ina kanasíuna vakuumgoina goi takaaiyaka yaidi goi itateteda.
16 Aba gita aguinuwe. Anasíuna moe tokámasa dalowoina ana lovina nakae. Koroto tayamo ina dalowo ana lovina konana ana kaiguyau manudi iyato go, lovinayana itoboine bei isowóduwo tutayana lovina ana toyata ikámasa. 17 Bogina koyagoi. Ana kadókana tauyana bei ikámasa, e lovinayana geya itoboineyeta isowóduwo. Neta lovinayana ana toyata maa yawoina, ina bodao geya itoboinedita siguinuwe. 18 Ame pasina boi Yaubada ina gimikanasíuna yoguyogu ikaikaina goi iguinuwe. 19 Ame moitamo. Boi Yaubada ina Katukeda Mosese ivini. Niga Atukedayana ana lovina liliudi Mosese italavaitedi tomota yaidi. Italavaitedi ikavava, bulumakau bonatuna be goti bolamo ikaumatedi go, ikaikaidi ikabidi, bwae taiyao ipopolidi. Ikavava, sipi unuununa kayakayaina ikabi, náuna isopi†a Yoy 19:6; Tat 12:22; Iyo 19:29. maniyedi taiyao isikoidi. Ikavava, bwae be ikaika goi isavakutui namliyeta anasíuna bukina be nakae tomotayadi liliudi iseulidi go,†b Tat 24:6-8. 20 idigo kana,
‘Ame ikaikayana goi Yaubada bogina ikanasiukoida. Ilovina anasiunayana tayoisikavāte.’† Mad 26:28.
Tateta 24:8
21 Nakae ikaika ikabi, Yaubada ina Kaba Kaiyaka ma konanina liliudi idi taimámina Tauyana yaina manuna iseulidi.† Vin 8:15. 22 Itoboineda kada,
‘Yaubada ina kanasiuna bogo ina tuta ikaika goi dogoi liliudi takimavadedi nakae ina Katukeda idige.’
Go neta ikaika geya idauta, geya kada tayaamo enao ikaaiyaka ida goyo adi nuwotao manuna geya.† Vin 17:11.
23 E tuwo Yaubada ina Kaba Kaiyaka ma konanina yábana goi Mosese boi itapatedi, e poyapoya ame goi imadagidi. Itoboine bei yoguyogu ikaikaidi goi moe tapatayadi ikimavadedi núwala manuna go, dogoiyadi yábana goi adi kaba kimavada idedevinasavedi; aba kimavadayana moe Guyau ikaikaina. 24 Moitamo. Guyau ikaikaina itoboine. Tauyana Tukunu Kimaasabaina toina siyowoyowo goi geya isiuta. Moe Tukunuyana Tukunu mooitamoina yábana goi ana tapata, go sem Tauyana yábana toina isiu ina ame tuta Yaubada matana goi ikaaiyaka kita manuda. 25 Aiyuwoina geya itoboineyeta Tauyana tuta tuta toinina iikasale ámasa goi Tonúwala Toolagaidi nakae siguinuwe geya. Tala tamo tamo Tonúwala Toolagaina tayamo Tukunu Kimaasabaina Toina goi isiu inuwonúwala go, ina nuwalayana geya toinina ikaikaina goi geya, go sem yoguyogu ikaikaidi goi inuwonúwala. 26 Neta Guyau amo Tonúwala Tolagaidiyadi nakae, itoboine tuta tuta gedageda ilotowo poyapoya ana madágina kunu goi go, ima ame tuta goi. Go moe nakae geya isowoduwoita, go sem bogina sivatayamo tauna tuta ana kaba lukavava goi isowóduwo ina toinina ikasale ámasa goi goyo ana táuwa manuna.
27 Kita tomota liliuda ada lovina ikaaiyaka bego sivatayamo bei takámasa namliyeta takínona ana tuta. 28 Guyauyana nakae. Ana lovina goi sivatayamo Yaubada ikasale ámasa goi be tomota liliuda ida goyo ikabidi ikalavedi† Ais 53:12. go, Tauyana bei aiyuwoina ikaluvilamna ima geya kada ida goyo manudi geya, go sem bei kita mada salau tatuuyaosi ada yava manuna.
†a9:2 Tat 26:31-33.
†b9:2 Tat 25:23-40, 26:35, 37:10-24, 40:4.
†d9:2 Tat 10:3-5, 26:33.
†a9:4 Tat 30:1-10.
†b9:4 Tat 25:10-22.
†c9:4 Tat 16:13-36.
†d9:4 Yoy 17:8-10.
‡9:4 Yaubada ina kanasíuna ana lovina ma gurewaidi: Ame youyuwoina moe aba vatulúkwana (Tat 16:34, 40:20).
‡9:5 Yábana ana tomatakavatayao: Diyuu niyadi goi ame dogoiyadi yoidi kerub neta tayamo go, kerubim neta badabadaidi. Tomota geya siyagoiyeta ame tauyadi kaga. Nakona anerose o nakona kaga ituli. Tayagoi ma panepanedi.
†a9:5 Abv 3:24; Tat 25:18-20.
†b9:5 Tat 25:17-22, 26:4, 30:6, 31:7, 35:12, 37:6-9; Rom 3:25; 1Iy 2:2, 4:10.
†9:6 Yoy 18:2-6.
†9:7 Vin 16:2-34.
†9:13 Vin 16:14-16; Yoy 19:2,9,17-18; Sam 50:13.
†a9:19 Yoy 19:6; Tat 12:22; Iyo 19:29.
†b9:19 Tat 24:6-8.
†9:21 Vin 8:15.
†9:22 Vin 17:11.
†9:28 Ais 53:12.