3
Jisesida uliwalimoya Moseseda asetone.
1 Sa-onebo nenako, monoka wewenalita okulumau nesalo lesa molo libibo wewenalitaya, edimo ele elewole okaka noudawomidana monoka wetome okaka noibo we ito Omaitoka jokila he mekaka noibo we napa Jisesidaya muda-eli wehe liki mudalo. 2 Omailimo aya yowanu litiye loko lo moloetaiboto Moseseya aya yowanuya Omaimidana wewenala yuhaloka nedanaki, Omailimo libotogo neboya Jisesi maya ayamidana oko emesalo moloko mino-loko woko lene. 3 Numuda vokaka noibo wemidana uliwalimoya numudamidana asetokaka noiye. Sa-okaka noinako, ayamidana oko Jisesida uliwalimo Moseseda asetoko lamedalakiya ne. 4 Ito numuda le soto molokaka wewenalika vokaka nesa maya neboya, muki yatoka nesahena le soto molokaka weya Omai makokoya ne. 5 Ito Mosesekahoya Omaimidana numudala aweyaha iki minabo wewenasitokaya nedanaki, Omailimo libotogo elekele yowanu le emesalo moloko leko nedanaki, Omailimo gala lo soto molatibomu ohuwa hukokaka iye. 6 Sako neboya, Kalaestikaho Omaimidana ipalamoya Omaimidana numudala lolo iki minabo wewenasitokaya ujapa oletaidanaki Omailimo libotogo elewole oko yowanu lekaka noiye. Ito saina-maina le lolowa oletaibomuya ubolo minudanaki, muluteuka wati ideko mino-loko wetudawoya Omaimidana numudala lolo iki minae loko letiye.
2 Nam 12:7
Omailoka woko aso jelekakawau woko kolatudawo ga.
7 Kalaestiya muki nesasida asebetoko nenako, yamuya Omai weuna oluholimo libo ga monoka bukuguya sa-liki luhuwa ji-minabo maya lemo nesate lolo oneyoko elekaka noune:
Olotiya edimo Omaimidana onola maya eli-minataboya,
8 aha yanala minamibotoka mumusopa mikaloya Isilaelo wewenasi lukaha iki mesaha jedanaki Omailimo auha lemametihe liki lahelamibo nesa lolo iki minabokidana iki duka heko li lokadeko minamilo.
9 Yalokaya latatipole maya meleke 40-pala oko nowiyoko sainahena lolo-halo okaka oboya mudaikaka abo neboya, hokoliya adanaki auha lemametihe liki lahelamibo nesa lolo ikaka i-minabo ne.
10 Sa-ikayoko nenako, nemoya mesaha jekoko edimokumuya sa-loko lo-minobo ne: Edimoya muki yupekaya opa-napa nesamugo data kikaka i-minabo ne. Sa-ikiki anune maya mudai wehe liki mudamabo ne. 11 Sa-ikayoko, mesaha jebetodanaki sa-loko lo hukoko lo-minobo ne: Mino aso jelekaka nesaneuya edimo wiki hilamitabo ne.
12 Wewenanelita, edimotokatiya wewena mako duka wehe lametiboki minikiki monoka eli hulikiki elewole we Omaimidana demesa mikatae liki ujapa iki minalo. 13-14 Lemo adaya ele elewole okaka udawoya le ikitoko le-minoko woko hetatudawoya lemo adaya Kalaestida nasahilila ona moloko leminudawo wewena lolo okaka udawo nenako, muki yupekaya onawanipo aha neyoko lahelamibo nesalimo muluteu hekakakumuye loko we makolimo edimotokati okepa jekoko uka heko li lokatiye liki, emo ata lideko emo ata lideko iki luhawatipo maya li ikitiki minalo.
15 Yamuya monoka bukuguya ga mako sa-loko ne:
Edimoya olotiya Omaimidana onola eli-minataboya, edimo lukaha ikiki mesaha jebomidana iki dukaya hiki li lamilo.
16 Yaya nakaha wewenasiya Omaimidana onola eli hulikiki pelesa jikaka abo ne. Mosesekaho dilipe omutiyoko Ijipi mikaukati nisebo wewenasiya sabo ne. 17 Ito Omailimoya nakaha wewenamuya elibo lahelamiyoko meleke 40-pala wibo ne. Edimoya lahelamibo nesa yanala minamibotoka mumusopa mikaloka wikadanaki heli esa abo wewenamuya sa-ibo ne. 18 Sa-okaiyoko nakaha wewenamu sa-loko lo hukoko libo ne: Nemo elekaka nesaneuya wiki hilamikilae. Sa-loko libo gaya eli hulikiki pelesa jikaka wewenamuya liye. 19 Yamuya sa-loko ele-minune: Edimoya monoka eli hulikiki yogo-yogo jikaka abomuye liki mino elikaka ebatoka maya wiki lamae.
7-11 Sam 95:7-11 15 Sam 95:7-8 16-18 Nam 14:1-35