1 Yesu iwetewete pang di a imot, motong la di tooltool pattu yo titar talngadi ye betanga ki nga, ngan tigasa panga ye Pailot yo iwanga di tooltool ki ke patokongo la tiraumata di tooltool ke Galili pattu nga. Ngan ye kene tani in be tiparoro so pang Maro lapau. Ngan nen le rara kidi imati a idu igaua pa ye rara kidi asara tina yo be tiyei paroranga ye pang Maro nga. 2 Motong la Yesu iraua betanga kidi nen, “Lomim belei ye di tooltool ke Galili tina yo tiraumata di a timmata nga, ngan di tooltool dook tiap ke yeingi noonoo le tillos di tooltool kapala yo ke Galili, ngan la tiyei dada nen pang di nga, too? 3 Tiap! Bong awete pobe pang nen, kumata be kaportak lomim mulu pang Maro tiap nga, ngan ole Maro igarungang gaongo leu dawa ben di tooltool ke Galili tina yo tiraumatamata di nga. 4 Inbe lomim belei ye di tooltool sangaul inbe balana limi be tol ke Yerusalem yo rumu mooloo ke Siloam iduku du ikaltoo di a timmata nga? Ngan lomim tar be di ngan tooltool dook tiap ke noonoo le tillos di tooltool kapala yo tiyepe Yerusalem nga, too? 5 Tiap! Bong awete pobe pang nen, kumata be kaportak lomim mulu pang Maro tiap nga, ngan ole Maro igarungang gaongo leu dawa ben di tooltool ke Yerusalem tina yo rumu iduku du irau di nga.”

6 Motong la Yesu ikatte betanga atu mulu pang di nen, “Tool atu in ipe kai yo ene pik in ye kumu ki ke ooroo yo ene wain i. Motong ye kene atu ngan ila be la matan sarai kai pik tani in kanono, bong ila ngan ikamata touo kanono siap. 7 Motong la iwete pang tool ki yo itaru be matan kala kumu ki i. Iyei ne, ‘Ai, ye rai tol ngan aman be man matak so kai pik kanono, bong ipu tiap, le taukan kanono. Le ke be ikodo nen a ikap sokorai tana gorengana tiap. Le kutara a idu tana.’

8 “Motong la tool tani yo matan kala kumu ki i, in iyei ne, ‘Tool mai, ngan dook mata, bong au i lok be ikodo kasin ye rai atu mulu ngan, inbe akel tana ke punu ngo a atar asara tedi sa ilo punu, inbe takamata toua ngan. 9 Kumata be talo ye rai san pang dama i, le be ipu a itar kanono nga, ngan o dook mata. Bong kumata be ipu tiap nga, lo ngan be kuwete a atara du tana.’ ”

10 Lal kidi Yuda ke sungunu in pombe, le nga Yesu ilo rumu kidi Yuda ke gaongo in lono a lo ipatomonai di tooltool yo tigaua ye sungunu nga. 11 Ngan garup atu yo iyepe ye gaongo lapau i, in so sadi iyeii le matamatenge mai ikauu ye rai sangaul inbe balana limi be tol. Le udud turana ki ikoi le ke be ipa tot tiap. 12 Le nga Yesu ikamata, motong la koonoo panga a iman pang ye, man iwete panga nen, “Garup, matamatenge kiong in ole akaratong ye, ngan ole tinim dook mata mulu.” 13 Motong la ipaloko baene lo garup tani in pono, ngan le pattu leu be ipadunu le lo ikodo tot le tina lon ponana, inbe iyitmaka Maro ene.

14 Bong tool kuto mai yo matan kala rumu kidi Yuda ke gaongo i, in ikamata Yesu yo ikarata garup tani in ye lal kidi Yuda ke sungunu nga, le tina katen malmal dook. Motong la iman tina le iwete katkat pang di tooltool tina ngan nen, “Ai, ke yo ke urata nga, ngan limi be atu leu. Le lomim be kaman be man tool atu ikaratang ye matamatenge kiang a tinimim dook mata mulu nga, ngan kaman ye ke tina ngan. Bong kaman ye lal kidi Yuda ke sungunu be man ikaratang ye matamatenge kiang be.”

15 Motong la Tool Mai iraua betanga ki nen, “Ona tiap! Ang nga di tooltool ke kaplungunu sa. Ngan yelei be ye lal kidi Yuda ke sungunu nga, ngan kala kapolo ooroo ye di asara kiang yo bulumakau le donki ngan ye rumu kidi, inbe kadede di be du tiyin ran nga? 16 Ngan garup i sasa ke Apram, bong Satan igarungu le matamatenge ikauu ye rai sangaul inbe balana limi be tol oo. Ngan nanga, kumata lok be aloni a agiri matamatenge tani in ye lal kidi Yuda ke sungunu nga, ngan ole yelei, be ayei nen nga, ngan dook tiap, too?”

17 Ye kene yo Yesu iwete pang di nen ye in nga, ngan le di koi ki moomoodi dook tiap yege. Bong di tooltool kapala ngan tikamata urata dook mata tina yo iyei nga, ngan le lodi ponana kaiye.

18 Motong la Yesu iwete pang di mulu nen, “Dada yo Maro be matan kala di tooltool ki ye i, in dawa ben soo so? Too, ole ananpootoo ye soo so, a nen ngan lomim galanga ye nga? 19 Dada tani in dawa ben kai yo ene mastet, in patunu. Ngan tool atu ikaua mastet patunu tani in la ipe du kumu ki, ngan le isup le lo iyei ben kai somai. Inbe itar baene somaimai le di man yo tiro lang katene nga, ngan man tire giniu kidi ye a tiyepe ye.”

20 Motong la Yesu iwete pang di mulu nen, “Dada tani yo Maro be matan kala di tooltool ki ye i, in ole ananpootoo ye soo so mulu? 21 Nga ole ananpootoo ye yis yo tataru lo ye porong ngan iyeii a isung i. Garup atu ikaua so mai tiap tani a itaru ilo ye porong tina maiyoko in a ipargarungraii ye, ngan le iyeie porong tani a isung le imot.”

22 Motong la Yesu imadit mulu be itoo dada a ilo pang Yerusalem nga, ngan le lo pombe ye malala maimai le malala kakase kapala yo ikenen dada nga, inbe ipatomonai di tooltool. 23 Le nga tool atu itoru nen, “Tool Mai, ngan pang dama ni nga, ngan ole di tooltool kasin leu la be Maro ikap di a ipamulu di ye so dook tiap tani yo be igarung di i, too?”

Motong la Yesu iyei ne, 24 “Awete pang nen, dada yo be ilo pang ye malala ke Maro i, in mai tiap. Le guramim a be nen ngan kapa ye dada tani in a kalo. Yesoo, di tooltool alunu kaiye la ole tikapye be titoo dada tani in a tilo nga, bong o ke be tilo tiap. 25 Ngan pang dama ni ngan rumu taunu ole iman tina le itiukala dada, inbe kaman le man kakodo ke diki a kapitpiti dada, inbe kayei ne, ‘Tool Mai, kuso dada pam.’

“Bong ngan ole iraua betanga kiang nen, ‘Ang nga kapa ke ngai? Au i lok galanga yang pitiap yege.’

26 “Lo ngan be kawete panga nen, ‘Ona tiap! Am tina nga la kuman malala kiam man kupatomonai am inbe am yong tagauagaua ye kaningi le yinungu nga, e nga yelei be lom sarere yam nga?’

27 “Bong ngan ole iwete pang nen, ‘Ang nga ke soo malala? Atoo, au i lok galanga yang pitiap yege. Ang nga di tooltool ke yeingi dada dook tiap, le kakoo yau a kala!’

28 “Ngan ole kala be matamim lo ngan kakamata Apram ye Esaka ye Yakop tiye di Maro koonoo yo ke muku nga, ngan tilo tigaua di tooltool yo Maro be matan kala di nga. Bong ang tapmim ngan ole tingangang a du kayepe diki, a be nen ngan katangtang, inbe kakanen dongamim a iparrasa. 29 Inbe di tooltool yo tipa ye ni mai le imot nga, ngan ole timan a tilo lo tiye di tooltool yo Maro be matan kala di nga, ngan tigaua, inbe tiwur a tikan so. 30 Ngan nanga, di tooltool yo nookoot ngan tikimur nga, ngan ole tise le lo timuku. E di tooltool yo nookoot ngan timuku nga, ngan ole tidu le du tikimur yege.”

31 Ye kene tani in di Paresi pattu timan le man tiwete pang Yesu nen, “Ai, nga ole kuyege ni, inbe kula pang ye ni sa mulu ngan, yesoo Erot ni ngo lono be ole iraumatong a kumata.”

32 Ngan Yesu iraua betanga kidi nen, “Kala kawete pang gaunu gok ni nen, ‘Katai inbe bongbong nga, ngan ole anganga di so sadi yo tiyepe ye di tooltool nga, inbe akarata di tooltool yo matamatenge ikap di nga, le tinidi dook mata mulu. Le malama ngan la be ayei porai urata kiau le imot nga.’ 33 Bong katai inbe bongbong be malama ngan ole apa le ikenen leu a alo pombe, yesoo ni sa mulu be tiraumata Maro koonoo ye tiap. Ni ataleu yo be tiraumate ye le imata i, in la Yerusalem ni.”

34 Motong la Yesu tani in iparau nen, “Atoo, Yerusalem, Yerusalem, ong i la di tooltool kiong tiraumatamata di Maro koonoo a timmata, inbe tikap pat a tikatmatamata di tooltool yo Maro iwanga di a timala pang yong nga. Inbe ye lal alunu ngan au i lok be agaua di tooltool kiong a tigaua le imot yau, dawa ben tareke tinana igaua di natunu a ipatur di ye balini nga. Bong di tooltool kiong lodi be timan tigaua yau tiap. 35 Le kutar talngam a kulongo, ole Maro iyege bareme mai kiong ke sungunu tani a ilo, inbe bareme tani in sila iken sokorai. Awete pong nen, nookoot nga o ke be di tooltool kiong tikamatau mulu tiap, le ilo ye lal yo be tiyei ne, ‘Maro kuyeie urata dook mata pang tool yo isi ye Tool Mai ene i.’ ✡ Rau ke Woungu 118:26 ”