1 Ngan akamata so tina ngan a imot, motong la bangabangana ke Maro tani in ipatnaia ran somai atu pau. Bong ran tani in ran ke yepongo dook mata yo taukan motingi i, inbe igalanga le igalanga san dawa ben pat yo ene kiristol* Pat yo ene kiristol i, in medana inbe igalanga le ke be takamata so yo iken ke kapala ki i. i. Inbe ran tani in ipas ye kookoowoo ke burungu ke Maro iye Sipsip Natunu ngan parmana a irar a idu. 2 Ngan le idu kataunu kat ye dada somai ke malala mai tani in. Inbe ke ran tani in gigini yo ru nga, ngan kai ke yepongo dook mata yo taukan motingi ngan ikodo ye. Ngan kai tina ngan be ipu nga, ngan ole ipu ye lal atu ye taudu tina yo atu atu nga le imot. Inbe kai tina ngan raunu nga, ngan gurana ki lapau ke be ikarata di tooltool ke ni mai i le imot, ngan ole tinidi dook mata mulu. 3 Ngan nen le betanga medana yo Maro ipamede mukot a iwete be ole iyemenai di tooltool yo tiyei dada dook tiap ke noonoo i, in imot oo. Inbe kookoowoo ke burungu ke Maro iye Sipsip Natunu la be iken ye malala mai tani in, inbe di kapraingi ki la be tisung panga ye ni tani in nga. 4 Ngan nen le ole tikamata matana, inbe ya in ole iwodo ene ilo ye damodi. 5 Inbe malala tani in ole taukan bong, nen le sul loloana too ke nunngana ke be ilangarai di ngan tiap, yesoo Maro ya taunu in la be ilangarai di tooltool tina ngan i. Inbe di tooltool ki ole tiyei kuto maimai a matadi kala so nga le imot a iken nen le taukan motingi.

6 Motong la bangabangana ke Maro tani in iwete pau mulu nen. Iyei ne, “Ngan betanga tina yo nga, ngan moolmool le imot le ke be di tooltool titara lodi medana ye. Ngan Tool Mai Maro yo iwanga Amunu du ipamadit di Maro koonoo lodi a be nen ngan tiwetewete betanga ki i, in ya la iwanga bangabangana ki be si ipatnaia so tina le imot yo be pombe palbe leu nga, ngan pang di kapraingi ki i.”

7 Motong la Yesu iwete nen, “Kupalongo, ole mooloo tiap inbe amulu a asila! Nen le sei tool be ilongo inbe itoo betanga ke Maro yo kouo koonoo a kuwodo le iken ye rau i nga, ngan ole Maro iyei urata dook mata panga.”

8 Ngan au Yowan, au tauk la alongo betanga nga, inbe akamata so tina nga. Le ye kene yo alongo betanga inbe akamata so tina ngan a imot nga, ngan le agun turuk le du damok toko tana ke dama ke bangabangana tani yo ipatnai so tina ngan pau i, in kene punu a be asung panga. 9 Bong ngan iwete pau nen, “Ai, kin kuyei nen be! Au i kapraingi ke Maro lapau dawa ben ong kuye di diem kapala yo di Maro koonoo nga, inbe di tooltool le imot yo tiparama betanga ke Maro a titoo nga. Le be nen nga, ngan kusung pau be, bong kusung pang Maro ya taleu.”

10 Motong la bangabangana ke Maro tani in iwete pau mulu nen, “Ai, kin kupataukala betanga ke Maro yo kouo koonoo a kuwodo le iken ye rau i nga be, yesoo lal yo Maro be iyei so tina nga le imot a pombe ye i, in iman potai oo. 11 Ngan nanga, sei tool be iyei dada dook tiap nga, ngan isootoo yeingi dada yo dook tiap nga. Inbe sei tool be iyei dada yo giri leu ye Maro matana nga, ngan isootoo yeingi dada yo giri leu ye Maro matana nga. Inbe sei tool be iyei dada dook mata nga, ngan isootoo yeingi dada yo dook mata nga. Inbe sei tool be iyepe le taukan busunu ye Maro matana nga, ngan sila iyepe nen le taukan busunu ye Maro matana.”

12 Ngan bangabangana ke Maro tani in iwete nen a imot, motong la Yesu iyei ne, “Kupalongo, ole mooloo tiap inbe amulu a asila! Ngan balingi la iken yau nga, inbe ole akap pang di tooltool le imot le lo iye urata kidi yo tiyei ngan kootoonoo. 13 Au i la Tool Mai pang so yo ipa muku nga le idu ye so yo ipa mur nga. Inbe au i la amuku, inbe akimur i. Inbe au i la maditingi, inbe motingi ke so tina nga le imot i.

14 “Di tooltool yo tingas sousoungu mooloo mooloo kidi le ikoko nga, ngan ole Maro iyei dada dook mata pang di. Ngan nen le ole imalum pang di be titoo dada ke koongoo ke malala mai tani in a tilo malala lono lo ngan be tikana kai ke yepongo dook mata yo taukan motingi i, in puana lapau. 15 Bong di tooltool yo tiyei dada yo giri leu dawa ben di gaunu tiyei nga, ngan ole tiyepe ke diki ke malala mai tani in. Nen le di tooltool yo pidipidadi nga, inbe di tooltool yo tiyei bauk nga, inbe di tooltool yo tiraumatamata di tooltool nga, inbe di tooltool yo tisung pang di kai padodo nga, inbe di tooltool yo tiparama dada ke kaplungunu le lodi be tiyei le ikenen leu nga, ngan ole tiyepe diki ke malala mai ke Maro tani in lapau.

16 “Au Yesu, la awanga bangabangana kiau a isila be sila iwetewete betanga moolmool tina ngan pang ang di tooltool yo kagaua ye bareme ke Yesu nga. Au i la sudud yo pombe ye sasa ke Dawiti i, inbe au i la boi ke pang malama yo ilolo i.”

17 Ngan Yesu iwete nen a imot, motong la Maro Amunu Silene iye garup yo be ikere in tiwete nen, “Kuman!” Inbe tooltool be ilongo betanga nga, ngan ole iwete nen lapau, “Kuman!” Nen le sei tool be moorooku nga, ngan iman. Inbe sei tool lono be le iyin ran nga, ngan iman man iyini ran ke yepongo dook mata yo taukan motingi i. Ngan ran tani in Maro ole ikap sokoraii panga ye lo ponana ki.

18 Au Yowan i awete betanga medana pang di tooltool yo tilongo betanga ke Maro yo di Maro koonoo tiwete le iken ye rau i nga, ngan nen. Kumata be tool atu iwete sokoraia betanga sa le ipaloka lo ye betanga yo tiwodo ye rau i nga, ngan ole Maro ipaloko urata moonoo masngana mai yo tiwodo betanga ki ilo ye rau i nga, ngan ilo pono lapau. 19 Inbe kumata be tool atu iyege betanga ke Maro yo di Maro koonoo tiwete le iken ye rau i nga, ngan ole Maro iyege le iyepe diki. Ngan nen le ole ilo koongoo lono ke malala mai tani, in tiap. Inbe ole ikana kai ke yepongo dook mata yo taukan motingi i, in puana tiap lapau. Ngan so tina ngan la betanga ki iken ye rau tani i nga.

20 Ngan tool tani yo iwetewete betanga moolmool ye so tina nga le imot i, in iwete nen, “E, au i ole amulu a asila palbe leu.”

Le au lapau awete nen, “Moolmool. Tool Mai Yesu, kusi.”

21 Nen le apatarau nen be Tool Mai kiidi Yesu in lono pang ang di tooltool ke Maro a iyei dada dook mata pang ang le imot. Moolmool.