1 E, ada tova tayuwe wagaine kaliva matatabudi au bonadi seya-moena ke yadi itu seyana wagaine iifuifufu. 2 E ada kaliva iawala inaunau kauwana ebalakavine ani Saina anafafali wagaine laubeu lakaina inuwagana, ada wadedeku imiyamiya.

3 E ada seyana tova taudiyavo wagaidiya ivona, “Biyavo! Wanaela kanana babi fotafotana kana yalana ke bilika kana bubudi. Ada kana kabudi ebakabu wagaine.” Ada bilika ivegugaiyena, keke kabala. Ada koluta wagaine ikivefovefosedi. 4 Ada kaduwe ivona, “Wanaelai, taudeyavo yada melala lakaina kana yogona. Ada wadadeku seyana didiga kana didina gina laka, gina laka gabama gina nuwaabina. E ada taudeyavo adayegana kana kilakaina ada fafali matatabuna kaliva ina alamaneda, ada keke kana vebiawawala babi matatabuna wagaine.”

5 Aku Yaubada giobuelai ke gina itana melala lakaina ke didiga-nai givemanawe gilaka badi kaliva natudiyavo iyogoyogona. 6 Ada Yaubada givona, “Velemoena! Kai anafaiweya kaliva matatabudi yoo seyana ke iifuifufu meya seya-moena wagaine aga bademowa ivevuvu inadewa taidei anafaiweya, ada yadi venuwadadana gavana aimo adifaiweya ina gugaiyedi. 7 Wanaelai, kanaobu ke yadi vona kana kivenuwavogavoganina, e ada keke adifaiweya yadi ifufu seyana seyana ina vealaalamana.”

8 E ada Yaubada wadedeku-deya kaliva giveyavulidi babi matatabuna wagaine ada melala lakaina-nai anaiyogoyogona au wadedeku iilovena. 9 Tayuwe faine fafali-nai ivewagana Babeli, faina wadedeku-deya Yaubada bona gikive nuwavogavoganina, ada wadedeku-deya Yaubada giveyavulidi ada iyavula inau babi matatabuna wagaine.

10 Taidei anafaiweya Semi yana tubudelideliyavo ifuifufudi. Malamala luwei giavaidi tuwa muline, tova-nai Semi malamala ginuwagana 100 wagaine, natuna kaliva Afakasadi gitubuga. 11 Muline Semi gimiya malamala 500, tayuwe malamala-dina wagaidiya kaduwe tufona natunavo kaliva ke vevine givetubudi.

12 Ada Afakasadi anamalamala 35 wagaine natuna kaliva Sila gitubuga. 13 Muline Afakasadi anamalamala 403, tayuwe malamala-dina wagaidiya kaduwe natunavo tufona kaliva ke vevine givetubudi.

14 Ada Sila anamalamala 30 wagaine, natuna kaliva Ibeli gitubuga. 15 Ibeli gitubuga muline, Sila gimiya malamala 403, tayuwe malamala-dina wagaidiya kaduwe natunavo tufona kaliva ke vevine givetubudi.

16 Ada Ibeli anamalamala 34 wagaine, natuna kaliva Felegi gitubuga. 17 Felegi gitubuga muline, Ibeli gimiya malamala 430, tayuwe malamala-dina wagaidiya kaduwe natunavo tufona kaliva ke vevine givetubudi.

18 Ada Felegi anamalamala 30 wagaine, natuna kaliva Liu gitubuga. 19 Liu gitubuga muline, Felegi gimiya malamala 209, tayuwe malamala-dina wagaidiya natunavo tufona kaliva ke vevine givetubudi.

20 Ada Liu anamalamala 32 wagaine, natuna kaliva Selugi gitubuga. 21 Selugi gitubuga muline, Liu gimiya malamala 207, tayuwe malamala-dina wagaidiya kaduwe natunavo tufona kaliva ke vevine givetubudi.

22 Ada Selugi anamalamala 30 wagaine, natuna kaliva Naoli gitubuga. 23 Naoli gitubuga muline, Selugi gimiya malamala 200, tayuwe malamala-dina wagaidiya natunavo tufona kaliva ke vevine givetubudi.

24 Ada Naoli anamalamala 29 wagaine, natuna kaliva Tila gitubuga. 25 Tila gitubuga muline, Naoli gimiya malamala 119, tayuwe malamala-dina wagaidiya natunavo tufona kaliva ke vevine givetubudi.

26 Ada Tila gimiya ada anamalamala 70 muline, natunavo aditoto itubuga, Ebelamo,** Taidei Ebelaamo. Aimo Yaubada anayegana gisevedevedamana. Unaitana daba 17 maita 5. Naoli ke Elani.

27 Ada taidei anafaiweya Tila ifuifufuna. Tila givetubudi Ebelamo, Naoli ke Elani. Ada Elani ani Lota givetubuna. 28 Ada Elani tamana Tila aimo wayawaina wagaine, Elani gialika Uli wagaine yana melala ebatubugine, tainei fafali Kalidiya wagaine. 29 E ada Ebelamo ke Naoli adiiselu ivenaginagi ada Ebelamo vavinena anayegana Selai, aku Naoli vavinena adiyegana Milika. Bana Elani natuna vavine. Elani natunavo adiiselu Milika ada Isako. 30 Aku Selai ani bana kakalina, keke tamo natuna.

31 Ada Tila melala Uli Kalidiya anafafali wagaine gitauya ginanau fafali Kenani wagaine, ada natuna Ebelamo ke tubuna Lota, Elani natuna kaliva ada lawana Selai, Ebelamo vavinena ani givagauledi nodi inanau Kenani. Aku tova-nai ielai Elana wagaine, ada wadedeku ivemelala. 32 Ada Tila gimiya anamalamala 205, ada gialika Elana wagaine.