1 Te Senbalatgo te da Judago te moni masigi obo dodolobo sę po odolama, tama agai wado po dwai mu weyu, tama dabolo te posobo po wai, 2 te aga hai namu dabego gedude te po weyu, tama te Samaria ami bidi dabe gedude me wai. Agai te tama po wai, “Te bomo isąwai dwai hobedagi yai bidi hani te Judago mena sę yainogo ebawe? Augwaligo homugo te augwaligo te taun bagulabo obo ma geselaiba homu eyu eba, agawe? Te augwaligo homugo te Godiba ofa ebogo te be sę ebo te deli sogo naga silaiba homu eyu eba, agawe? Augwaligo te homu eyu, te augwaligo te tomode kakali tibi holali te siago ulali masigi dabe selama te obo banis nigibaso te wiegi yai yaiba weyu eba, agawe?” te po wali.

3 Te bidi Tobia te Senbalatgo te po wabo sogo te pąde dolaluali. Tama Tobia te tiwai po wali, “Tagalao, te augwa nigimainu ilao. Tiali goli, augwaligo te obo banis bomonama me dulalubaso, usu me egobeo. Te uni yowi me deli te daiba ugwadu samanobaso da, te obo banis tigidali gisigasa dulaibao,” wai.

4 Bidi mebago te Senbalat me Tobia sigo wali po enabolo wagasali. Tama tibaso, eno e tama gedu haluasa po wali, “God, nago te bidi dabego dabolo wali posobo po nago odalio. Augwaligo da begela dolali, tama tibaso eno homugo te augwaba digi ma dolomainu ilao, tama nago te augwaligo doado bage gasa bidi dabego wi sagasomainu ilama, tama augwali selasa pomainu ilao. 5 Nago te augwaligo yali dwai sę yali kolesaga me sela sągio, tama nago augwaligo sęgę me sela sągio, magi baso meni, augwaligo te da doloyu, te posobo po hauwa mu te da te masigi obo sę ebo bidi dabebolo walio.”

6 Tialima, eno te tama gedu haluasa po olama, tama dago sę bomo mu yali, tama te sesabi me isąbadi tama te obo banis ugwaba holama, te tomoba dąį mu usu nigulali. Tama te deli tigi poai te dago siminabo obo banis te usu tama elalualio.

7 Tialima, Senbalat de Tobia si dali, te Arap dabe, me Amon, me Asdot dabego te tiwai po odali, dago te Jerusalem masigi obo sę bugagia mu ebo wali, tama dago te obo banis te alua degasa dulali te tigidali badu ma nigali po wai. Tama augwaligo te wado po umabo mu olama, 8 tama augwaligo te da dali hwįagasabo po minama, tama dago sę dolaibao po wai. 9 Tiali goli, dago te Godiba gedu haluasa po wabo sę eyu, te Godigo da tau somainu yai, tama te giligade me hulide te bidi meba munama, te boi bidi tonalumainu yali, tiyu te augwaligo da dolagasidali weyu tiai dao. 10 Te meba Judago te tiwai balia po me deli te augwa sę ebo sogo wali balia po te tiwai dao,

11 Te da boi bidi dabego augwa haside digi te tiwai po obao, “Te da geme geme naga duala sesa pelama, te Juda dabeba pedelaibao. Tama te augwaligo da me sugobeo. Tialima, polo tama te dago augwali tigidali ela munama, tama te augwaligo augwa yali sę me simanogobeo,” wali. 12 Te boi bidi dabego te tama tiwai wali, tiali goli te da Juda meba te augwali pąde bidali, tama sesemane sogo augwali aselama, te boi bidi dabego da dolabo po wali po te dabolo wagasu yai. 13 Tama tibaso, eno te sesemone ene me, bainat hwą ge me, enesigi me, te sę ebo tigidali bidiba dobolama mani. Tama eno te augwa hani deli deli bage augwa deli kanemeba deliba sisinigi pelama, bidao po wali. Tama eno augwaliba weyu, te augwali pelama, te obo banis silisąwani te tigidali badu dolalua peyu, te no munalu, tama augwaligo te boi bidi dabe dali boi hwįabo sisi elaluao po wali. 14 Eno suali, te we bidi wi elama, haliga sęgę elaluai, tama tibaso eno te tobolu bidi dabeba, me ofisa dabeba, me te tigidali we bidiba te tama po wali, “Dage te boi bidi dabede wi me igio,” wali. “Dagego te sę ebo te bugagia homu kone palao, Genuai Bidi te bomai mu da, tama tiyu te tigidali bidi agade wi ebo dao. Tama tialima, odao. Dagego te bomo elama hwįbaso da, teda te dagego abagi dabe me, we wai puluba me, te duga be dabe, te doado bage me, te me dolisąma bugagia elalueibao,” wali.

15 Nosali te boi bidi dabego te augwaligo yaibao wali sę dabe po te dago odali po te augwaligo koneai. Tama te augwaligo koneama, te Godigo augwaligo sunumi palibaso, tama te augwaligo da me dolobe homu yai. Tialima, te da tigidali Judago te moni masigi obo nigibo gagalama, ma yai dao. 16 Te sogo dago te sę ebo kolesaga hasegelali. Tama eno te obo banis sę ebo hani tigidaliba weyu, tama meba augwaligo te sę edubadi, tama mebago tonalu, no munaluao wali. Te no munalubo bidi dabego te sesemone ene, me sabele, me enesigi tolalu, tama augwaligo te hwįbode gudubo kapago nigai ugwa bulali. Tama te tobolu bidi dabego te Juda we bidi tigidali tau mu selama, 17 te obo nigibo sę yai. Tama te bidi dabego te obo nigibo nai dabe tolasa pabo sogo, augwaligo te nai te me badu nogo badu toloyu, tama te gasa nogo badu te hwįabo nai tolaluali. 18 Tama te sę ebo bidi tigidaligo te bainat hwą ge te augwa kukulude gedelai. Tama te biugel bu wabo sę elalubo bidigo te boi bidi dabe asobo sogo, aga te ena pąde bidai. 19 Tialima, eno te we bidi dabeba, me te ofisa dabebolo, me te augwa tobolu bidi dabeba te po walali, “Obo banis te bobobage mu elalubao, tama dagego te hauwa pedai badu sę ebao, tama dage hani deli deli te gasa sę ebo hanide digibulu digibulu bidibao,” wai. 20 “Tama tialima, te boi bidi dabe pedalubo side, te biugel gela weyu, te bu dagego odobaso da, teda boi bidi asalio olama, dage te ena pąba sisinagasao. Tama God, te dago Genuai Bidigo, te dago boi bidi dabe dali hwįaibao.”

21 Eno te po augwaliba mawai, tama te kigamu digi mu te tigidali side tama te hǫ dabe te dagalude ula eboba usu nigi pabo sogode, te da hani mebago te obo nigibo sę ebadi, te gasa hani mebago te sesemone ene tolalu te tonaluai dao. 22 Te sogo eno te tigidali bidiba dali, te augwa sę bidi dabe dali, te tiwai po walali, “Te dagego sę te hulide simanobo sogo, dagego te Jerusalem me taga soyu, duga buluba pigio. Menio. Dage te moni obo tomode bidao. Tama te giligade dago sę eyu, te hulide tonalubo dao,” wali. 23 Tialima, da tigidaligo te tama tialio. Tama te godege pibo side te dago gudubo ugwa me hasegelibeo. Menio. Tama ena dali, te eno hai namu dabe me, te sę bidi dabe me, te ami bidi dabego dali, te ena tigidali side tonaluali, da tigidaligo te sę ebo side gudali ugwa te dago tigide me gudalubadi, tama da piali. Tama tigidali side dago te ene me sesemone tolaluali, tama da te węba pabo sogo me, te dago me tagalobeo. Tama tiyu, sesemane sogo te dago hwįabo sisi elaluai dao.