3
Xxeniru ra le Jesús‑ni tti Moisés‑ni
1 Xa betsi to, lebi'i chi uxi benne do yebáha le kini akale gebie. De nuha nna gwaleyoinbia Jesús‑ni deki labie anke bixxudi xeni lhe anke apóstol ge ka tisa chi ria leri'i lhe. 2 Labie bedo tsitsibe tisa ge Tata Do Yebáha, delába benne bodúgabe bie kini rixúe lo sina gebie. Benba Jesús‑ni attiba ben Moisés‑ni. Moisés‑ni bedo tsitsibana tisa kini biyúna ka benne chi ankake ge Tata Do Yebáha. 3 Ttaka Jesús‑ni térula lidhake tti Moisés‑ni, attiba benne rudoe ttu yo'o dakarula benneha attichula yo'o rudoeha. 4 Kumu iyába ka yo'o se'eba nu ruinna ka nuná, ttaka Tata Do Yebáha iyá tteba nu se'e, labe benie kana. 5 Moisés‑ni, atti galába nu do lo sina, bedo tsitsibana tisa biyúna ka benne chi ankake ge Tata Do Yebáha kini kixxi'enna ke nu inná Tata Do Yebáha. 6 Ttaka Cristuha anka galábe Xi'in Tata Do Yebáha. Labie nuha anke nu rinnabie ka benne, delába ri'i ka benne chi ankari'i gebie, ladiba ganna gwa ruxxen tsitsi leri'i deki gwadíbari'i nu se'eri'i ribedari'iha lhe anágaba lhe ganna gwa du itta leri'i de dhiri'i na lhe.
Ga'ari'i ata chi ga'anani Tata Do Yebáha tse'eri'i eyaka leri'i
7 De nuha nna Espíritu ge Tata Do Yebáha rabie:
Ganna nasá iyieninle inne Tata Do Yebáha,
8 bittu uin tsitsi lastole a tsia lele gebie.
Abittu uinle tti ben ka xuttoleha.
Ka nuha bese'e disalakana loe
nna bettisikinne lo yu bisiha.
9 Niha betsa'akinna neti, ra Tata Do Yebáha.
Meskiba gwa bilákinna nu tse benia delo chua (40) idaha, ttaka benlakana ku'ukana neti prueba.
10 De nuha nna bisa'ati lenkana,
nianna tti ria: “Ka nuní satíaba nu subila rulaba lekani;
labí rite dákinna gasina tsiakana lo neda kia.”
11 De nuha nna tti loora risa'atiha nna bodha'anaa tisa ria:
“Ttu tsa ttela abittula ga'akana ata chi ga'anati eyaka lekaniha.”
12 Lebi'i xa betsi to, gwaluyú gele, bittu akale nu re satsa leni lhe bittu a tsia lele ge Tata Do Yebaa benne anka baniha lhe, kini ka ukwittale nna abitturu sanalhalee. 13 Lebi'i nu uinlale, ttiru nasá gwa teeru lo neda gele, gwaluse'e tsitsi luesile ttu ttu sá. Aníha uinle kini abittu ixú yiele uinle tulha, kini ka uin tsitsi lastole nna abitturu etabinle gebie. 14 Kumu chiba selari'i len Cristuha, ladiba ganna tti chi isia sá daluxaha abittu udhanri'i a tsiaru leri'i attiba ugía leri'i tti udulori'iha. 15 Attiba chi ra lo ka yetsi ge Tata Do Yebáha:
Ganna nasá iyieninle inne Tata Do Yebáha,
bittu uin tsitsi lastole a tsia lele gebie.
Abittu uinle tti ben ka xuttoleha.
Ka nuha bese'e disalakana loe
nna betsa'akinne.
16 Kumu, ¿laaba ganna iyába ka benne bebea Moisés‑ni daka Egipto‑ni, lake nuha, iki de chi biyienkanie nu ra Tata Do Yebáha, nna bese'e disalake loe? 17 Lhe, ¿laaba ganna len lagabake nuha bisa'ani Tata Do Yebáha delo chua (40) idaha de benke tulha, de nuha nna lo yu bisiha‑ba uttike? 18 Lhe anágaba, ¿laaba ganna lake nuha, de abittu bedoke tisa gebie, de nuha nna bodha'ane ree labíru eta'ake ata chi ga'ananie eyaka lekeha? 19 De benke aníha nna chi rite denri'i deki labí beta'ake niha kumu de labí ugía leke gebie.