1 Ye kene yo be kuwete pang tool tamoto yo maiyoko a kulele ye dada dook tiap ki yo iyei nga, ngan kin kuwete katkat a kupasak panga be. Bong ole kuwete betanga mos panga dawa ben yo kuwete pang tamam nga. Inbe kuyei dada dook mata pang di tamoto yo kakase paunu, ngan dawa ben yo kuyei pang di toom le taim nga. 2 Inbe kuyei dada dook mata pang di garup yo maimai nga, ngan dawa ben yo kuyei pang tinam nga. Inbe kuyei dada dook mata pang di garup yo kakase paunu ngan lapau, dawa ben yo kuyei pang di lim nga. Le kuyei dada dook mata leu pang di garup kakase paunu tina, a be nen ngan kuyepe le taukam busunu ye Maro matana.

3 Le kumata be garup iyei tap a ya taleu iyepe le tool sa iloni tiap nga, ngan lok be kuloni a matam kala dook. 4 Bong kumata le be garup tap atu be di natunu too di tiunu tiyepe nga, ngan ole titoo dada dook mata ke Maro muku pang sokadi tani yo iyei tap i. A be nen ngan tirau urata kootoonoo kidi tinadi le tiudi ye urata kidi yo muku ngan tiyei ye di nga. Ngan dada dook mata yo nen, ngan la Maro lon ponana ye nga. 5 Ngan garup tap moolmool i, in tap la ya taleu iyepe le tool sa ke be iloni tiap i. Nen le itara lono le atu pang Maro, inbe ipatarau ye ke le bong tina yo kanakana ngan a itoru be iloni. 6 Bong kumata be garup tap yo iyepe ngan iyei dada dook tiap yo lono be iyei a lono ponana ye i, in ole iyepe le dawa ben tool matene ye Maro matana. 7 Le betanga tina nga, ngan ole kuwete pang di tooltool yo tigaua ye bareme ke Yesu ngan lapau, a be nen ngan tool sa o ke be iwete mur ye di tiap. 8 Nen le kumata be tool sa ilon di rara ki dook tiap nga, inbe ilono ya taunu tinana too tiunu garup dook tiap lapau nga, ngan tool tani in iwala murini pang lono medana yo itaru pang Maro i. Le dada dook tiap ki yo iyeii nen i, in le illos dada dook tiap kidi tooltool yo ke Kirisi tiap ngan tiyei nga.

9 Nga be awete nin di garup tap yo be kuwodo edi ilo ye rau a be kalon di nga, ngan kumata di tap la rai kidi sangaul limi be atu inbe ilo pang ete nga. Inbe tap la matana pang ye tamoto ataleu tani yo iyooloo koot i ye kene yo imata tiao nga. 10 Inbe kumata garup tap la di tooltool tikamata ngan tipayiti ye dada dook mata ki yo iyei nga, ngan ben yo matan kala di natunu dook mata nga, inbe yo ikamata di lowo nga, inbe yo ingas di tooltool ke Kirisi kedi nga, inbe yo ilon di tooltool yo tisolo urata moonoo nga, inbe ye yo iraia lono be iyei urata dook mata le imot pang di tooltool nga. Ngan di garup yo tiyei dada dook mata nen nga, ngan di leu la be kuwodo edi ilo ye rau nga. 11 Bong kin kuwodo di garup tap yo tinidi paunu, ngan edi ilo ye rau be. Ngan kumata be kuwodo edi lo ye rau, lo ngan be tinidi iyolo pang di mulu be tikere nga, ngan ole tigarungu betanga yo tipamede a iken kataunu kidi tiye Kirisi i. 12 Le ye dada kidi yo tiyei nen nga, ngan ole di tapdi titar di tilo ye Maro baene be iyemenai di ye yo tillung a tipamede betanga pang Kirisi, motong tidada betanga kidi tani yo tipamede muku, in pono nga. 13 Inbe tiyei nen leu tiap, bong tinidi booroomoo a tiyepe le ngan tipa a tila ye rumu ke tool in, le ngan tila ye san a matadi so di tooltool ke rumu tina ngan. Ngan tinidi booroomoo a tiyei nen leu tiap, bong ole tiwete mur ye di diedi, inbe tiyei kalakala di tooltool ye urata kidi yo tiyei nga, inbe tiwete pang di ye betanga yo ke be tiwete tiap nga. 14 Ngan ye dada yo nen nga, ngan la le akap betanga pang di garup tap yo tinidi paunu go nga, ngan be tikere mulu a tipasui di natudi, inbe tiyei dada dook mata yo be matadi kala di niditooroo le di natudi ye nga. Kumata be tiyei nen nga, ngan la be di koi kiidi tikamata so sa yo dook tiap ke be tiwete mur yidi ye, ngan tiap nga. 15 Ngan yo a le awete pong nen nga, yesoo di garup tap tina nga, ngan kapala tiwala muridi pang dada dook mata, inbe la titoo dada dook tiap yo ke Satan nga.

16 Ngan nanga, kumata garup atu yo itara lono medana pang Kirisi, in be di sokana tiyei tap nga, ngan ya taunu la be ilon di i, a be nen ngan di tooltool yo tigaua ye bareme ke Yesu ngan ke be tilon di, ngan tiap. Bong be nen ngan tilon di garup tap kapala yo di leu tiyepe le taukadi tooltool yo be tilon di nga.

17 Ang di tooltool yo katara lomim medana pang Yesu nga, kakamata di kuto maimai kiang yo tiyei urata a matadi kalang dook mata nga, ngan karaua pang di, inbe kakap pat le so kapala yo be kalon di ye nga. Nen le di tooltool yo tiwetewete bingi dook mata ke Maro pang a tipatomonai ang ye nga, ngan la be kalon di dook mata nga. 18 Ngan awete nen, yesoo betanga yo iken ye Rau ke Maro i, in iwete nen, “Ye kene yo be kakap urata pang bulumakau kiang a ipa be iyirngan dingding patunu ngan kulini du tana nga, ngan kin kupaukala koonoo a ikan so tiap ngan be.”✡ Ger 25:4 Inbe Rau ke Maro iwete nen lapau, “Kumata le be tool iyei urata nga, ngan la be ikap so ye urata kootoonoo ki nga.”✡ Luka 10:7 19 Ngan kumata le tool atu iwete be di kuto maimai kiang tina ngan atu be iyeie dada dook tiap ke noonoo nga, ngan kin kulongo betanga ki be. Bong be nen ngan tool ru too tol tiwete pong ye betanga tina yo nen nga, ngan la be kulongo betanga kidi nga. 20 Nen le di kuto maimai kiang tina ngan sa be ikapsap ye dada yo dook tiap ke noonoo nga, ngan ole kugaua di tooltool yo tigaua ye bareme ke Yesu nga, inbe kuwete panga a kulele ye dada dook tiap ki yo iyei nga, ngan mallangana, a be nen ngan di diene kapala be tikamata ye matadi, ngan titattadai, ngan o ke be tiyei dada dook tiap yo ke noonoo, ngan tiap.

21 Timoti, nga be awete betanga medana pong ye Maro iye Yesu Kirisi, inbe ye di bangabangana ke Maro yo ipootoo di panga nga, ngan matadi nen, be kutoo betanga kiau tina yo apatomonai ong ye nga, ngan dook le imot. Ngan nanga, ole kuyeie dada gaongo leu pang di tooltool le imot, bong ke be kuyeie dada atu pang di kuto maimai, inbe san pang di tooltool yo sokorai ngan be.

22 Kin katem ro ye tool yo be kataru a iyei kuto mai pang di tooltool yo tigaua ye bareme ke Yesu i, in a kupaloko baem lo kutono a kupatarau ye palbe be. Ngan kumata be kuyei nen le kuto mai tani, in be iyeie dada dook tiap sa ke noonoo nga, ngan noonoo ki tani ole man irookong. Le be nen nga, ngan ong taum koptutong dook a kuyepe le taukam busunu ye Maro matana.

23 Timoti, kin kuyin ran sokorai leu be, bong kuyin ooroo wain surunu ngan kasin lapau, a be nen ngan ikarata kapom lono a igiri matamatenge yo iken kapom lono a ipulke ong mata i.

24 Di tooltool kapala ngan be tiyei dada dook tiap ke noonoo nga, ngan ole dada dook tiap kidi tina, ngan ise pombe mallangana a takamata ye matada. Inbe bingi ke noonoo kidi tina, ngan ole imuku pang ye ni ke karatanga betanga. Bong di tooltool kapala ngan dada dook tiap kidi ke noonoo yo tiyei nga, ngan iken sollono a tayepe kasin lo ngan be ise pombe mallangana a takamata ye matada. 25 Ngan nen le gaongo leu, di tooltool ngan be tiyei dada dook mata nga, ngan ole dada dook mata kidi tina, ngan se pombe mallangana a takamata ye matada. Inbe dada dook mata kapala yo di tooltool tiyei nga, ngan o se pombe mallangana tarai tiap, bong ke be iken sollono le iken so tiap. Ngan nen le kin katem ro ye tool yo be kataru a iyei kuto mai pang di tooltool yo tigaua ye bareme ke Yesu in be.