9
Gode Ea Moloidafa Fofada:su Dawa:beba:le, Nodosu
1 Hina Gode! Na dogo huluane amoga Dima nodosa.
Amola hawa: hamosu noga:idafa Dia hamoi amo na da sisa:i lamu.
2 Di galebeba:le, na da hahawane gesami hea:mu.
Gasa Bagade Gode! Na da Dima nodone gesami hea:mu.
3 Di ba:beba:le, nama ha lai dunu da sinidigili bu hobeasa.
Ilia da dafane bogosa.
4 Dia fofada:su da moloidafa
amola Dia da na fidima:ne fofada:i dagoi.
5 Di da Godema higa:i dunu ilima fofada:ne se iasu.
Amola Di da wadela:i hamosu dunu wadela:lesi dagoi.
Amo dunu da bu hame ba:mu.
6 Ninima ha lai dunu da fisi dagoi, bu hamedafa ba:mu.
Di da ilia moilai huluane gugunufinisi dagoi.
Ilia amola da bu hamedafa ba:mu.
7 Be Hina Gode da eso huluane Hinadafa esalalalumu.
E da Ea Fofada:su Fisu hahamoi dagoi.
8 E da fofada:su hou moloidafa amoga fifi asi gala amo huluane ouligisa.
E da fi huluane ilima moloidafa fofada:nana.
9 Se nabasu da banenesi dunu ilima doaga:sea,
Hina Gode da ilia gaga:su wamoaligisu sogebi agoai ba:sa.
10 Hina Gode! Nowa da Dia hou dawa:sea, ilia da Di dafawaneyale dawa:mu.
Nowa da Dima masea, Di da amo dunu hamedafa yolesimu.
11 Hina Gode da Saione soge amo ouligisa.
Ema nodone gesami hea:ma.
Fifi asi gala huluane ilima Ea hou olelema.
12 Nowa dunu e se nabasea amola disia, Gode da hame gogolesa.
Amola dunu da ilima se iabe, Gode da ilima amolawane se iaha.
13 Hina Gode! Nama asigima!
Nama ha lai dunu da nama se bagade iaha.
Hina Gode! Na bogosa:besa:le, hedolo fidila misa.
14 Amasea, na da Yelusaleme dunu fi amo ilia midadi lelu,
liligi huluane na Dima nodosa, amo huluane ilima olelemu.
Dia da na gaga:iba:le, na da hahawane bagade ba:mu.
15 Hame lalegagui dunu fedege agoane da ilia uli dogole, amo ganodini dafai.
Ilia da eno dunu sa:ima:ne sanenisisia, ilisu da amo sani ganodini sa:i dagoi.
16 Hina Gode da Ea moloidafa fofada:su amoga Ea hou olelesa.
Be wadela:i hamosu dunu da wadela:le hamobeba:le,
ilila: sanenisisu amo ganodini daha.
17 Dunu huluane amo da wadela:le hamosa
amola Godema higabe dunu huluane da bogosu ba:mu.
18 Wali hame gagui dunu da se nabawane esala.
Ilia da banenisi dagoi agoai ba:sa.
Be amo hou da eso huluane hame dialumu.
19 Hina Gode misa! Osobo bagade dunu da Di higamu da defea hame galebe.
Di wadela:i hamosu dunu amo Dima fofada:musa: misa:ne sia:ma.
Amasea, ilima fofada:nanu, se iasu ima.
20 Hina Gode! Ili beda:ma:ne hamoma.
Ilia da osobo bagade dunu fawane amola ilia da bogosu ba:mu.
Amo ilia dawa:ma:ne, Di olelema.