1 Biluxe si uní' Jesús ca diidxa ca, biree né ca discípulu sti' uyé ca ndaani ti le' olivo ni nuu cherica arroyo Cedrón. 2 Ne laca nanna Judas, ni bitoo laabe que, lugar ra nuu be, purti stale tiru yené be ca discípulu stibe raqué. 3 Para biree uyé ra nuu be. Yené caadxi soldadu ne caadxi gendarme ni rapa ra yu'du', ni biseenda ca xaíque sti ca sacerdote ne ca fariseu. Ne yené ca linterna ne antorcha ne ni ucaa lú né ca'. 4 Peru ma nanna be xi irá zeeda luguiá be, ngue runi laabe biree be lú ca', rabi be laaca':

―Tu ruyubi tu.

5 ―Jesús de Nazaret, na ca'.

―Rarí nuaa', rabi be laaca'.

Ne laca nuu Judas ni bitoo laabe que raqué. 6 Ora bina diaga ca ni na be que la? gurí sa ca atrá dede biaba ca layú. 7 Bigueta rabi be laaca':

―Tu ruyubi tu.

―Jesús de Nazaret, na ca'.

8 Para rabi be laaca':

―Cadi ma gudxe laatu naa ndi la? Yanna pa naa cuyubi tu la? laudii lugar che ca xcaadxi ri'.

9 Uca ni zacá ti iree ni casi gudxi be Bixhoze be: “De irá ni bidiiu naa, nin tobi qué nunite'.” 10 Oraque guxha Simón Pedru espada sti' bigá ti chu diaga Malco ladu derechu, Malco, jmozo sacerdote gola. 11 Oraque na Jesús rabi Pedru:

―Uluu espada stiu'. Ñee nou' cadi naquiiñe tide irá ni gudixhe Bixhoze tide la?

12 Ne óraque bidxiña ca soldadu ne ca xaíque sti ca' ne ca gendarme sti ca judíu, bichá ná ca Jesús ne bindiibi ca laabe. 13 Nirudó' ra nuu Anás yené ca laabe, purti Anás nga suegru Caifás ni naca sacerdote gola iza que. 14 Ne laca Caifás ri ca nga gudxi ca judíu jma galán gati tobi ti qué gati idubi guidxi.

15 Yenanda Simón Pedru ne sti discípulu Jesús. Ridxaaga sti discípulu que sacerdote gola, ngue runi gunda biuu né laa ra biuu Jesús ndaani patiu sti sacerdote. 16 Peru Pedru biaana fuera. Para biree sti discípulu que, uní' né badu dxaapa ni rapa ra puerta que, para biguu Pedru. 17 Ne na badu dxaapa que rabi Pedru:

―Lii laca discípulu stibe lii nja'.

―Co', na Pedru, ―cadi zaya de laacabe.

18 Bi'ni ca mozo ne ca gendarme que ti gui para idxaa ca', purti nananda raqué. Ne yeuzuhuaa Pedru lade cabe para idxaa.

19 Laga cayaca irá nga la? canaba diidxa sacerdote gola Jesús tuu nga ca discípulu sti ne xi rusiidi'. 20 Para rabi be laa:

―Huanié nezalú irá binni. Bisiide ndaani ca yu'du huiini ne ndaani yu'du ro' ra rie stale judíu, ne gasti qué ninié naga'chi'. 21 Xiñee canaba diidxa lu naa. Unaba diidxa cani huayuna diaga. Laaca nanna ca xi huayué nia laaca'.

22 Casi pe biluxe uní' be udapa tobi de ca gendarme que lú be ne rabi laabe:

―Ñee zacá ricabi cabe sacerdote gola la?

23 Para na be:

―Pa cadi jneza unié la? uní' nezalú irá binni ri paraa bichee', ne pa qué nuchee la? xiñee cagapa lu naa.

24 Oraque biseenda Anás laabe ra nuu Caifás sacerdote gola, idubi liibi be.

25 Ra zuhuaa Pedru cadxaa que, unaba diidxa cabe laa:

―Ñee cadi laca tobi de ca discípulu que lii la?

―Co', cadi zaya dia' de laacabe, na Pedru.

26 Oraque na tobi de ca mozo sti sacerdote gola, familia dxa hombre bigá be diaga que, rabi laabe:

―Ñee cadi ne lii biiya nuu neu laabe ra le' olivo que la?

27 Bigueta na Pedru:

―Co'.

Ne óraque pe biinda gallu.

28 Bia' zeda yaba biaani biree né cabe Jesús de ralidxi Caifás, yené cabe laa ra palaciu. Laacabe qué ñuu cabe, purti pa ñuu cabe la? nuchee né cabe ley stícabe, ne ma qué ñanda ño cabe ni ro ca binni que saa pascua. 29 Ngue runi biree Pilatu yenaba diidxa laacabe, na rabi laacabe:

―Xi queja napa tu luguiá hombre ri'.

30 Para na cabe:

―Pa ñaca cadi cuchee be, qué ñeda saana du laabe ra nuu lu'.

31 Oraque na Pilatu:

―Lachiné laabe. Laudxiiba donda ique be casi na ley stitu.

Para na cabe:

―Laadu qué gapa du derechu guuti du iruti'.

32 Cayaca ni zacá ti iree ni casi uní' Jesús ra bizeete modo gati'. 33 Bigueta biuu Pilatu ndaani palaciu ne guridxi Jesús, na rabi laa:

―Ñee lii nga rey sti ca judíu la?

34 Para na Jesús:

―De lii siou' canaba diidxa lu nga la? o uyuu tu gudxi lii xiixa de naa.

35 ―Lácaxa judíu naa, na be. ―Ca binni xquidxi lu ne ca xaíque sti ca sacerdote nga beda saana lii ra nuaa'. Xi bi'ni lu'.

36 Oraque na Jesús rabi laabe:

―Cadi beda aca dia' rey ndaani guidxilayú ri', purti pa ñaca beda aca rey rarí la? ñasa ca xpinne', nucaa lú para cadi ninaaze ca judíu naa. Peru cadi rarí di nga zeda aca rey.

37 Para na Pilatu rabi laabe:

―Entonce rey lii pue la?

Oraque na be:

―Dxandí rey naa, casi na lu ca. Beda gale ndaani guidxilayú para güe nia binni xii nga ni dxandí'. Ne irá ni zinanda ni dxandí la? rucaa diaga naa.

38 Oraque na Pilatu:

―Xii nga ni dxandí ya'.

Ne casi biluxe uní' nga biree, uyé ra nuu ca judíu sti tiru, na rabi laaca':

―Qué idxela gasti donda luguiá be. 39 Peru laatu napa tu ti costumbre ilaa ti presu para laatu irá iza ca dxi cayaca saa pascua stitu. Yanna racala'dxi tu undaa rey sti ca judíu ri la?

40 Oraque irá cabe bicaa cabe ridxi:

―Cadi undoou diou' laabe. Bindaa Barrabás.

Barrabás nda naca ti gubaana'.