1 Ngan akamata so tina ngan a imot, motong la akamata lang paunu inbe tana paunu pombe. Ngan lang inbe tana yo muku nga, ngan tilledi oo, inbe tiek sa iken mulu tiap lapau. 2 Inbe akamata malala paunu yo Maro ipootoo panga ya taunu i, in pombe ye malala ki a isi. Ngan malala mai tani in ene la Yerusalem Paunu i, inbe tisorosore le dook mata dawa ben garup isorosoro le dook mata a inam be iyooloo nintooroo nga.

3 Inbe ye kookoowoo ke burungu ke tool kuto mai tani, in alongo tool atu kalngana koonoo le mai nen, “Kapalongo, ngan ni yo nookoot nga be Maro iyepe ye i, in iken ye di tooltool. Le moolmool, ya in ole iyepe kataunu ye di. Nen le di tooltool tina ngan ole tiye tiyepe dawa ben di tooltool ki, inbe ya taunu ole iyei Maro kidi a iyepe ye di lapau. 4 Inbe ole imus matadi surunu le imot a ikoo ye matadi. Inbe di tooltool tina o ke be timmata mulu tiap, inbe lodi modoko a titang mulu tiap, inbe o ke be tiyetai touo masngana sa mulu tiap lapau, yesoo dada yo ke muku nga, ngan ilene a imot oo.”

5 Motong la tool yo iwur ye kookoowoo ke burungu ke tool kuto mai i, in iwete nen, “Kapalongo, au i ole ayei so nga le imot a pombe paunu mulu!” Motong la iwete mulu nen, “Kuwodo betanga nga ilo ye rau, yesoo betanga yo nga, ngan betanga moolmool ke be di tooltool titara lodi medana ye.” 6 Ngan iwete pau nen a imot, motong la iyei ne, “So tina ngan ayei a imot oo. Au i la Tool Mai pang so yo ipa muku nga le idu ye so yo ipa mur nga. Inbe au i la maditingi, inbe motingi ke so tina nga le imot i. Ngan nen le sei tool be moorooku nga, ngan ole akap ran ye ran gumono yo be ikaua yepongo dook mata yo taukan motingi i, in panga. Inbe ran tani in ole akauu panga sokorai, le ke be iyimoo tiap. 7 Nen le sei tool be ikodo le imede le illos dada dook tiap yo ke noonoo nga, ngan ole akap so dook mata tina ngan panga. Inbe au i ole ayei ben ya Tamana, inbe ya in ole iyei ben au Natuk. 8 Bong di tooltool yo titattadai di koi kiau le titoo au tiap nga, inbe di tooltool yo titara lodi medana pau tiap nga, inbe di tooltool yo tiyei dada dook tiap yo giri leu nga, inbe di tooltool yo tiraumata di tooltool nga, ngan malala kidi la gomo somai yo pat salpa ipa ye ei ikanen a iken ye i. Inbe di tooltool yo tiyei dada dook tiap ke bauk nga, inbe di tooltool yo pidipidadi nga, inbe di tooltool yo tisung pang di kai padodo nga, inbe di tooltool yo ke kaplungunu nga, ngan malala kidi la gomo yo pat salpa ipa ye ei ikanen ye i, in lapau. Ngan ni tani in ke matenge san yo ipa mur ye matenge ke tana i.”

9 Motong la di bangabangana ke Maro limi be ru tina yo titoko omai limi be ru yo ipon ye kate malmal ke Maro nga, ngan atu kidi in iman le man iwete pau nen. Iyei ne, “Ai, kuman a man apatnaia garup yo be ikere, in pong. Ya in la be Sipsip Natunu iyooloo i.” 10 Motong la Maro Amunu ipaponau le tina bangabangana ke Maro tani in ikau au le amlo ye kawal somai atu yo ilo ete san i, inbe ipatnaia malala mai tani yo Maro ipootoo panga ya taunu i, in pau. Ngan malala tani in ene la Yerusalem i, inbe ipa ye malala ke Maro a isi. 11 Inbe Maro nunngana ilolo le loloana ilangarai ni dawa ben pat sallinene yo ene yaspa i, inbe igalanga le igalanga san dawa ben pat yo ene kiristol in lapau. 12 Ngan malala mai tani in tikaua koongoo medana ye le ipa le ilo ete. Inbe dada ke koongoo tani ngan sangaul be ru, inbe di bangabangana ke Maro sangaul be ru lapau la tikodo ye dada tina ngan. Inbe ye dada tina ngan pono nga, ngan tiwodo rara ke di Isrel tina yo sangaul be ru nga, ngan edi ilo ye. 13 Inbe koongoo tani in madini yo ke ipa ye a ise i, in dada ki tol. Inbe madini san yo ke ipa ye a idu i, in dada ki tol. Inbe madini yo karaka ipa ye i, in dada ki tol. Inbe madini san yo yoro ipa ye i, in dada ki tol lapau. 14 Inbe koongoo ke malala mai tani, in tipatar pat somaimai sangaul be ru ngan muku du tana pono a be nen ngan iparama koongoo punu. Inbe tiwodo di aposol ke Sipsip Natunu yo sangaul be ru ngan edi ilo ye lapau.

15 Ngan bangabangana ke Maro yo iwetewete pau i, in itoko so dawa ben koro medana yo tikarata ye gol ke be irouo malala mai tani in le ipa ye koongoo ki, inbe dada ke koongoo ke malala tani in lapau. 16 Ngan malala mai tani in tikarata ngan le madini tina yo pai nga, ngan tarantatu le imot. Ngan nen le mooloo ki inbe ye mai ki nga, ngan gaongo leu. Motong la bangabangana ke Maro tani in irouo malala mai tani, ngan le ipuske rowo ke madini tina yo pai nga, ngan rowo ki mooloo le mooloo san.* Rau ke Maro iwete rowo ke madini tina yo pai nga, ngan ben 2,200 kilomita. Inbe rowo ki yo ilo pang ete nga, ngan ilo le ilo ete san† Rau ke Maro iwete rowo ki yo ilo pang ete nga, ngan ben 2,200 kilomita. le ye moolmool le mai ki ngan kinkatingi ki gaongo leu. 17 Ngan bangabangana ke Maro tani in irouo koongoo ke malala mai tani, ngan le koongoo tani in matolene ki mai le mai san.‡ Rau ke Maro iwete matolene mai le mai san ngan ben 66 ‘mita’. Ngan so yo iroua ye i, in dawa ben yo di tooltool tirouo so ye i. 18 Ngan koongoo ke malala tani in tikarata ye pat yo ene yaspa i. Inbe malala mai in tire ye gol leu le giri sa be isau ye, ngan tiap lapau. Ngan nen le malala mai tani in igalanga le igalanga san dawa ben galas. 19 Inbe pat somaimai tina yo ke koongoo punu nga, ngan timoro ye pat matana matana yo sallinene dook mata nga. Ngan pat yo titaru muku a isu koongoo i, in timore ye pat sallinene yo ene yaspa i; inbe ru ki, in timore ye pat yo ene sapaia i; inbe tol ki, in ene aget; inbe pai ki, in ene emerel; 20 inbe limi ki, in ene sadonikis; inbe limi be atu ki, in ene konilian; inbe limi be ru ki, in ene kirisolait; inbe limi be tol ki i, in ene beril; inbe limi be pai ki, in ene topas; inbe sangaul ki, in ene kirisopres; inbe sangaul be atu ki, in ene aiasin; inbe sangaul be ru ki, in ene ametis. 21 Inbe koongoo ke malala tani in dada ki yo sangaul be ru nga, ngan tikarata ye pat ke gomo yo sallinene nga. Bong pat ke gomo tina ngan maimai san le atu ngan ole iye dada atu. Inbe dada ke panga yo ipa kataunu ke malala mai tani in tikarata ye gol leu le puspusngana inbe igalanga le dawa ben galas nga.

22 Ngan akamata touo bareme ke sungunu sa iken ye malala mai tani in tiap, yesoo Tool Mai Maro yo gurana ki mai san le illos so nga le imot i, in iye Sipsip Natunu ngan di la tiyepe ye malala mai tani in nga. Ngan nen le di tooltool ole tipas le tisung pang di yaru leu. 23 Inbe malala mai tani in ke yo isini kemai inbe taudu yo isini bong nga, ngan taukadi urata, yesoo Maro nunngana la ilolo a ilangaraia ni i, inbe Sipsip Natunu in la sul ke malala tani in. 24 Inbe di tooltool ke ni mai i le imot nga, ngan ole tipa ye sul loloana ke malala tani in. Inbe di tooltool yo tiyei kuto maimai a matadi kala tana maimai nga, ngan ole tikap so kidi yo dook mata ngan panga lapau. 25 Nen le o ke be titiukala dada ke koongoo mulu tiap, yesoo ye malala tani in bong sa mulu be pombe ye ngan tiap lapau. Le dada ki ole koon panganga a ikenen nen. 26 Inbe di tooltool ke ni mai i le imot nga, ngan ole tikap pat le so kidi tina yo dook mata ngan a tilo ye malala tani in. 27 Bong so sa yo giri leu nga, ngan ke be ilo koongoo lono ke malala tani, in tiap. Inbe tool sa be iyei dada dook tiap yo ke be moomoodoo ye nga, too iwete betanga ngan illung ye nga, ngan o ke be ilo koongoo lono tiap lapau. Bong di tooltool yo tiwodo edi ilo ye rau ke Sipsip Natunu nga, ngan di leu la be tilo ye malala tani in nga. Ngan rau tani in rau ke yepongo dook mata yo taukan motingi i.