1 Lee Saulo be nayiika ne re zha kuu nyelaaz Jesús, ne nlaaz Saulo kuth re zha. Tsa ngwa Saulo lo ngwleyy kuu nabee lo reta ngwleyy. 2 Ngwanaab Saulo thib yeets, tsa tak ya Saulo yez Damasco re ta nkaltaa re zha nteed zha xkiiz Diox, tsa liib Saulo mbyi na ngot kuu nyelaaz Jesús, ne teno Saulo zha tsa yo zha tsib yez Jerusalén. 3 Per leettsa ndo Saulo net gaxta yez Damasco, tsa cha mroo thib xni lobee kuu mla dita ta ndo Saulo. 4 Tsa ngob Saulo lo yu, ne mbin Saulo thib bos kuu nzhab lo Saulo:

―Saulo Saulo, ¿chebee ndrekeʼa ditsʼn?

5 Tsa mnaabdiz Saulo:

―¿Cho naka Zha Nabee?

Ne lee bosa mkab lo Saulo, ne nzhab:

―Na nak Jesús, zha kuu ngerekeʼa dits. 6 Gwateli ne gwa yez Damasco, tya ne zha loʼa naa kwan ndoblo tsowa.

7 Ne lee re zha kuu nda kon Saulo kwathoz mzeb zha, tak mbin zha bos, per yent kwan mloo lo zha. 8 Tsa ngwache Saulo; ne or mxaal Saulo ngutlo Saulo, nyenit raa ngutlo Saulo. Tsa mzhen re zha kuu nda kon lee Saulo yaa Saulo ne mndeno zha Saulo yez Damasco. 9 Tya ngoo Saulo tson wiz ne ngwanit lo Saulo, neeka thib kuu ndowt Saulo ne neeka thib kuu ngwiit Saulo.

10 Ne yez Damasco nzo thib mbyi kuu le Ananías kuu nyelaaz Jesús. Ne lee Jesús ngwanii lo Ananías, ne nzhab lo Ananías:

―¡Ananías!

Tsa lee Ananías mkab ne nzhab:

―Leen ndo nzhee, ¿kwan nlaaza Zha Nabee?

11 Ne lee Zha Nabee nzhab lo Ananías:

―Bteli ne gwa kay kuu le Nali, ne liz Judas naabdiza thib mbyi zha yez Tarso kuu le Saulo, tak lee Saulo ngenaab lon. 12 Tak lo Saulo ngwani thib mbyi kuu le Ananías, kuu mndaab ne mxoob yaa yek Saulo, tsa yeni lo Saulo tedib welt.

13 Or mbin Ananías kona, tsa nzhab Ananías:

―Zha Nabee, kwaro zha ndaa kwent chaan mbyiʼa lon, ne re kuu went kuu ntsow Saulo lo re zha kuu nyelaaza Jerusalén. 14 Ne lee nal ndyaad Saulo nzhee ne nap Saulo yalnabee chaan re ngwleyy kuu nabee lo re ngwleyy, tsa ten Saulo re zha kuu nyelaaz lu nzhee ne teno Saulo re zha Jerusalén.

15 Per lee Zha Nabee nzhab lo Ananías:

―Gwa, tak mliʼa na mbyiʼa par taa zha kwent xkizʼn lo re zha kuu nagt zha Israel, ne lo re rey yezlyu, ne noga lo re zha Israel. 16 Na loo lo Saulo lee Saulo ndoblo rid kwathoz yalti, leettsa taa Saulo kwent xkizʼn.

17 Tsa lee Ananías ngwa yuu ta mlet Saulo, ne or mndaab Ananías, tsa mxoob Ananías yaa Ananías yek Saulo, ne nzhab Ananías:

―Wets Saulo, lee Jesús Zha Nabee kuu ngwani loʼa or ndyaada net mtaalʼn, tsa yeni loʼa tedib welt, ne kayaaʼa Mbi Nayon chaan Diox leen leettsooʼa.

18 Ne oraaka ngob thib kuu na taxal med mbel ngutlo Saulo, ne mre ngwani lo Saulo tedib welt, tsa ngwateli Saulo ne ngokleyy Saulo. 19 Tsaraa ndow Saulo tsaraa mkaa Saulo fwers, ne mlet Saulo thiban wiz lo re wets kuu nyelaaz Jesús kuu nzo yez Damasco.

20 Tsa lee Saulo mndelo mndaa kwent xkiiz Diox, lo re men ta nkaltaa re zha Israel nteed xkiiz Diox, ne mbez Saulo lee Jesús nak Xgann Diox. 21 Reta zha kuu nzhon kuu mbez Saulo; mzegey leettsoo re zha ne mbez zha:

―¿Chu leet zha ree kuu ndreke dits re zha Jerusalén kuu nyelaaz Jesús? ¿Chu ndyaadt zha nzhee, tsa ten zha re zha kuu nyelaaz Jesús ne teno zha zha lo re ngwleyy kuu nabee lo re ngwleyy?

22 Ne taxal ndriid wiz lee Saulo ngoo ney raa leettsoo, ndaa kwent xkiiz Diox, ne kwathoz nambi nzhab Saulo lee Jesús nak Crist Kuu Mtaal Diox Nabee, tsa lee re zha Israel kuu nzo Damasco, net zha naa kwan tsow zha xgab.

23 Ne lutta ngwatey lee re zha Israel kuu nzo Damasco myaan diiz kuth Saulo, 24 per myeen Saulo lee re men nlaaz kuth Saulo. Tse ne yaal ntow zha lo Saulo roo pwert yez, tsa kuth zha Saulo. 25 Per lee re zha kuu nyelaaz Jesús, yaal mloo zha Saulo leen thib chekwit ne mlaa zha Saulo lad cho blaa kuu now dita yez. Tbaa mroo Saulo yez.

26 Leettsa mzin Saulo Jerusalén, ngwalaaz Saulo gakaltaa kon re zha kuu nyelaaz Jesús tya; per reta zha nzeb lo Saulo, tak nyelaazt re zha lee Saulo nyelaaza Jesús. 27 Per lee Bernabé ngwano Saulo lo re apóstl. Ne nzhab Bernabé naa xomod mwii Saulo ne mni Jesús lo Saulo or ndo Saulo net nda Saulo yez Damasco. Ne xomod mzebt Saulo mndaa Saulo kwent chaan Jesús yeza 28 Tsa lee Saulo myaan Jerusalén ne ndiy Saulo kon re zha. Ne mzebt Saulo ndaa kwent chaan Jesús. 29 Ndediz Saulo ne ngyodiz Saulo kon re zha Israel kuu ndediz diiz gryeg; per lee re zha ree nlaaz kuth Saulo. 30 Leettsa myeen re zha kuu nyelaaz Jesús kona, tsa mndeno zha Saulo asta yez Cesarea, ne tya mtaal zha Saulo yez Tarso.

31 Tsa lee re zha kuu nyelaaz Jesús, kuu nzo re yez chaan Judea chaan Galilea ne chaan Samaria, wen ngoo re zha tak ndreket raa zha dits zha, ne xlaazga mas wen myen re zha xkiiz Diox ne nzhon zha diize, ne lee Mbi Nayon mtsow masraa myazh re zha kuu nyelaaz Jesús.

32 Ne leettsa ndiy Pey re yez nyatwii Pey lo re zha kuu nyelaaz Jesús, noga ngwa Pey lo re zha kuu nyelaaz Jesús kuu nzo yez Lida. 33 Tya mzal Pey thib mbyi kuu le Eneas, kuu nax ne ndak ne ndaʼa xon liin gagt gwin Eneas. 34 Tsa nzhab Pey lo Eneas:

―Eneas, mtegweʼa Jesucrist lu. “Gwache ne blit daʼa”.

Ne oraaka ngwache Eneas. 35 Ne mne reta zha kuu nzo yez Lida ne re zha kuu nzo laats Sarón kona, ne ngwalaaz zha Jesús.

36 Ne tsya ngoo thib ngot kuu nyelaaz Jesús yez Jope, kuu lee Tabita (diiz gryeg le zha Dorcas). Lee ngot ree thibka mtsow yalwen, mtsow Dorcas ayud re zha prob dita lo mban Dorcas. 37 Ne re wiza mlen liz Dorcas ne nguth Dorcas, ne ngwalo mtegat zha Dorcas, tsa mxoob zha Dorcas leen yuu kuu ndob yek yuuʼa. 38 Ne gax yez Jope nzi yez Lida ne tya ndo Pey, ne or mbin re zha kuu nyelaaz Jesús lee Pey ndo tya, tsa mtaal zha chop mbyi ngwachez Pey, ne nzhab re zha lo Pey:

―Tsow yalwen nda yez Jope.

39 Tsa mndeke Pey dits rop zha, ne or mzin re zha, tsa mndeno zha Pey yuu ta nax thebol, tya nzi re ngot byud nzhonn, ne mloo re ngot re lar kuu mdexkwaa Dorcas lo Pey, leettsa bee naban Dorcas. 40 Tsa mnabee Pey mroo reta zha kuu nzi tya, tsa mtobxub Pey ne mnaab Pey lo Diox: Ne ora mwii Pey lo thebol ne nzhab Pey:

―¡Tabita, gwache!

Tsa lee ngot mxaal lo, ne or mxaal ngot lo ngot mwii ngot lo Pey, ne mndob ngot. 41 Ne lee Pey mzhen yaa ngot mtsow ayud ngot mndeli ngot, tsaraa mrez Pey re zha kuu nyelaaz Jesús ne re byud, tsa mwii re zha lee ngot naban. 42 Ne dita yez Jope myath koree ne kwaro zha ngwalaaz Jesús. 43 Ne lee Pey myaan thiban wiz yez Jope liz thib zha le Simún kuu nteguuz yid.