1 Ye kene tani in Yesu ipatarau nen a imot, motong la iye di galiunu tipa le tikesiutu ran yo ene Kitron i. Ngan ran tani ke koonoo kapala in kumu atu yo tipe kai olip ye i, le nga Yesu iye di galiunu tina ngan tipa so le tilo kumu tani in lono.

2 Ngan Yuta, tool tani yo be itara Yesu la di koi ki baedi i, in lon galanga ye kumu tani, yesoo kene kapala, ngan Yesu iye di galiunu lo tigaua nango. 3 Le nga Yuta irara di tooltool ke patokongo budanga atu ke Rom tiye di bianga yo di tooltool maimai ke paroranga so le di Paresi tiwanga di nga, ngan a tila pang ye kumu ke olip tani. Di ngan tila ngan kapala tilanga sul a titoko, inbe di kapala ngan tikap so yo tikarata le ilolo dawa ben sul nga, inbe kapala ngan tikap dawa ke patokongo. 4 Ngan Yesu in lon galanga ye so le imot yo be pombe panga, ngan oo. Le nga ipa le ila potai ye di, motong la itor di nen, “Ai, ang nga kasere sei?”

5 Motong la tiraua betanga ki nen, “Am nga amsere Yesu ke Nasaret.”

Le nga Yesu iwete pang di nen, “I au tani naii.”

Ngan Yuta, tool tani yo be itara Yesu la di koi ki baedi i, in iye di tooltool tina ngan tikodede. 6 Ye kene tani in yeisa be Yesu iyei ne, “I au tani naii,” ngan le tidikmai pang mur inbe timolol du tana.

7 Motong la Yesu itor di mulu nen, “Ang nga kasere sei?” Ngan se tiyei ne, “Yesu ke Nasaret.”

8 Le nga Yesu iwete pang di nen, “Awete pang muku oo, i au tani naii. Le au i la kaman be man kaserau i, a kakau au, inbe kayei di tooltool kiau nga be, a tila.” 9 Yesu iyei nen, ngan le iyei betanga tina yo iwete muku nga le itar kanono moolmool. Ngan betanga tina ngan iwete nen, “Au i matak kala di tooltool yo kop di pau nga, ngan nen le di atu sa ilene tiap.” ✡ Yowan 6:39; 17:12

10 Ngan Simon Pita, in pul ki atu ke patokongo lapau. Le nga iposi tina le itarakede kapraingi ke tool kuto mai ke paroranga so pang Maro, in talngana oonoo, le imakede. (Ngan kapraingi tani in ene la Malkas i.)

11 Motong la Yesu iwete pang Pita nen, “Ai, kupariri pul kiong in a ilo ye nene mulu! Nga yelei, lom be ayin ye ruku ke masngana yo be Tamak ikauu pau i, in tiap, too?”

12 Motong la di tooltool ke patokongo tina ngan tiye kuto mai kidi yo matan kala di i, inbe di bianga yo tikodokala bareme mai ke sungunu nga, ngan tiparama Yesu a tipauu ye ooroo medana. 13 Motong la tikauu a tila pang ye Anas yo Kepas roonoo i, in muku. Ngan Kepas tani, in iyei tool kuto mai ke paroranga so pang Maro ye rai tani in. 14 Inbe ya in la muku ngan iwete pang di Yuda nen, “Dada dook mata in nen: Kumata be tool atu ikol di tooltool kiidi a imata nga, ngan ole di tooltool kiidi le imot nga sa tilledi tiap.” ✡ Yowan 11:50

15 Ye kene tani yo tikaua Yesu a tila pang ye Anas nga, ngan le Simon Pita iye Yesu galiunu san, in yaru titoo lapau a tila. Ngan tina tool kuto mai ke paroranga so pang Maro, in lon galanga ye Yesu galiunu san tani, ngan la le timalum panga be itoo Yesu a ilo pang koongoo lono nga. 16 Bong Pita in iyepe ke diki potai pang ye dada, inbe inam. Le nga Yesu galiunu tani yo tool kuto mai ke paroranga so pang Maro, in lon galanga ye i, in imulu du iwete pang garup yo matan kala dada i, motong la ikaua Pita a yaru tilo pang koongoo lono nga. 17 Tilo, motong la garup tani yo matan kala dada i, in itoro Pita nen, “Ong i o tool tani ni galiunu atu, too?”

Bong ngan Pita ipataukala a iyei ne, “Tiap! Au i tiap.”

18 Ngan ni sil dook tiap, le nga di kapraingi ke tool kuto mai ke paroranga so pang Maro, ngan tiye di bianga tikodo le tiwakaia ei yo tipata i, inbe iloo di. Le nga Pita lapau ila iye di tikodo, inbe ei tani in iloo.

19 Ye kene tani in tool kuto mai ke paroranga so pang Maro, in itor panini Yesu ye di galiunu, inbe ye betanga yo ipatomonai di tooltool ye nga. 20 Motong la Yesu iwete panga nen, “Au i betanga yo awete pang di tooltool nga, ngan atarkoolek inbe awete sa sollono, ngan tiap, bong awete mallangana le imot. Le kanakana ngan apatomonai di tooltool ye ni nangai yo di Yuda timan tigaua ye i. Le apatomonai di ye rumu kidi Yuda ke gaongo, inbe ye bareme mai ke sungunu. 21 E nga yelei be kutorau nen nga? Be nen ngan kutor di tooltool la tilongo betanga kiau nga. Di ngan ole lodi galanga ye betanga yo awete nga.”

22 Ye kene tani yo Yesu iwete nen ye in nga, ngan le bianga atu yo ikododo potai ye i, in ipodo damono, inbe iyei ne, “Ai, kuwete be in dada dook mata la kuraua betanga ke tool kuto mai ke paroranga so pang Maro ye i, too?”

23 Motong la Yesu iwete panga nen, “Kumata be awete betanga sa dook tiap nga, ngan kupaposi la mallangana. Bong be awete betanga dook mata nga, ngan nga yelei a le kurau sokorai au nga?” 24 Motong la Anas iwete le ooroo tina yo tipaua Yesu ye i, in iken ye nen, inbe tikauu a tila pang ye Kepas yo iyei tool kuto mai san ke paroranga so pang Maro i.

25 Ngan Simon Pita tani in ikododo a ei iloo. Le nga di tooltool tina yo tiye tikododo nga, ngan titoru mulu. Tiyei ne, “Ong i o tool tani ni galiunu atu, too?”

Bong ngan Pita ipataukala a iyei ne, “Tiap! Au i tiap.”

26 Motong la kapraingi atu ke tool kuto mai ke paroranga so pang Maro, in rara ke tool tani yo Pita itarakede talngana i, in iyei ne, “Ai, ong i ben akamatong kuye Yesu kayepe nango la kumu lono ke olip ngo, kuwete?”

27 Bong ngan Pita ipataukala mulu. Tina yo ngan ye kene tani in palbe leu inbe tareke itang.

28 Motong la di Yuda tikaua Yesu a tiyege rumu ke Kepas, inbe tikauu a tila pang ye rumu ke tool kuto mai kidi Rom yo matan kala tana mai Yudia i. Ngan ye kene tani in muntu yege, ngan di Yuda tina lodi kaua urata nen be di tapdi nga o tilo rumu lono ke tool kuto mai kidi Rom in tiap. Yesoo, ye ger kidi in igunkala di ke be tilo ye rumu ke di tooltool rara san tiap. Di Yuda tina ngan tiyei be nen ngan ole di tapdi tigarung di ye Maro matana ngan o ke be tikan asara ke lal yo be lodi tut ye Paskimoolooningi Ke Maro, in tiap. 29 Le nga tinam a tiyepe ke diki, inbe Pailot isi pang ye di si itor di nen, “Ang nga kakaua tool in se kapatokode a ikodo matak ye soo so?”

30 Pailot itor nen, motong la tiyei ne, “Kumata tool i be tool ke yeingi dada dook tiap kidi talnga dikidiki tiap nga, ngan matin nga le amkauu a amman pang yong tiap.”

31 Le nga Pailot iyei ne, “Be nen ngan kakauu a kala, lo ngan be la kakarata betanga ki ye ger yo kiang ang tapmim nga.” Bong ngan di Yuda tina ngan tiyei ne, “Am nga, timalum pam ye raumatenge di tooltool tiap.” 32 Ngan so yo nen ngan be pombe, a be nen ngan iyeie betanga tina yo muku ngan Yesu iwete ye dada yo be imata ye i, in le kanono pombe moolmool.

33 Le nga Pailot imulu a ilo pang rumu lono, motong la ikiui Yesu a ilo le lo itoru nen. Iyei ne, “Oo kuwete, ong i la tool kuto mai yo matam kala di Yuda le imot i, too?”

34 Pailot itor nen, motong la Yesu iraua betanga ki. Iyei ne, “Ngan in torungu kiong ong taum, too tool sa la iwete pong yau la le kutor nen nga?”

35 Le nga Pailot iwete panga nen, “Nga yelei, kuwete be au i di Yuda atu, too? Ngan di tooltool kiong ong taum, tiye di tooltool maimai ke paroranga so pang Maro la tikau ong a kuse pang yau nga. Ngan ong i kuyeie soo so?”

36 Motong la Yesu iraua betanga ki nen, “Dada kiau yo be matak kala di tooltool ye i, in dawa ben dada ke di tooltool yo ke tana i, nga tiap. Ngan yo be atoo dada ben kidi tooltool ke tana i nga, ngan matin nga le di kapraingi kiau timadit a tirau di kuto maimai kidi Yuda yo timan be man tikau au a tiparamau nga. Bong dada yo ayei tool kuto mai a matak di tooltool kiau ye i, in dawa ben di tooltool kuto maimai yo ke tana i, nga tiap.”

37 Yesu iwete nen le nga Pailot itoru, “Ai, moolmool! Ong i o tool yo iyei tool kuto mai, ngan atu, too?”

Motong la Yesu iraua betanga ki nen, “Betanga kiong yo kuwete be au i tool kuto mai i, in moolmool. Ngan ye punu in la le tinak ipasui au a asi tana ye in nga, a be nen ngan awete betanga moolmool pang di tooltool nga le imot. Ngan nen le di tooltool yo lodi dook mata ye betanga moolmool nga, ngan ole tilongo betanga kiau.”

38 Yesu iwete nen, le nga Pailot itoru. Iyei ne, “Ngan betanga moolmool, in soo so?”

Motong la Pailot imulu a idu pang tana ye di Yuda tina du iwete pang di nen, “Ai, tool ni apuske touo so sa yo ikapsap ye, ngan tiap. 39 Bong momo kiang Yuda atu in nen: Ye rai kanakana nga, ngan kumata le be talo ye lal maiyoko kidi Yuda ke be lodi tut ye Paskimoolooningi Ke Maro in pombe nga, ngan ole katorau be apadu di tooltool yo tiyepe rumu dook tiap kidi talnga dikidiki lono nga, ngan atu a isi tana. Le lomim be apadu tool kuto mai yo matan kala di Yuda le imot in a isi pang yang, too?”

40 Pailot itor nen, bong ngan di Yuda tina ngan koodi a tiraua betanga ki. Tiyei ne, “Tiap, ya in kupadua be! Kupadu Barabas a isi pang yam!” Ngan Barabas tani, in muku ngan ipamaditi patokongo a be tinganga di Rom ye tana kidi Yuda, inbe ya in tool dook tiap ke pinnau lapau.