1 Grë zha bgui gol ne nac bets ne i, zeeṉe zha rxiṉ zho, bieṉ gactoxd luu lo zho, sinque zaacse bnee lo zho zig nac zeeṉe lo pxoz luu nonee luu; niiclegaa zha nguiega, zaacse goc lo zho, beeṉ zho cuent zig tib bets luu. 2 Scaque grë meṉ wnaa ne nac zhagol, ndooladz bnee lo me, beeṉ cuent lo xniaa luu ga zo luu; lo grë wnaa nguiega, ndzinli goc, niowse bnee lo zho, bieṉ gaṉle rrieequia tib bzian luu ga.

3-6 Grë meṉ wnaa ne gutle tsieel, meṉ ne nlipaa choot rapd, to none cteedlo me; totsaque nli Diosse rnalo me, dze guieel tibaque nozodiidznie me Dios. Sac no zho mban zigne notaa guic zho, laa zho zienaḻ loxaque grë ncuaaṉe gdeed guxt xcuerp zho; zha ne sca ruṉ, rrieequia gutle zho ga. Laa teḻ meṉ wnaa ne scaque gutle tsieel, ni no xpëëd me, no xiag me, dzigo zha none cteedlo me; none cseed zho gaṉ zho meṉlidz zho, gaṉ zho pxoz zho, gaṉ zho xniaa zho, sac goṉ me pchoob zho. Sca nonguieḻa, ni scagaa rdziladz Dios.

7 Pso diidz rii lo grë zha ne nacgrë to i, zeeṉa cseed zho sca gban zho, ni scagaa tsod pe nacne gneenë miech zho. 8 Sac zha ne tsoxcod gaṉ zha ne nacgrë zho, ni miṉe mazdraa teḻne niicle meṉlidz zho tsoxcod zho gaṉ zho, rdzieeld dzigo guiab zho laa zho rliladz Dios, haxta mazdraa nac xtoḻ zho que tib zha ne gard gliladz me.

9-10 Ni stiba, grë meṉ wnaa viud qui zha ne rquiabladz guṉ pe xtsiiṉ Dios, bieṉ zha ne psale tsoṉgaḻ iz zha co psëëb lo list. Ni wen wen gocnaṉ teḻne:

11-12 Laa grë zha ne bii nguieg, ib yquiaad luu lë zho lo list co; sac nac wnaa nguieg, zeeṉe sob guic zho ctsieelnia zho, laa zho ctsieelnia stib. Loxaque guṉctal zho xtoḻ zho ga, teḻne glo rquiabladz zho guṉ zho xtsiiṉ Dios ni lozh ga laa zho csaanaquew. 13 Ni ye nac wnaa nguieg, rdziladz zho rquianzë zho; ni teḻne peet dziin guṉd zho, racgbech zho; ni stiba, zeeṉe sca guieṉd pe guṉ zho dzigo laa zho rzhixcuaa diidzguizh, laa zho rzëëb lo grë cuent ne rieguiaḻdraa zho. 14 Gacxe waa, racladz naa grëse wnaa nguieg ne sca ret tsieel, mazd ctsieelnia zho stib; zeeṉa yquiaanap zho xpëëd zho, yquiaanap zho ro lidz zho. Sca yguibd zho tso grë zha ne rlëëniele Xtiidz Jesús, gneenëraa zho zha ne rliladza. 15 Sac goṉ, blale wnaa ne sca gut tsieel zieriee xnëz Dios, leḻ laa zho zienaḻ grë miṉe rnabey meṉdox.

16 Psoladza gaṉle, teḻ cho tib zha bets ne, tib zha bzian ne i raclidz tib meṉ wnaa ne gutle tsieel, none zha gaṉ me, laa ne gnalo zho ne to yguib dieṉ zha gdiooṉ me; zeeṉa grë ncuaaṉe ruṉlo to i, zgaaw yquiin grë meṉ ne nlipaa guieṉd cho gaṉ.

17 Grë zha ne zo rnabey lo grë zha ne ngab xnëz Dios, zha ne zaacse noyuṉ dziin co, zig nac zha ne tibaque rnee Xtiidz Dios lo miech, zha ne rseedgaa miech zha naca, teḻ palal ncuaaṉe rcaa zho, ible rieguiaḻ ycaa zho chop lalgaw. 18 Gotsaa gwi ne gaṉle zha quia lo Xtiidz Dios, rneew: “Code to guiex ro xma to, zeeṉe no ma ye noguiits ma zhobxtil; ¡goḻsaan gow ma!” Laa stib lugar rnee: “Zha ne ruṉ dziin, ib none ycaa zho miṉe non xtsiiṉ zho.”

19 Bieṉ goṉ Timoté, zeeṉe guiaad zho lo luu, guiaad-zo zho tib meṉ ne rnabey lo to, ib yquiaadiagd luu miṉe rnee zho, teḻne gzod zho chop tsoṉ zha ne goṉ ne nli beeṉ me miṉe rquiaqui zho me. 20 Teḻne bind me diidz, bii noyuṉ me doḻ co, dzigo squi ndxie grë zha ne nacgrë to, goctox lo me; zeeṉa sca gdzieb grëraa zho guṉscad zho. 21 Zig zobwi Dios, zig zobwi Jesús grë xanjl me, laa naa rso diidz lo luu, beeṉ miṉe rne naa lo luu nu. Gdzieebd luu, yquiad zdoo luu, bnee lo zho teḻ chotaa nac zho.

22 Zeeṉe gzo luu zha ne guṉ xtsiiṉ Dios, guṉd luu ne lega teḻ chotaa gzo luu; sac goṉ, nend lëëtse zha ne rap pe tib falt gzooblo luu, dzigo laa miech guiab naṉpaa luu zha nac zho ni rlisquid luuw lo zho. Ible gdeete luu diidz guṉ luu ncuaaṉe guṉctal xtoḻ luu. 23 (Gnid naa togo ible grieelodraa guie luu vin, zac guie luu niipyeeṉa maase poc poc, laa ne guie luu niab nis; zeeṉa glunëdraa zdoo luu.) 24 Sac grë zha ne no lo doḻ, no doḻ co znuse rzhoobneṉ; nogaaw, haxta gaḻ dze ne laa zho gacredz lo Dios, dzigoraa xoobneṉa. 25 Scaquegaa zha ne ruṉ guieḻwen, no ncuaaṉ co znuse glu; nogaaw, niicle ne rluda niina per ible zdziṉ dze ne laaw glu.