1 Tsaraa mwiin, ne ngwani thib Mbak zhiil kuu ndeli yek yii Sión lon. Ne lo maa nzi thib gayoo chop galbthap mil men, re zha kuu nke le Mbak zhiil ne le Xut Mbak zhiil yeklo. 2 Ne mbin na thib bos kuu mroo yibaa, kuu nyoo bi taxal ta kwathoz nla nit ne taxal bi ngundii; ne lee bos kuu mbin na nataak taxal tyen bos re zha kuu nzhool arp. 3 Ne nzhool re zha thib kant kub lo Diox delant lo thap maa nabana ne delant lo re zha gola. Ne yent cho ngok gateed kanta, sinke beeta re thib gayoo chop gal thap mil zha kuu nali ngok lo Jesucrist lo yezlyu. 4 Re zhaʼa nak re zha kuu nambi mndo lo Diox, ngogt rop re zhaʼa kon neeka thib ngot ne kon neeka thib mbyi, re zhaʼa ndeke dits Mbak zhiil loka pa ta nda maa. Diox ne Mbak zhiil mtelaa re zhaʼa lo re men yezlyu ree, tsa lee re zhaʼa gak taxal gon kuu ner lo Diox ne lo Mbak zhiil. 5 Nambi nak re zhaʼa, tak neeka thib lan diiz kuu wlit mroot roo zha.

6 Tsa mwiin lee tedib mandad ndabi ndrol lobee, ne mandada nap Diiz Chul kuu nak thitanax, tsa taa zha kwente lo re men reta yez kuu nzi dib naxta lo yezlyu, lo reta raz ne lo reta zha kuu ndediz zhaapaa zhaapaa diiz lo yezlyu. 7 Ne dib gan zha mbez zha:

―Btseb goo ne goo Diox ne bil goo lo Diox, tak mzina wiz kuu lee Diox naab kwent lo reta men. Bil goo lo zha kuu mdexkwaa lobee ne yezlyu, nitdoo ne re xlen nit.

8 Tsaraa mndeke tedib mandad kuu nzhab:

―¡Mluzha Babilonia, yez naro, tak yez Babilonia mtsow lee reta men re yez mtsow thitanax kuu went, ne nake taxal mtetuz yez Babilonia re zha!

9 Tsaraa mndeke tedib mandad, kuu mbez dib gan:

―Os lee cho men gol lo maa kuu kwathoz nathoza ne lo imaj chaan maa, ne laa zha ke sey chaan maa yeklo zha o yaa zha, 10 teriid zhaʼa yalti thoz kuu yaad lo Diox, ne gu zha xit ub kuu nala, kuu nak yalnayii chaan Diox; ne lo ki ta nyol azufre rid zha yalti delant lo re mandad chaan Diox ne lo Mbak zhiil. 11 Ne lee tsen chaan yalti kuu rid re zhaʼa nkendab thitanax. Ne tse ne yaal neyt re zha kuu gol lo maa kuu kwathoz nathoz na ne lo imaj chaan maa, o re zha kuu ke sey chaan maa. 12 Kona, lee re zha kuu nak zha yez chaan Diox, nzhon zha diiz xkiiz Diox, ne nali ndo zha nyelaaz Jesús, ndoblo xek zha.

13 Tsa mbin na thib bos kuu mroo yibaa, kuu ne lon:

―Bkee koree: “Wen nda re zha kuu nak zha, Zha Nabee, re zha kuu gath naltseree par delant”.

―Wliy ―ne Mbi Nayon―, tak lee re zha roxkwan zha lo re rtsin zha, tak lee re kuu wen kuu mtsow zha ndekey dits zha tsowe ayud zha.

14 Tsa mwiin, ne ngwani thib xkow naguz lon; ne dits xkowa ndob thib zha kuu na taxal, Zha Kuu Mzin Ngok Men. Ne ndob thib koron or yek zha, ne nzo thib hoz kuu nale yaa zha. 15 Ne lee tedib mandad mroo leen gwodoo chaan Diox, ne dib gan mandad mbez mandad lo zha kuu ndob dits xkowa:

―¡Bloo hoz chaana ne bthop yalgonn kuu nzi lo yezlyu; tak ngoklo lee dope!

16 Tsa lee zha kuu ndob dits xkow mloo hoz lo yezlyu, ne mthop zha re yalgonn kuu ndab lo yezlyu.

17 Tsa lee tedib mandad mroo leen gwodoo kuu ndob yibaa, ne noga yaa mandada nzo thib hoz kuu kwathoz nale. 18 Ne lo bkoog mroo tedib mandad, kuu nap yalnabee lo bel, ne dib gan zha nzhab zha, lo mandad kuu nden hoz kuu kwathoz nale:

―Bloo hoz chaana, ne bga re zhit luts ub kuu ndab lo yezlyu, tak ngwiya re ub.

19 Tsa lee mandad mloo hoz lo yezlyu, ne mthop zha reta ub kuu ndab lo yezlyu, ne mloo zhay ta ndiiy, koree nak yalti thoz kuu taal Diox. 20 Ne thib lad roo yez mtii zha ub, ne lee leen ta ndii ub mroo ren kuu mzin asta xann fren roo kabay, ne mzhoy teeka thib tson kilometro.