1 Tialima, tigidali bidigo te Jerusalem moni masigi obo ma geselebo sę gagalali. Polalubo pris Eliasip dali, te gasa pris dabe dali, augwaligo te obo dage me badu te augwaligo te Kibu Sipsipgo Sunumi nogi poali, te badu te obo nigibo sę yali. Augwaligo te sę silama, tama augwaligo te me badu obo dage sa muyu, te Godigo masigi obo mu da olama, te lotu po wai. Tama nosali augwaligo te sunumi palibo sunumi dabe muani, augwaligo te nogi te Kibu Sipsipgo Sunumi dao wali. Tama augwaligo te obo ugwanu holama nigali te usu nigulali, te Bidi Sese A Naga te 100 Tonalubo Bidi bobobage beba peyu nigali, tama te Hananelgo Tauaba usu nai, te bobobage be mu dao. Augwaligo silama, tama te Godigo obo da olama, te lotu po wali. 2 Te Jeriko bidi dabe te pris dabe pąde sę eyu, tama augwaligo te obo dage tegelama sę yai. Tama Sakur, te Imrigo ogwa, te bidi meba daligo te obo dage gasa me iba tega sabo sę te Jeriko bidi dabe sę ebo pąde wadolama yalio.

3 Te Hasenago hanigo te obo sę te Sakurgo hanigo obo sę ebo pąde wadoa selama, te sę yai. Te obo dage te augwaligo nogi eyu, te po wali, Te Sųgų Pisgo Sunumi elalubao wai. Tama augwaligo te ni nami dabe te sunumi sesegede paliama, tama te sunumi aga mubo pesagede muani, tama bomai lok munama, tama te sunumi dąų walobo bobage ain dili muani. 4 Tama Meremot dali, te gasa bidi dabego dali te obo dage gasa badu te Pisgo Sunumi pąde te obo nigibo sę yai. Meremot te Uriago ogwa, tama te Hakosgo wąį ogwa da. Tama Mesulam dali bidi mebago te obo dage me badu te sę wadolama, te Meremotgo hanigo sę ebo pąde yai. Mesulam aga te Berekiago ogwa, tama te wąį nǫų Mesesabelgo wąį nǫų dao. Tama te Sadok dali, bidi meba dali te obo sę wadolama, te Mesulamgo hani bage sę ebo pąde sę yai. Sadok aga te Banago ogwa dao. 5 Te Tekoa taun bidi dabego te Sadokgo hanigo sę ebo obo dage pąde wadoasa, te obo sę yalio. Tiali goli, te Tekoa tobolu bidi dabego te obo sę ebo tonalubo bidi dabego wabo po odisąbaso, tama te tobolu bidi dabego te sę me deli ebeo.

6 Joiada, te Paseago ogwa, dali Mesulam, te Besodeago ogwa da, tama te bidi meba dali te augwaligo te obo dage te Tekoago hanigo sę ebo obo dage pąde wadoa selama, te sę yai. Te obo dage pedai badu te nogi augwaligo te Jesana Sunumi da wabo nogi elaluai. Tama augwaligo te sunumi sesegede te ni nami paliama, tama te pesage agade te sunumi munama, tama bomai lok munama, tama te sunumi dąų walobo bobobage ain dili muai dao.

7 Melatia te taun Gibeon bidi dali, te Jadon te Merenot taun bidi, tama taun Gibeon bidi dabe, me te Mispa taun bidi dabego me, te obo wadolobo sę ebo te Joiada me Mesulam te bidi sigo hani bagego te obo sę ebo pąde gagalama, ibaba wadolali. Tama te sę ela pali, te wę Yufretis pedai e badu provins polalubo gavman bidigo beba tama tagaligi pali.

8 Usiel, te Harhaiago ogwa, dali te bidi mebago dali, te obo sę wadolasama eyu, tama te Melatia me Jadon sigo hanigo te obo sę ebo pąde gagalasa yai. Usiel te gasa tobage nai dabe te golgo nigibo bidi dao. Tama te Hanania dali, te bidi mebago dali te Usielgo hanigo sę ebo obo dage pąde wadoasa te sę yai, tama pali te augwaligo gasa Genuai Obo nogi wabo teba unuligi palio. Hanania te wiegi yai denami ebo nai sanda nigibo bidi da wai. 9 Tama Refaia te Hurgo ogwa dali te bidi meba daligo te masigi obo sę ebo te Hananiago hani sę ebo pąde te sę yali. Refaia te Jerusalem pąde elalubo tǫ pedai badu me deli te polaluali tobolu bidi dao. 10 Tama Jedaia te Harumapgo ogwa dali te bidi mebago dali, te gasa obo te aga be pąde digi wadolama, te sę yalio. Tama Hatus, te Hasapneago ogwago te obo banis sę ebo te Jedaiago hanigo sę ebo pąde te sę yai dao.

11 Tama Malkia, te Harimgo ogwa, dali Hasup, te Pahatmoapgo ogwa, te bidi mebago dali te masigi obo dage gasa badu pedai te Hatusgo hanigo sę ebo pąde wadoa selama, te sę yai dao. Tama te augwaligo te Stov Dabe Elalubo Bobobage Be te me nigalio. 12 Te Salum, te Halohesgo ogwa, dali te bidi meba daligo te obo banis dage gasa wadoasa nigali, tama aga wegi dabego aga te sę ebo tau salio. Te bidi Salum aga te si wali Jerusalem pąde elalubo tǫ pedai tonalubo polalubo bidi dao.

13 Tama Hanun, te Sanoa taun bidi dabe dali, augwaligo te obo banis te sunumi elaluali madi te augwaligo te nogi wali Te Odogo Pesage Badu Sunumi da walio. Te badu te sę wadoa selama, sę yai. Tama augwaligo te sunumi aga te pesagede muani, tama augwaligo te bomai lok munama, te sunumi palibo bobage ain dili muanio. Tama me augwaligo te obo gasa wadoasa pali, te augwaligo te nogi weyu, te Pobele Bage Sela Sąbo Sunumi da wali, tama te obo banis dąį usu nagasali, te 440 mita dao.

14 Te Malkia te Rekapgo ogwa dali te bidi mebago dali te sę wadolama, tama te obo te Pobele Bage Sela Sąbo Sunumi pedai badu bobegela selama nigali. Tama augwaligo te sunumi aga muani pesagede munama, tama augwaligo te bomai lok munama, te sunumi palibo bobage ain dili muai. Malkia aga te Bet Hakerem bulu tǫ pedai tonalubo polalubo bidi dao.

15 Tama Salum, te Kolhesego ogwa, aga te Mispa tǫ pedaide polalubo bidi dao. Aga dali te bidi meba daligo te obo banis wadolama sę eyu, te sunumi nogi augwaligo te Ulu Wę Elalubo Madi Sunumi da walio. Tama augwaligo te ni nami meba selama, tama te sunumi ugwadu daide te be pedu tiwai nigali. Tama te sunumi aga muani pesagede muai, tama bomai lok munama, te sunumi palibo bobage ain dili muani. Tama augwaligo te obo banis dage Te Sela Sigi Aį sesegede wadoa selama nigalio. Te obo banis te polobadu bidali kingo gi pąde elaluai. Tama augwaligo te obo banis sę wadoasa pabo te Devitgo Taunba pabo togobiliba usu nigi pai dao.

16 Tama Nehemia, te Asbukgo ogwa, aga te distrik Betsur hanude tobolu bidi dao. Tama aga dali aga hani dabe augwaligo te Salumgo hanigo yali obo dagedu wadolama yali. Augwaligo te obo sę ela pelama, te tuni bidi Devit gų pageba saboligi pali. Tama te wę ge te bidi dabego te bomai ami bidi dabego be mesalo pąba tagaligi pali.

17 Tama te Livai hani bidi dabego te obo banis sę te gasa badu me yali. Te augwali nogi e tiwai dao. Rehum, te Banigo ogwa, dali te gasa Livai dabe daligo te obo banis sę te bidi Nehemiago hanigo sę ebo pąde te wadolama, sę yali. Tama Hasabia, te Keila distrik tǫ pedai badu te polalubo tobolu bidi dao, aga dali te aga tǫ pedaide te gasa Livai dabe daligo te obo banis sę te Rehumgo hani sę ebo pąde sę yali. 18 Tama Bavai, te Henadatgo ogwa, aga te namba 2 wali Keila distrik tobolu bidi dao. Tama aga dali te gasa Livai dabego dali te obo banis sę te bidi Hasabiago hani sę ebo pąde sę yalio. 19 Tama Eser, te Jesuago ogwa, aga te Mispa taun tobolu bidi da. Tama aga dali, te gasa Livai dabego dali, te obo banis sę te Bavaigo hani bage sę ebo pąde te sę yai. Tama te obo dage te hwįbo doado bage mubo be pąde elaluai, tama pelama, te nogi augwaligo te Habu Sugunani wabo, te obo dage ponaniba usu nagasai dao. 20 Tama Baruk, te Sabaigo ogwa, dali te gasa Livai dabego dali te obo banis sę ebo te Esergo hani sę ebo pąde sę wadolama yali. Augwaligo bomo eyu, te obo sę ela pali, te polalubo pris Eliasipgo be sunumi elaluali pąba usu nigi pai dao. 21 Tama Meremot aga te Uriago ogwa, tama te Hakosgo wąį nǫų da. Tama aga dali, te gasa Livai dabego dali, te obo sę ebo te Eliasipgo be sunumi pąde gagalama pali, tama te be sesegeba usu nigi palio.

22 Tama te pris mebago me te obo banis me badu geselali. Te Jerusalem pąde elalubo bulude bidibo pris dabego te obo sę te Meremotgo hani sę ebo pąde te sę wadoasa yalio. 23 Pris bidi Benjamin me pris Hasup te gasa hani meba daligo te augwa sigo be pąde digi te obo sę gagalama yali. Tama pris Asaria, aga te Maseago ogwa, te aga wąį nǫų Anania dao. Tama aga dali, te gasa hani meba daligo te obo sę te aga be pąde yalio. 24 Tama pris Binui, te Henadatgo ogwa, dali te hani mebago te obo sę ebo te Asariago be pąde gagalasa ela pali, te obo nogi augwaligo te nogi Habu Sugunani teba usu nigi pai. 25 Tama pris Palal, te Usaigo ogwa, dali te hani mebago te obo sę te Habu Sugunani tedu gagalasa peyu, te si wali kingo bobobage be taua elalubo madiba usu nani. Te taua te tonalubo wasman dabego be pąde elaluai. Tama Pedaia te Parosgo ogwa dali meba hanigo dali te obo banis gasa badu te Palalgo hanigo sę ebo pąde sę yai. 26 Augwaligo te obo sę ela pelama, te Wę Sabo Sunumi pageba sabolama, te bidi dabego te Godigo tempel be tonalubo madiba pedelai. Te sunumi me taua te augwaligo nigali masigi obo elalubo badu te giliga dega sigilubo badu elaluali. Te obo dage te Ofel pąde elaluai, te Godigo be tonalubo sę bidi dabe bidibo madi te Jerusalem badu elaluai dao.

27 Te Tekoa taun bidi dabego te obo banis gasa badu wadolama, te Pedaiago hani sę ebo pąde sę yali. Te si sogo wagisu te obo sę yai. Augwaligo te sę te Godigo tempel be tonalubo taua pąde gagalama, tama augwali sę ela pali. Te Hos Dabego Sunumi elalubo madi te Ofel badu usu nigi pai dao. 28 Tama te pris hani mebago te obo te gasa badu te Hos Dabego Sunumi elalubo madi te not badu wadolama yai, tama te tigidali deli deligo te masigi obo sę ebo te augwa be pąde digi ela palio. 29 Tama Sadok, te Imergo ogwa, te hani meba daligo te pris dabe pąde sę eyu, tama te obo ma geselebo sę te Sadokgo be pąde digi wadoasa sę yali. Tama Semaia, te Sekaniago ogwa, dali te hani mebago te obo me badu wadoa selama, te Sadokgo hani pąde sę yalio. Semaia aga te giliga pedalubo badu Godigo tempel be sunumi tonalubo wasman bidi bidai. 30 Tama Hanania te Selemiago ogwa dali te Hanun, te Salapgo ogwa te a olama, me badu nogo kibisa deli wali ogwa da, tama te gasa hani meba daligo te obo sę ebo te Semaiago hani sę ebo pąde sę yai. Te augwali sigo te si sogo wagisu te obo sę yai. Te Mesulam, te Berekiago ogwa, dali te meba hani daligo te obo wadolama, te Hanania me Hanun te hani sigo sę ebo pąde te sę yali. Augwaligo te obo banis nigibo sę yali, te Mesulamgo be pąde digi te sę yalio.

31 Malkia te gasa haniani nai dabe te golgo nigibo bidi da. Te Malkia dali, te meba hani daligo te obo sę te Hanungo hani sę ebo pąde te sę yai. Augwaligo te obo ma geselebo sę ela pali, te Godigo tempel be tonalubo sę bidi dabego beba usu nama, tama te bisnis bidi dabego sę ebo madiba usu nigi pai. Te be te Godigo tempel be sunumi pąde elaluali, te nogi augwaligo te Tonalubo Wasman Bidigo Sunumi da wali, tama te obo nogo habu sugunani ugwadu elaluai dao. 32 Tama te golgo nai nigibo bidi dabe dali te bisnis sę te masigi obo nogo habu badu gagalama ebo madi, me te Sipsipgo Sunumi elalubo madi, teba te obo sę ela pelama, usu nigi pai dao.