23
1 Ídrĩ ri ãkónã nalé ꞌbá ãmbógó be
lẽ ína ãkónã ajílé ími drị̃lẹ́ gá rĩ ádrízã mgbã rĩ sĩ,
2 ãzíla ídrĩ adru ꞌbá rọ̃mgbọ́ ru la,
mí ụtrị́ ími ũcógóŋá idélépi kólókóló rọ̃mgbọ́ sĩ ꞌdã drị̃,
3 mí idé ũlẽ ãkónã ãjị́ ambamba ꞌbãlé ãmbógó ní rĩ kí sĩ ku;
icó adrulé ãkónã sĩ ími isíjó la rá.
4 Mí iza ími ũkpó pírí sĩ málĩ ndrụ̃jó ku,
mí adru ũndũwã rú sĩ ị́jọ́ ꞌdĩ drị̃ atrịjó,
5 ãꞌdusĩku málĩ la ãvĩ ꞌbá drị́ gá ꞌdâ mịfị́ ꞌbã ru bĩjó kámị́ rĩ áni,
ụ́pị́pị́ la drĩ kí ãrũ ꞌbo,
ĩꞌdi nga ũlí gá cécé yụ́kụ̂ ꞌbã ngajó rĩ áni.
6 Ína íná ꞌbá ĩndrá rĩ drị́ ku,
ími ũlẽ ꞌbã ãngã íná ĩꞌdi ãni ãjị́ ambamba rĩ sĩ ku,
7 ãꞌdusĩku ĩꞌdi ị́jọ́ ũrã ínâ ꞌbã ãjẹ̃ sị́ yã rĩ drị̃ gá.
Tị gá ꞌdâ ĩꞌdi jọ la míní, “Ína, íná ãzíla ímvụ ãko mvụlé mvụ-mvụ̃ rĩ kî,”
wó ásị́ agâlé ị́jọ́ ĩꞌdi ꞌbã jọlé rĩ adru ãfũlépi ĩꞌdi tị gâlé rĩ áni ku.
8 Mi uja íná were tá míní nalé ĩꞌdidrị̂lé rĩ kí gbẹlé rá
ãzíla mi ãwãꞌdĩfô míní fẽlé ĩꞌdiní rĩ kí iza rá.
9 Íjọ ị́jọ́ ꞌbá azalépi aza-azâ rĩ ní ku,
ãꞌdusĩku ĩꞌdi ímbátáŋá míní fẽlé ĩꞌdiní rĩ kí ide-ĩdẽ.
10 Mí uja jõ lõkókõrí ꞌbãlé ándrá údu sĩ ãngũ awajó rĩ ꞌbã mịfị́ ku
jõku ífi ĩmvú ꞌbadrị́ ámvụ́ agá ku,
11 ãꞌdusĩku ꞌbá kí tãmbalépi rĩ ũkpõ trũ;
ĩꞌdi ími drị̃ gá ị́jọ́ lị rá.
12 Íꞌbã ími ásị́ ímbátáŋá drị̃ gá;
ãzíla ínzị̃ ími bị́lẹ́ mgbọ rú sĩ ị́jọ́ ũndũwá ru rĩ kí arejó.
13 Mí ĩcẽ jõ ngọ́tị́ŋá mídrị̂ ị̃ndụ́ co agá ímbátáŋá ru rĩ gá ku,
ídrĩ ngọ́tị́ŋá ị̃ndụ́ co kẹ̃lị́ká sĩ ímbátáŋá ru, icó sĩ drãlé ku.
14 Ídrĩ ngọ́tị́ŋá ị̃ndụ́ co kẹ̃lị́ká sĩ ímbátáŋá ru rá;
mi ĩꞌdi ídri pa drã agá rĩ sĩ rá.
15 Mâ ngọ́tị̂, ími ásị́ drĩ adru ũndũwá ru,
áma ásị́ dó adru ãyĩkõ sĩ;
16 áma ásị́ vâ adru ãyĩkõ sĩ,
ími tị drĩ ị́jọ́ pịrị rĩ jọ rĩ gá.
17 Mí adru ãjã sĩ ꞌbá ị́jọ́ ũnzí ngalépi rĩ kí sĩ ku,
wó rá la ụ́ꞌdụ́ pírí sĩ ími ásị́ ꞌbã ve ị́jọ́ Úpí ụ̃rị̃jó rĩ sĩ.
18 Ị́jọ́ míní sĩ ásị́ tị̃jó drị̃ la gá drị̃lẹ́ gâlé rĩ kí mi kí ịsụ́ rá
ãzíla ị́jọ́ míní ásị́ tị̃jó drị̃ la gá rĩ icó dó sĩ adrulé úyé ku.
19 Mâ ngọ́tị̂, mí are ị́jọ́, mí dó sĩ adru ũndũwá ru,
íꞌbã ími ásị́ sĩ acị́jó gẹ̃rị̃ pịrị rĩ gâ sĩ.
20 Mí icí mi ꞌbá íwá mvụlépi ambamba rĩ kí abe ku
jõku ꞌbá ĩzá nalépi rọ̃mgbọ́ ru rĩ kí abe ku,
21 ãꞌdusĩku ꞌbá íwá mvụlépi ambamba rĩ kí ꞌbá rọ̃mgbọ́ ru rĩ kí abe kí acá lẽmẽrí,
ãzíla ụ́ꞌdụ́ kojó rĩ la ími fẽ bõngó ũyóró sụ̃lé.
22 Mí are mí átẹ́pị ími tịlépi rĩ tị
ãzíla mí ide mí ãndrẽ ku drĩ táni adru ĩdránígó ru.
23 Mí ĩgbã míní ị́jọ́ mgbã rĩ ꞌi ãzíla mí ị̃tụ̃ndã ĩꞌdi ku;
índrụ̃ míní ũndũwã, ãrútáŋá ãzíla ị́jọ́ vãŋá.
24 Átẹ́pị ngọ́tị́ŋá ị́jọ́ mgbã rĩ ngalépi rĩ drị̂ la ãyĩkõ ãmbógó la ịsụ́ rá;
ꞌbá ngọ́pị̃ ꞌbã sĩ adrujó ũndũwá ru rĩ la uꞌá ĩꞌdi sĩ ãyĩkõ sĩ.
25 Lẽ mí átẹ́pị kí mí ãndrẽ be ꞌbã adru kí ãyĩkõ sĩ;
lẽ ũkú ími tịlépi rĩ ꞌba adru ãyĩkõ sĩ!
26 Mâ ngọ́tị̂, ífẽ mání ími ásị́ fô
ãzíla ími mịfị́ ꞌbã ndre ãngũ gẹ̃rị̃ mádrị̂ kí gá,
27 ãꞌdusĩku ãwụ́ꞌbá ĩꞌdi cécé ꞌbụ́ mgbi rĩ áni
ãzíla ũkú mịfị́ ãcí trũ rĩ ĩꞌdi cécé kídí lụ́rụ́ rĩ áni.
28 Ĩꞌdi ru la gẹ̃rị̃ tị gá ꞌbá ũtẽlé cécé ꞌbá ꞌbá ralépi rĩ áni,
ãzíla ĩꞌdi fẽ ãgọbị ũꞌbí ꞌbaní acájó ꞌbá Ãdróŋá nị̃lépi ku la kî rú.
29 Ãꞌdi ꞌi cãndí ru nĩ yã? ꞌBá ũcõgõ rú rĩ ãꞌdi ꞌi yã?
Ãꞌdi la ãwã nĩ yã? Ãꞌdi la unu nĩ yã?
Ãꞌdi ụrụꞌbá ụ̃kụ̃ ãkõzá ru ị́jọ́ ãzí kóru rĩ gá nĩ yã? Ãꞌdi mịfị́ ka ika rú rĩ gá nĩ yã?
30 ꞌDĩ kí ꞌbá íwá mvụlépi sáwã ãzo rú rĩ kî,
ꞌbá íwá usalé usâ rĩ mvụlépi rĩ kî.
31 Ími ũlẽ ꞌbã ãngã jõ íwá ꞌbã mịfị́ kalépi ika rĩ sĩ ku,
drĩ dị̃ kópõ agá ꞌdãá pãrã-pãrã,
drĩ sị vũ gâlé ũré ru!
32 Ãsị̃ŋá gá ĩꞌdi ꞌbá ga cécé ị̃nị̃ áni
ãzíla ũjũ la cécé galaꞌbá drị̂ áni.
33 Ími mịfị́ la ị́jọ́ ụ̃rị̃ fẽlépi rĩ kí ndre,
ãzíla mi ími ịpị́ ãfó sĩ ĩnzõ rú.
34 Mi adru cécé ꞌbá ru lalépi ụ́ꞌdụ́ gá gbọ́lọ́ sị́ gá gbọ́lọ́ ꞌbã sĩ ru ịcịjó ĩꞌdi trũ ịcị-ị̃cị̃ rĩ áni,
cécé ꞌbá ru lalépi gbọ́lọ́ sị́ gá gbọ́lọ́ ꞌbã sĩ ru ịcịjó wị̃rị̃gị̃lị̃ úkõ ãzí rĩ gá wị̃rị̃gị̃lị̃ ãzí rĩ gá rĩ áni.
35 Mi jọ la, “Gbã kí ma rá, wó îpẽŋã ma ku!
Co kí ma rá, wó má amá ãcóŋá ꞌdã ku!
Ãngũ la ụwị́ ãꞌdụtụ́
mání sĩ mụjó íwá ãzí rĩ mvụjó?”
23:19-21 Mâ ngọ́tị̂, mí are ãzíla lẽ mí adru ũndũwá ru,
íꞌbã ími ásị́ sĩ acị́jó gẹ̃rị̃ pịrị rĩ gâ sĩ.