5
Tu yech naduzh no Me nak Mbëkxi'l che'n Dios
1 Orze' unen lad direch che'n Me nzob lo yaxil ro ze', tu yech naduzh, no rop tiche nikë letr, mbaino nayao'we kun gazh sey, 2 no nu unen tu ganj xa' más nile' mandad, naye una'bdi'zh ganj ze', nzhab ganj:
―¿Cho ñal xa'l lo yech re', no chix xa' rë sey kun kwa'n nayao'we?
3 Per ni lo yibë', no lo yizhyuo, no ni al yët lo yizhyuo, ni tu bixa' gat ñalt xa'l loi, no ni gat ñalt wi' xa' kwan nzobni' loi. 4 Orze', dox nzhona por nangazhëlt ni tu xa', xa' ñal ngaxa'l lo yech ze', no ni nangakt ngawi' xa' kwan nzobni' loi, 5 per midi'zh tu rë xa' nak zhi'n ze' lon, ne xa':
―Nago'ntra'l; lë' Me, Me kwa'n nak nela mbe'zh ga', Me re' nzë ben che'n Judá no ben che'n Dabi, Me mile' gan lo xa' ndil Me kun lë'; kuze', Me re'se ñal xa'l lo yech ba', no gak chix Me za gazh sey kwa'n kinui.
6 Orze' sao' yaxil ro ze', no lo za dap ma kwa'n nzhin naka'n ze', mbaino sao' plo nzhin rë xa' nak zhi'n ze'; unen nzo Me nak Mbëkxi'l che'n Dios, nilu' laka plo miwe' Me, nela tu mbëkxi'l, ma miza' men gon lo Dios ga'; no kinu Me gazh kach no gazh zalo Me kwa'n nak za gazh sprit che'n Dios kwa'n mixë'l Me dub yizhyuo. 7 Orze' nguzubi Me nak Mbëkxi'l ze' par nguzen Me yech kwa'n nzho lad direch ya' Me nzob lo yaxil ro ze'. 8 Or nguzen Mbëkxi'l che'n Dios yech ze', orze' za dap ma kwa'n nzhin ze', no dub galbitap xa' nak zhi'n ze', nguzuxib bixa' lo Mbëkxi'l che'n Dios, no kad bixa' nzen tu arp no tu kop or kwa'n zhëi di ya'l, no ya'l re' nak rë kwa'n nina'b rë men che'n Dios lo Dios, 9 orze' mikë' bixa' tu kant kub re' kwa'n nzhab:
Luse ñal zen yech re', no chixal rë sey che'ne,
porke ngutal lo krus,
no kun ren che'nal kwa'n miza'l gon lo Dios.
Nguzi'l rë men par gak bixa' men che'n Dios;
rë xa' nzë rë ben men,
no rë xa' nidi'zh rë lo di'zhzë,
mbaino rë xa' nzë rë lo yezh,
no rë lo lazh men,
10 no mile'l nak bixa' rey no ngulëi' lo Dios,
mbaino lë' bixa' le' mandad lo rë men yizhyuo.
11 Orze' unen, no mbina kidi'zh nayax ganj, rë xa' nzhin naka'n plo nzob Me nile' mandad ze', no plo nzhin dap ma naban ze', mbaino plo nzhin rë xa' nak zhi'n ze'; tanta nayax rë ganj che'n Dios xa' nzhin ze', yent cho gak lab bixa', je'nta' pla miyon nak bixa', 12 mbaino naye kidi'zh bixa':
Dox ka ñal Mbëkxi'l che'n Dios,
Me ngut lo krus.
Le' Me mandad,
no gap Me rë kwa'n dox tsak;
no ñal gap Me yalnzhak no rë yalnatsin.
Ñal ka zuxib be lo Me,
par di'zh be, rë yalnazhon kwa'n kinu Me,
no par zilita' za' be xkix lo Me.
13 Mbaino rë kwa'n ngulo Dios lo yibë' no lo yizhyuo, no rë kwa'n nzhin al yët lo yizhyuo mbaino nitsdo', mbina se' kidi'zh rë kure', lo Me nzob lo yibë', no lo Me nak Mbëkxi'l che'n Dios:
Par dubta' nidi'zh be,
rë men ñal di'zh wen Me,
no más tsak Me lo rë.
Más nazhon Me,
mbaino más nile' Me mandad;
par dubta' le' Me mandad,
no nayot lox le' Me mandad.
14 No dap rë ma naban kwa'n nzhin ze', nzhab:
—Sa' gake.
Mbaino dub galbitap xa' nak zhi'n ze', nguzuxib lo Dios no midi'zh bixa' rë yalnazhon kwa'n kinu Dios.