1 Paulu iye Selas tipa le la pombe muku ye malala yo ene Debe i, motong la tipa mulu ngan le la pombe ye malala san yo Listara i. Ngan tila ye malala tani ngan yaru tipuske Yesu galiunu atu yo ene Timoti i, in iyepepe. Ngan Timoti tani tinana in ke Yuda, inbe tinana tani in itara lono medana pang Yesu lapau, bong tamana in ke Girik. 2 Ngan di diedi kapala yo titara lodi medana pang Yesu a tiyepe Listara le Aikoniam nga, ngan tipayiti Timoti ye dada ki yo iyei nga. 3 Ngan Paulu tani in lono be ikauu a tiye tipa ye panga kidi yo be tipa ye i. Le nga ikaua Timoti la ikoro tinini, yesoo lon rru ye di Yuda yo tiyepe ye malala tina yo be tipa pang ye nga. Ngan iyei nen, yesoo bong di Yuda tina ngan di le imot lodi galanga ben Timoti tamana in ke Girik. 4 Motong la Paulu iye Selas tiye Timoti tani in tipa a tila ye malala mai in le ngan tipa mulu a tila ye san, inbe tiwetewete pang di tooltool yo titara lodi medana pang Yesu koot nga, ngan ye betanga tani yo muku ngan di aposol ke Yesu, tiye di kuto maimai tigaua Yerusalem a tirauu i, in pang di be titoo. 5 Ngan tina tipamede lodi ye betanga nen nga, le di tooltool tina yo tigaua ye bareme ke Yesu nga, ngan kinkatingi kidi idikdik mulu a ilo pang ete ye ke nga le imot.

6 Motong la Paulu iye di ene tina ngan tipa kataunu ke tana mai ru yo Pirigia inbe Galesia ngan leu, yesoo Maro Amunu Silene iwetekala di be kin tila la tiwetewete bingi dook mata pang di tooltool ke tana mai Esia be. 7 Motong la tipa le tila ye ker ke tana mai Misia, le nga be tipa so a tila la pombe ye tana mai Bitinia, bong ngan Yesu Amunu ilele di mulu be kin tila be. 8 Le nga tikapusu Misia, inbe tipa so le du pombe ye malala mai Toroas. 9 Motong la tiyepe a bong be tiken, ngan Paulu ikamata mianga atu. Ngan le ikamata tool atu ke tana mai Masedonia be ikodo, inbe itoru Paulu a imangmang ye nen, “Paulu, kupa so le kupot Masedonia, a nen ngan pot kulonam lapau!” 10 Ngan Paulu ikamata mianga tani in a imot, motong la ammadit tina ngan le amsere dada yo be amdu pang Masedonia ye i. Ngan lomam galanga nen, Maro la ikiu am be du amwetewete bingi dook mata ki pang di tooltool ke Masedonia i.

11 Motong la amyiri ye ookoo atu la Toroas nga, le nga amkooi gorro motmot atu yo ene Samoteres in a amdu. Le nga du amyepe nango le bongbongini ki, motong la amkooi mulu le du pombe Niapolis nga. 12 Motong la amyege Niapolis, inbe ampa mulu le la pombe Pilipai. Ngan malala tani in di Rom tilong tiyepe ye, inbe tiyeii le iyei ben malala maiyoko atu le imuku pang tana mai yo Masedonia i. Le nga la amyepe ye ke kapala ye malala tani in.

13 Amyepe nango, inbe lal kidi Yuda ke sungunu pombe, le nga ampa ye dada ke koongoo ke malala mai tani in a amdu ke diki, motong la ampa le amla ye ran atu koonoo. Ngan lomam tar be potai pang ye ran tani in o ni sa dook mata ke pataraungu. Amla ngan amkamata di garup pattu yo tigaua a tiyepe nga. Motong la du amye di amwur a amwetewete. 14 Ngan di garup tina yo tiwurur a titar talngadi ye betanga kiam nga, ngan atu in ene la Lutia i. Ngan Lutia tani in garup ke malala mai Taiataira, inbe ya in iyei urata ye wam kooroonoo dook mata* Ngan wam yo kooroonoo dook mata i, in dawa ben purupuru bolana. a iyawar be ikap pat ye. Inbe ya in isung pang Maro kidi Yuda lapau. Ngan nen le Tool Mai iportaka Lutia lono le itar talngana ye betanga ke Paulu yo iwetewete nga. 15 Le nga tirriui Lutia tani in iye di tooltool yo iye di tiyepe ye rumu ki, ngan lapau. Motong la iwete pam nen, “Kumata le lomim tar ben au i atara lok medana moolmool pang Tool Mai nga, ngan kaman man ayang tayepe ye rumu kiau i.” Ngan iwete pam nen le koon mede ye betanga le nga amtoo betanga ki.

16 Ye kene atu in ampa a be amla pang ye ni ke pataraungu, ngan amtauaraia garup poranga atu yo so sadi idiwidiwoo i, in dada. Ngan garup tani in so sadi iyepe ye le ke be iwete nin so yo be pang dama ni ngan pompombe nga. Ngan nen le di tooltool yo tiyei kuto maimai panga nga, ngan tikap wele pat ye urata ki tani yo iyeii i. 17 Motong la garup tani in itoo am amye Paulu, inbe koonoo le mai, a iyei ne, “Ai, di tooltool nga kapraingi ke Maro yo iyepe ete ni! Di ngan timan be man tiwetewete pang ye dada yo be Maro ikau ang a ipamulang ye i!” 18 Ngan iyei dada nen ye ke alunu nga, le nga Paulu ilongo betanga ki le le tinin booroomoo ye, motong la iportak tina ngan le ipasak pang so sadi tani in nen, “Ai, awete pong nen, ye gurana ke Yesu Kirisi ene nga, ngan kupas a kukoo ye garup in.” Ngan le pattu leu, inbe so sadi tani in ipas a ikoo ye a ila.

19 Ngan so sadi tani in ipas ye garup poranga tani a ikoo, inbe di kuto maimai ki tikamata ben dada kidi yo ke kaungu pat in tigarungu koot nga, le nga timan tina le tila la tiparama Paulu iye Selas, inbe tiyololo di yaru a be tila pang ye di kuto maimai kidi ye ni ke gaongo. 20 Motong la tikap di yaru a tila ye di tooltool maimai tina ke karatanga betanga a la tiwete pang di nen, “Ai, di tooltool ru nga ke Yuda, ngan yaru nga man tiyei dada dook tiap le tigarung burungu kidi tooltool ke malala mai kiidi i. 21 Inbe yaru nga timan be man tipatomonai di tooltool kiidi a be titoo dada le momo kapala yo tigunkalidi tooltool ke Rom be tayei be nga.”

22 Ngan di tooltool malala mai tina yo timan tigaua nga, ngan tilongo tina yo di kuto maimai ke garup tani in tiwete nen nga, le nga di lapau titaula ye di a tisopo koodi ye betanga pang Paulu iye Selas tina. Motong la di tooltool maimai ke karatanga betanga tina ngan tiwete pang di tooltool be tidur sousoungu ke Paulu iye Selas, inbe tikap koro a tisalit di yaru ye nga. 23 Ngan le di tooltool tina ngan tirau welewele di le dook tiap yege, motong la titar di yaru lo rumu dook tiap kidi talnga dikidiki lono. Inbe di tooltool maimai ke karatanga betanga tiwete betanga medana pang tool yo matan kala rumu dook tiap tani i, in be matan kala di yaru dook. 24 Motong la tool tani yo matan kala rumu dook tiap i, in ilongo betanga medana nen, le nga ikap di yaru lo itar di ye rumu sokalana yo iken rumu dook tiap tani in lono meneng kataunu yege ni. Inbe ikapisi yaru kedi le imede ye kai yo tisapu le menmenngana i.

25 Paulu iye Selas tina ngan tiyepe nango le bong kataunu, motong la yaru tipatarau, inbe tiwou woungu yo ke Maro nga. Le nga di diede kapala yo tiye di tiyepe rumu dook tiap tani in lono nga, ngan titar talngadi pang di. 26 Ngan yaru tiyei nen le mooloo tiap inbe nauningi mai itak le saua ke rumu dook tiap in golong golongbe. Le tina dada ke rumu dook tiap tani in koon panganga le imot, inbe ooroo medana tina yo tipau di tooltool ye nga, ngan posok posokbe ye di le imot lapau. 27 Le nga ye kene tani in tool yo matan kala rumu dook tiap tani, in imadit ngan ikamata dada yo koon panganga le imot nga, le nga iyeisa di tooltool yo tiyepe rumu dook tiap in lono nga, ngan o tikoo a imot oo. Motong la iposo pul ki ke patokongo in a be ya taunu ikurummate ye. 28 Bong ngan Paulu ikamata, le nga koonoo panga le mai a ilele nen, “Ai, kin ong taum kugarungong be! Am le imot nanga la amyepe nga.”

29 Paulu koonoo nen, motong la tool tani yo matan kala rumu dook tiap i, in koonoo pang di tooltool be tikaua sul panga a tise. Motong la tool tani in idada a ilo ye rumu sokalana yo Paulu iye Selas tiyepe ye i. Ngan itattadai a itangarur, le nga igun turunu du Paulu iye Selas tina, ngan kedi punu. 30 Motong la tool tani in imadit a ikap di yaru a tisi ke tana, motong itor di yaru nen, “Di maimai nga, ngan ole ayei belei, a be nen ngan Maro ikau au a ipamulau nga?”

31 Motong la yaru tiwete panga nen, “Kumata le be kutara lom medana pang Tool Mai Yesu nga, ngan ole Maro ikau ong kuye di tooltool yo kuye di kayepe ye rumu kiong nga, ngan a ipamulang ye so dook tiap yo be igarungang i.” 32 Motong la Paulu iye Selas tina ngan tiwete betanga ke Tool Mai panga inbe pang di tooltool tina le imot yo tiye tiyepe ye rumu ki nga. 33 Motong la ye bong in tool tani yo matan kala rumu dook tiap i, in ikap di yaru a ingas botoboto kidi. Motong la Paulu iye Selas tirriuu le ipa ye di tooltool ki yo iye di tiyepe ye rumu ki nga. 34 Tirriu di a imot, motong la tool tani yo matan kala dada ke rumu dook tiap i, in ikap di yaru a tila rumu ki la ikap kaningi pang di a tikan. Inbe iye di rara ki yo iye di tiyepe nga, ngan di le imot lodi ponana kaiye, yesoo ye yo nookoot nga titara lodi medana pang Maro koot nga.

35 Ye kene tani in bong a du muntu, motong la di tooltool maimai tina ke karatanga betanga nga, ngan tiwanga di bianga kidi be la tiwete pang tool tani yo matan kala rumu dook tiap in nen. Tiyei ne, “Ai, di tooltool maimai ke karatanga betanga tiwete be kupadu di tooltool ru ngan, a tila.” 36 Motong la tool tani in la iwete pang Paulu nen, “Di tooltool maimai ke karatanga betanga ngo tiwete be apadu ang angru a kala. Le nookoot nga ole angru kayege rumu dook tiap i a kala. Ngan nanga, kala la kayepe ye lo silene dook mata.”

37 Ngan tool tani in la iwete pang Paulu nen, motong la Paulu iwete pang di bianga tina nen, “Ai, amru nga emam iken ye rau ke Rom, le am nga tooltool ke Rom. E nga yelei be di tooltool maimai ke karatanga betanga lodi be tilongo betanga kiam amru dook a be nen ngan tipuske betanga yo moolmool i, in tiap nga? Di ngan tiwete le tirau sokorai am la di tooltool matadi, motong la titaram amru lo rumu dook tiap kidi talnga dikidiki lono. E nookoot nga be titarkoo di a be tipadu am sollono a amla, too? Tiap yege! Ole di tapdi timan, ngan la be man tipadu am amru a amdu tana nga.”

38 Motong la di bianga tina ngan tikap betanga ki a timulu la tiwete pang di tooltool maimai tina ke karatanga betanga nga. Ngan yeisa be di tooltool maimai tina ngan tilongo betanga ben Paulu iye Selas tina ngan edi iken ye rau ke Rom nga, ngan le titattadai welewele. 39 Motong la di tooltool ke karatanga betanga tina ngan tila ye rumu dook tiap kidi talnga dikidiki tani la tisoraia Paulu iye Selas tina, inbe tipadu di yaru a tidu tana. Motong la tiwete pang di yaru a tiyege malala mai tani in a tila nga. 40 Tipadu di a tidu tana, motong la yaru tipa le tila ye rumu ke Lutia. Tila ngan tikamata di diedi kapala yo titara lodi medana pang Yesu nga, le nga tiye di tigaua inbe tiwetewete pang di a tipamede di ye betanga a imot, motong la yaru tiyege malala mai tani in a tila nga.