1 Nianna iyábakana bedú liikana nna uchekana Jesús‑ni gwatso dúkane arlo Pilato‑ni. 2 Nianna udulokana besiakana ikie, rákana:

―Nubiyú du nii gwaxxakatu na rekina ruchixxina iki ka benne getu‑ni lhe rusunana uteke belhiu nu ruteri'i len César nu rinnabia xeniha. Anágaba nna rana deki lana ankana Cristu nu rinnabia.

3 Nianna unnaba tisa Pilato‑nie, rane:

―¿Si lu ankalu nu rinnabia ge ka nu Israel‑ni?

Lee nna bekabie geni, ree:

―Luba chi ra deki nuná ankaa xa.

4 Nianna ra Pilato‑ni ka nu loni ge ka bixxudiha lhe ka benne sama niha lhe, rana ke:

―Neti, labí raxxakaa bixa tulha daa nubiyú‑ni.

5 Ttaka lakana nna doelhaba ruinkana, rákana:

―Rekina rutsatsana ka benne. Itúba daka Judea‑ni rekina rule'enna ke nu yuna. Udulona daka Galilea‑ni nna axtaba bisiana nii.

6 Tti biyienin Pilato‑ni rudettikana Galilea‑ni, nianna unnaba tisana kana ganna Jesús‑ni anke nu Galilea. 7 Tti biyieninna rákana deki dabie daka lo yu ata rinnabia Herodes‑ni, nianna bedhelhane arlo Herodes‑ni kumu lhe'esi Jerusalén‑nigaba re nuha la'ania. 8 Herodes‑ni nna tti bilenna Jesús‑ni yalhá bedeakinna kumu chi usá re leni ilenne de biyieninna ge nu runieha. De nuha nna raka leni ilenna unie ttu milagru. 9 Laxkala ixe nu unnaba tisane, ttaka labie nna kwachiruba bekabie geni. 10 Ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni, se'ekana nna doelhaba ruinkana rukinnikane. 11 Herodes‑ni lenna ka soldadu geniha nna labí biyú tsekane, bexisilakana gebie. Nianna begukukane ttu lari raka galha loni nna tti bedhelhakane arlo Pilato‑ni. 12 La sáha nna Pilato‑ni lenna Herodes‑ni bese'e tse len luesikani, kumu tti lanila aka nuní, labí raka uyú tse luesikani.

13 Pilato‑ni nna bottupana ka nu loni ge ka bixxudiha lhe ka uxtisi ge ka nu Israel‑ni lhe, anágaba ka benne ge yiesiha lhe. 14 Nianna tti rana kana:

―Lebi'i betega'ale nubiyú du nii loa, rusiale ikini rale deki rekina rutsatsana ka benne lhe'esi‑ni. Ttaka neti nna arlobale chi unnaba tisaa na nna labí gwaxxakaa deki ruinna nu rusiale ikinna. 15 Nigaba Herodes‑ni labí gwaxxakana bixa ben nuní, ki bedhelhalana nuní len ri'i attu libe. Gwaluyúruga, labí chi ben nuní ttu bixa nu dika ralhana gattina. 16 Laxkala ugwebaa na ttu elha disa tsitsi, iki de nuha nna olhábaa na.

17 [Aníha ra Pilato‑ni kumu kua laníba teeki ebeana ttu nu tee lisiyya.] 18 Ttaka iyábakana tulapaba uresi'akana, rákana:

―¡Betti nuná nna Barrabás‑naba bodilaa!

19 Barrabás‑ni tena lisiyya kumu lhe'esiha lana lenna adíru ka nu subi, bese'e disakana arlo ka uxtisiha, anágaba nna de benna elhutti. 20 Pilato‑ni nna de raka leni odilána Jesús‑ni, aníoka nna belisana kana attu libe. 21 Ttaka lakana nna adíla idisa uresi'akana, rákana:

―¡Betá nuná lo ya kurusi! ¡Betá nuná lo ya kurusi!

22 Beyonna libeha nna ra Pilato‑ni kana:

―¿Bíla nu satsa ben nuní ganna xa? Neti labí raxxakaa bixa benna ttu nu dika ralhana gattina. Ugwebaa na ttu elha disa nna iki de nuha nna odilábaa na.

23 Ttaka lakana nna bittuba bedo nagakani, ribesi'anibakana rinnabakana utáne lo ya kurusi. De ribesi'a xxattakanaha nna aloba biri'a lenkana, 24 ben Pilato‑ni nu rinnabakanaha. 25 Aníha uka nna bodilábana nubiyú nu unnabakana odilánaha, delába nu tee lisiyyaha de bedú disana arlo ka uxtisiha lhe de benna elhutti lhe. Ttaka Jesús‑ni nna botebane lasi nákani kini udhakakane nu rakaba lekani.

26 Tti chi dia lenkana Jesús‑ni kini utákane lo ya kurusiha, nianna bedaxxukana Simón ge lhe'esi Cirene‑ni, dedá nuha ugíana lhe'exxi. Nuha bejuakana na ya kurusiha kini bijana nuha tanoona Jesús‑ni.

27 Danalhagaba ixe ka benne lhe'esiha lhe anágaba danalhagaba ka benne nuila ribesike gebie de resi'ikanie bie. 28 Ttaka Jesús‑ni nna bodeki loe ata se'e ka benneha nna ree ke:

―Benne nuila ge Jerusalén. Bittu kwesile kia, gelale gwalikwesi lhe ge ka xi'inle‑na lhe. 29 Kumu isia sá inná ka benne: “Karubáru ka nuila ka nu abittu aka uja xi'inkani lhe ka nu anuttu xi'inkani chi bija lhe, anágaba ka nu anuttu nuto chi begasikana lhe.” 30 Nianna dhuloke gake ka i'iya‑na: “¡Gwaloguku ikitu!”, nna ka sitta xua xea‑na nna gake kana: “¡Gwalukatsi ri'itu!” 31 Kumu ki neti ankalaa attiba ttu ya ya'a nna rudhakakana neti aní, adírula udhakakana lebi'i de ankale attiba ttu ya bisi.

32 Chegabakana a chupa ka nubiyú ben satsa kini uttikana ka nuha itupa len Jesús‑ni. 33 Tti chi bisinkana lo yu tee láni Bega Iki Nu Yatti, niha betákana ke lo ka ya kurusi. Ttu ka nu ben satsaha betákana na daka ná ben gebie nna attuna nna daka ná yattie. 34 Nianna unne Jesús‑ni, ree:

―Tata, uxíchi elha xen lasi ge ka nu se'e nii, kumu labí yu ka nuní nu ruinkana.

Ka soldaduha nna bedelhakana suerti kini elha'akana ka xo Jesús‑ni. 35 Ka benne nna se'ebake rulannike, ka uxtisiha nna ruxisilakana gebie, rákana:

―Benne subi gwa bodilána. Nnanna nna titúbana eláchuna ganna gwalíginna ankana Cristu nu chi bekwe Tata Do Yebáha.

36 Anágaba ka soldaduha ruxisigabakana gebie. Ribigakana nna rugwekane vinu idí, 37 nianna ra kane:

―¡Ganna gwalíginlu ankalu nu rinnabia ge ka nu Israel‑ni, titúbalu beláchu lo ya kurusi‑ni!

38 Lo ya kurusiha daka xekie, niha taa ttu breta ra loni: “Nuní ankana nu rinnabia ge ka benne Israel.”

39 Ttu ka nu ben satsa taa lo ya kurusiha rulisa satsane, rane:

―¡Ganna gwalíginlu ankalu Cristu, titúbalu beláchu lo ya kurusi‑ni lhe bodiláchu ri'itu lhe!

40 Ttaka attu nuha nna bedhaka disalana nu rinneeha, rana na:

―Lu, ¿si bi gwa elha rasi gelu tee len Tata Do Yebáha ki luesi elha disa ruyú benne‑nigaba ruyúlu? 41 Ri'i ruyú galári'i elha disa lo ya kurusi‑ni, kumu ralhabari'i kixari'i ge nu benri'i, ttaka benne‑ni nna labí bixa nu satsa chi benie.

42 Nianna tti rana Jesús‑ni:

―Tadúttu lelu neti ganna chi dhulolu innabialuha.

43 Nianna ra Jesús‑ni na:

―Netiru ria, nasá tteba esin lenlu neti ata dho tselu.

44 Ttiba tu retin tsi'inuha (12) bechulha itúba yiesi lo yu‑ni nna retin tsunnaha‑liba beyani. 45 Tatubisa‑na bechulhaba lobie nna lari daa lagwi lhe'e yotuha nna chubaa tíba bireda nuha. 46 Jesús‑ni nna unnebie idisa, rabie:

―Tatoo, lasi nálu otea elha nabani kia‑ni.

Nuha‑ba rabie nna tti uttie.

47 Tti chi bilani soldadu nu baninna ttu gayua (100) ka soldadu ge Roma‑ni nu chi ukaha, nianna rana:

―¡Xxeniba ra le Tata Do Yebáha! Gwalíba nna nubiyú‑ni benne tseba anka nuní.

48 Iyába ka benne tupake ata uka nuha, tti bilákanie iyá nu chi ukaha, nianna si'iba du leke rudhen ro'o lastoke deyyake. 49 Ttaka iyába ka benne ankabiakanie Jesús‑ni lhe ka benne nuila gwanalhake bie tti ugwekie daka Galilea‑ni lhe, iyába ka benneha idittuliba se'eke rulannike iyá nu rakaha.

50 La'ania udo ttu benne biyú lábie José, re tse lebie lhe runie nu dika ixú lhe. Benneha anke benne lhe'esi Arimatea, ttu yiesi re daka Judea‑ni. Benneha sele lhe'e ka nu ruinkana elhuxtisi ge ka nu Israel‑ni. 51 José‑ni dogabe ribede isia sá innabia Tata Do Yebáha ka benne lhe anágaba nna bittugaba uyu'u lebie nu ben adí ka nuha len Jesús‑ni. 52 Nianna ugíabie arlo Pilato‑ni nna unnabe lenna kini ugwelhane elhide Jesús‑ni lo ya kurusiha. 53 Iki de belhide benneha, nianna tti bottesie bie lhe'e ttu lari sibi nna gwakatsie bie lhe'e ttu baa do lhe'e ttu íyya daa niha, ata lanú benne yatti chi bigatsi niha. 54 La'ania anka viarna nna la sáha ankana tti rese'e tse ka benne Israel‑ni kumu chi isia sá tti reyaka leke.

55 Ka benne nuila daa lenke Jesús‑ni ttili dabie daka Galilea‑ni, ka benneha ugíake nna bilákanie yieru baaha lhe bilákanie gasina utixxake benne yattiha lhe. 56 Tti besinke lhe'e yo'o ata se'ekeha nna benke ka biste rure ixixxi lhe adíru ka nu kabike lati Jesús‑ni. Nianna beyakaba leke la sá tti reyaka le ka nu Israel‑ni. Benbake attiba chi ga'anna lo bia bennabi bodha'an Moisés‑ni.