51
Ba meybil ko kalngan’* TITLE NI HEBREW: David e yoloy e re Psalm ney nga tomuren nike welthin Nathan ni profet ngak u murung’agen Bathsheba ni gathi mabgol rok ma yow be par. 2 Sa 12:1–15
1 A Got, nge wurengan’um ngog, ni bochan e t’ufeg rom ni dabimus;
mu chuweg e denen rog, ya ba ga’ e runguy rom!
2 Mmaluk nigeg nge chuw urngin e kireb rog,
ma ga chuweg e denen rog nggu machalbog!
3 Kug nang e pi kireb rog;
gubin ngiyal’ ni gu manang e pi denen rog.
4 Kug denen nib togopluw ngom, ni kemus ni gur e ba togopluw ngom,
ma kug rin’ e tin nib kireb u wun’um.
Ere mmat’aw ni ngam pufthin nigeg,
bay mat’awum ni ngam turguy e gechig rog.
5 Gub kireb ko ngiyal’ nni gargel nigeg riy ke mada’ ko chiney;
chirofen nni par nigeg riy e gu bay u fithik’ e denen ke mada’ ko chiney.
6 Tafinay nib yul’yul’ e ir e ga ba’adag;
mu suguy lanin’ug ko gonop rom.
7 Mu chuweg e denen rog nggu be’ech;
mmaluk nigeg, ya nge gel e wechwech rog ko ayis.
8 Mu suguyeg ko felfelan’ nge fel’ laniyan’;
ni yugu aray rogon ni kam masengseng nigeg ma kam t’areg,
mu kug felfelan’ bayay.
9 Mu fek owchem ko denen rog,
ma ga chuweg urngin e kireb rog.
10 A Got, mu sunumeg e tafinay nib machalbog u fithik’ag,
ma ga pi’ reb e tafinay ngog nib be’ech ma ba yul’yul’.
11 Dab mu n’igeg nggu chuw u p’eowchem;
dab mu chuweg rog fare Kan Nthothup rom.
12 Mfulweg e felfelan’ ngog nma yib ko ayuw ni ga ma pi’,
ma ga ayuweg lanin’ug ngi i fol rom.
13 Ma aram e bay gu fil ngak e pi tadenen e tin ni mog ni ngan rin’,
miyad sul ngom.
14 Got, ni gur e ta’ayuw rog, mu ayuweg e pogofan rog,
mu gu weliy ngak e girdi’ fanam mat’aw.
15 Somol, mu ayuwegneg nggu welthin,
mu gu pining e sorok ngom.
16 Dabum e gamanman ni yibe li’ ngan pi’ ngom ni maligach,
fa’an mang e ga ba’adag ma kug pi’ ngom;
de fel’ u wun’um e pi maligach ni mo’oruf.
17 Got, maligach rog ngom e subut’an ni ku gu tay;
ya be’ nike kolngan’ nge fol rom e dab mu n’ag.
18 Got, mu runguy yu Zion, ngam ayuweg;
mu ubung bayay e yoror nib liyeg e binaw nu Jerusalem.
19 Ma aram me felan’um ko pi maligach romad,
nge pi maligach ni mo’oruf;
mu’un li’ e garbaw ni pumo’on u daken e altar rom nga ni pi’ ngom ni maligach.
*^ TITLE NI HEBREW: David e yoloy e re Psalm ney nga tomuren nike welthin Nathan ni profet ngak u murung’agen Bathsheba ni gathi mabgol rok ma yow be par.
DRAFT VERSION — Proofreading in progress