10
Moloidafa Fofada:su Ba:ma:ne Sia:ne Gadosu
1 Hina Gode! Abuliba:le Di da badilia esalabala?
Ninima se nabasu doaga:sea, Di da abuliba:le wamoaligisala:?
2 Wadela:i hamosu dunu da gasa fi hou hamosa.
Ilia da hame gagui dunu ilima hasalasa.
Sani ili gei amoga ilila: sa:ima:ne, Gode Dia fada:nesima.
Uasu dunu da Godema gagabusa amola higasa. 3 Wadela:i hou hamosu dunu da ea wadela:i hanai hou hahawane ba:sa. Uasu dunu da Godema gagabusa amola higasa.
4 Wadela:i hou hamosu dunu da Hina Gode hame dawa:lala.
E da gasa fi hou hamobeba:le, Gode da hamedei e da agoane dawa:sa.
5 Wadela:i hou hamosu dunu da ea liligi huluane noga:lesisa.
E da Gode Ea fofada:su hame dawa:.
E da ema ha lai ilima gadela ousa.
6 E da hi hisu amane sia:sa, “Na da hamedafa dafamu.
Na da se hamedafa nabimu.”
7 * Louma 3:14Ea sia: ganodini da ougisu sia: nabai gala
amola ogogosu hou amola famusa: dawa:i gala.
E da hedolowane wadela:i amola ougi sia: amo ia:musa: dawa:.
8 E da moilai amo ganodini dunu udigili fane legemusa: wamo ouesala
amola wamowane hahani dunu hame mabeyale sosodo lela.
9 E da soge laione wa:me ea hou defele, doagala:musa: oulela.
E da gasa hamedei hame gagui dunu amo misa:ne ouligisa.
Amo da ea sani amo ganodini dasea, e da ili gaguli mini ahoa.
10 E da amo gasa hame dunu, fofonobonesisa.
E da gasa bagadeba:le, ilia da wadela:lesi dagoi ba:mu.
11 Amo wadela:i dunu da hima amane sia:sa, “Gode da hame dawa:sa.
Ea da Ea si sisigiba:le, na hou hamedafa ba:mu.”
12 Hina Gode!
Amo wadela:i hamosu dunuma, Dia se iasu ima.
Se nabasu dunu amo mae gogolema.
13 Gasa fi hou dunu da abuliba:le Godema higasala:?
E da abuliba:le hima sia:sala:?
“Gode da nama hame se nabasimu.”
14 Be Hina Gode! Di da ba:sa.
Di da se nabasu amola da:i diosu ba:lala.
Amola Di da fidimusa: ouesala.
Gasa hame dunu da Dia fidimusa: Dima maha
amola Di da eso huluane hame gagui dunu fidilala.
15 Wadela:i hou hamosu dunu amola fio dunu ilia gasa Dia fima.
Ilia wadela:i hou hamoiba:le, ilima se iasu ima.
Ilia da wadela:i hou fisi dagoiba:le fawane yolesima.
16 Hina Gode Ea Hinadafa Hou da eso huluane dialalalumu.
Dunu da eno ‘gode’ liligi ilima nodone sia:ne gadosa,
ilia da gadili asili, ninia soge ganodini bu hamedafa ba:mu.
17 Hina Gode! Di da hou fonoboi dunu amo ilia sia:ne gadosu nabimu.
Di da ilia dogo amola denesimu.
18 Di da dunu enoga banenesi amola guluba: mano ilia didigia:be nabimu.
Di da ili fidima:ne fofada:mu.
Amasea, ilia da osobo bagade dunu ilima bu hame beda:mu.