12
Ebelamo anavedo.
1 E ada seyana tova Yaubada Ebelamo givonena,
“Unamididi ada ya fafali,
ya kalivayavo ke ya gabuyavo una segedi
aku unanau fafali-nai gana vewaleni wagaine.
2 Ada iya aimo unumi gana kiveinalina
ke gina veinala yoo lakaina ada
vona nuwakabubuya gana lemeni.
Iya aimo ayegana gana kilakaina,
ada yaku vona nuwakabubu wagaine
kaliva moyaidi una lemedi.
3 Gavega ina vonanuwakabubuyeni,
kaduwe gana vonanuwakabubuyedi.
Ada gavega ina alatabutabuyeni,
kaduwe gana alatabutabuyedi.
Ada oye wagainiya
kaliva matatabuna babi wagaine
vona nuwakabubu analeme ina nuwagana.”
4 E ada Ebelamo ginau anafaiweya Yaubada giveimeyena mamauwe, ada Lota nodi. Tova-nai Ebelamo anamalamala 75 wagaine, fafali Elana gisegena. 5 Ada vavinena Selai ke Lota, tawagana alialikana natuna, ada yadi giba matatabuna ke yadi togugaiyavo badi Elana wagaine nodi imiyamiya ani itauya inanau Kenani. Ada tova-nai bademowa iyegemona fafali-nai wagaine, 6 Ebelamo yana yoo nodi igolota inau ai lakaina Mole wagaine, tainei Sekemu melala lilivane. Tayuwe tova-nai wagaine meKenani aimo imiyamiya fafali-nai wagaine.
7 Ada Yaubada Tauna giyegemona Ebelamo wagaine ada givona, “Ya tubudelideliyavo wagaidiya aimo fafali taidei gana veledi.” E ada wadedeku Ebelamo ebavebolavoi gibubuna Yaubada faine ke gioduodu wagaine, faina Banae giyegemona wagaine. 8 Ada tayuwe fafali-nai wagaine-deya givekukuwa ginau kauwana ebalakavina fafali oyaoyana wagaidiya wadedeku manuwa sininila givemididina melala luwei nefanidiya, tainei Ai gimiyamiya kauwana ebalakavine aku Bedeli ani kauwana ebaolune. Wadedeku-deya kaduwe ebavebolavoi velugana gibubuna, ada gioduodu ke gitagivedadaga Yaubada wagaine. 9 Muliya givekukuwa-vagila ada gitauya ginumiyamiyanau wabolimaneya waina ada gielai Negevi wagaine.
Ebelamo Itipita wagaine.
10 Tova tayuwe wagaine loka giyegemona fafali Kenani wagaine, ada Ebelamo giobu Itipita ke wadedeku ginamiya tova maufona wagaine faina loka lakai-moena Kenani wagaine. 11 Ada bademowa ginuyegeyegemona Itipita, au vavinena Selai givonena, “Unaitana, gaalamanena o vavine aiwakafouna. 12 Ada tova-nai meItipita ina itani e ada ina vonaga, 'Wada bana vavinena', aga aimo ina luvealikaku aku o unamiya. 13 E ada keke una vonedi vaita iya mogane, aku una vonedi vaita iya o novu, ada ina gugai iwakana wagaikuya ada iya aimo ganamiya faina oyeni.”
14 Tova-nai Ebelamo gielai Itipita wagaine, ada meItipita iitana Selai bana vavine aiwakafouna. 15 E ada Felo yana kaliva lakaidiyavo iitana au ina Felo wagaine iawadavadava vavine anaaiwaka faine ada ivagule inauwena yana manuweya yana vavine seyana kaduwe faina.** 'Felo' anakivila anafaiweya 'kini' meItipita yadi vona wagaine. Keke kaliva anayegana. 16 Ada Felo ginuwanuwa vaita Ebelamo ani Selai novuna ke bana faine Ebelamo yana giba ginuwanuwagadi anafaiweya sifi, goti, bulumakau, doniki kaliva ke vevine, ke kameli, ada kaduwe togugaiyavo kaliva ke vevine.
17 Aku Yaubada veoga vita-moena wagaidiya gimunudi, Felo ke badi gavega yana manuwa anatomiyayavo nodi, faina Ebelamo vavinena Selai, ani Felo givaina. 18 Ada tova-nai Felo giveoga wagaine, matawa giimilina ke Ebelamo ginaelai wagaine. Ada Felo givona, “Gavana taidei ugai wagaikuya? Ada gavana faina keke uda voneku vaita bana vavine? 19 Gavana faina keke udavona velemoena, aku uvona ‘Bana iya novuku’, e ada gavagaulena vavineku. E ada taidei vavine-moena. Tova taidei una vagaule wananau!” 20 Ada Felo giveimeyedi yana kalivayavo Ebelamo faine, inaimili ginanau wavavinena ke yana gibamomo matatabuna nodi.