1 X̱ana' Dios, žaḻa' wx̱én ḻáže'to' Le' ḻo yež Sión,

na' gonto' da' wchebe ḻáže'to' chio'.

2 Le' ženkzlo' da' ẕcháḻjḻento' Le',

na' ḻa'gak yógo'te benne' ka' ḻawo' Le'.

3 Nbága'ḻi'a da' ẕinnj da' bena',

san ženít ḻawo' Le' da' bži'ito' chio' Le'.

4 Ba nez ẕen naken che bennen' ẕbio' Le',

na' ẕnno' nake' chio', nich soakze' latje la'y chio'.

Yeljkzto' da' chawe' da' de ližo', dan' den ḻo yodo' la'y chio'.

5 Ḻo da' chawe' da' nako' gono' da' ẕenḻe'e kate' gono' da' ẕnnablto' Le', Dios, Benne' Weslá cheto'.

Yógo'te benne' nníta'gake' yežlyó žx̱en ḻáže'gake' Le'.

Ḻezka' žx̱en ḻáže'gak benne' ka' Le', benne' ka' ẕdégake' zíto'le ḻaw nisdo'.

6 Le' ẕzoa chocho' ya'a ẕen ka' ḻen yeḻa' wak chio'.

Nakkzo' Benne' waḻe.

7 Ẕbek žio' nisdo' kate' ẕgo'nen, na' žaẕto' da' žonen.

Ẕbek žio' benne' yež ka' kate' žóngake' žo'osbé.

8 Che ḻen benne' ka' nníta'gake' dot yežlyó ẕžébegake' da' ẕenḻe'e da' žono'.

Ẕnnito'o benne' ka' ḻo yeḻa' ba nez, benne' ka' nníta'gake' do ẕente yežlyó.

9 Ẕwio' yežlyó, na' žseḻo'o nis yejw.

Žono' ga žonnḻe'en linne chen.

Bnnito'o yegw ka' ḻo yežlyó da' zej nža'ḻe'en nis.

Ẕkwezo' ẕoa' za da' gawgak benne' ka', kan wnnakzo' gono'.

10 Žseḻo'o nis yejw gan de na, na' žeyonon' yo ya'a.

Žesbison' ḻen nis yejw na',

na' žono' ga ẕgól-ḻe'egak da' zej nazen ga na'.

11 Žono' ga gak chegak benne' ka' yeḻa' ba nez to yiz to yiz ni'a che da' ẕneẕjo',

na' bejw gasj chio' ka' žónngaken yejw da' žonen ga ẕgolgak da' zej nazen.

12 Žon yejw chio' ga žak ya'a gan ẕdagak bia yíx̱e' ka'

na' žebégekle benne' ka' ẕḻé'egekle' žeyák ya'ado' ka' ya'a.

13 Ḻo lache' ka' zej nnita' ẕila' ka', na' žoa'agak yégodo' ka' naz ẕoa' stribe.

Ẕbéžya'agak benne' chio' ka' ḻo yeḻa' žebele, na' žóḻgakkze' chio' Le'.