1 Ma fa’ani mu’ e biney mu gguy aningeg i engel ni yad ba sak’iy ko fa aningeg i tabthung nu fayleng, ni kar taleged fa aningeg i nifeng nu fayleng, ni bochan e nge dabki thow e nifeng u daken e fayleng, ara u daken e day, ara nga daken ba ke gek’iy. 2 Mu gguy yugu reb e engel nike yib ngalang u lan e ngek nike fek fare hang rok fare Got ni be par nib fos. Me non ni ba ga’ laman ngak fa aningeg i engel ni fa’ani ke pi’ Got gelngirad ni ngar tagan niged e binaw nge day. 3 Me ga’ar fare engel, “Dab mu tagannag e binaw, nge day, ara gek’iy nge yan i mada’ ko ngiyal’ ni bay gu mu’gad i tay e pow nga peri’ e pi tapigpig rok e Got rodad.” 4 Ma aram minog ngog e matha’eg ko pi’in ni kan tay e pow rok Got nga peri’rad, ni yad ra’ay nge aningeg i ragag nge aningeg i biyu’ ko urngin e ganong ko girdi’ nu Israel, 5 ni ragag nge l’agruw i biyu’ e yib ko ganong rok Judah ni kan tay fare pow ngorad; ma ragag nge l’agruw i biyu’ e yib ko ganong rok Ruben; ma ragag nge l’agruw i biyu’ e yib ko ganong rok Gad; 6 ma ragag nge l’agruw i biyu’ e yib ko ganong rok Asher; ma ragag nge l’agruw i biyu’ e yib ko ganong rok Naftali; ma ragag nge l’agruw i biyu’ e yib ko ganong rok Manasseh; 7 ma ragag nge l’agruw i biyu’ e yib ko ganong rok Simeon; ma ragag nge l’agruw i biyu’ e yib ko ganong rok Levi; ma ragag nge l’agruw i biyu’ e yib ko ganong rok Issakar; 8 ma ragag nge l’agruw i biyu’ e yib ko ganong rok Zebulun; ma ragag nge l’agruw i biyu’ e yib ko ganong rok Josef; ma ragag nge l’agruw i biyu’ e yib ko ganong rok Benjamin.

9 Ma fa’ani mu’ e biney mu gu sap, mu gguy e girdi’ nike mu’ulung ni pire’ ni pire’ — ndariy be’ nrayag ni nge theegrad! Nra bad u gubin e nam, nge ganong, nge gubin mit e girdi’, ngu gubin e thin, ni kar sak’iygad u p’eowchen tagil’ Got nge fare Fak e Saf, ni karon’ed e mad nib wechwech ni bay yuwan e fal’tir u pa’rad. 10 Miyad non ni ba ga’ lamrad ni be lungurad, “Kanawo’en ma gamad thap ngak Got e yib rok e Got romad ni ir e ke par nga tagil’, ma ki yib rok fare Fak e Saf!” 11 Ma urngin e engel ni kar liyeged tagil’ Got ni yad ba sak’iy, nge pi’in pi’ilal, nge fa aningeg i n’em ni yad ba fos nra parawgad nga but’ u m’on u tagil’ Got ngar ted fan Got, 12 ni be lungurad, “Amen! Sorok, nge gilbuguwan, nge gonop, nge magaer ni ngan pining, nge tayfan, nge gelngiy nib th’abi gel, nge gagiyeg e ir e bay i par rok e Got rodad ndariy n’umngin nap’an! Amen!”

13 Me fitheg bagayad fa pi’in pi’ilal ni ga’ar, “Mini’ e pi girdi’ nem ni karon’ed e mad nib wechwech, mu uw e karbad riy?” 14 Mu gu fulweg ngak ni lungug, “Da gu nang, i gur e ga manang.” Me ga’ar ngog, “Pi cha’nem e fapi girdi’ ni kar thapgad ngaray u fithik’ fare gafgow ni ba ga’ ntay ngorad. Kar luk niged e mad rorad kar wechwech niged nga racha’en fare Fak e Saf. 15 Aram fan ni kar sak’iygad u m’on u tagil’ Got ni yad be pigpig ngak ni rran nge neap’ u lan e Tempel rok. Fa en ke par nga tagil’ e ir e ke yororiyrad ni dabi buch ban’en rorad ni bochan e bay rorad. 16 Gathi bay ki yib e bilig ara belel ngorad bi’id; ma dab kur m’ad nga gowelngin e yal’ ara gowelngin ban’en; 17 ya fare Fak e Saf ni bay u lulukngun i tagil’ e ir e bay i gafaliyrad ni bod e en nma gafaliy e saf, me pow’iyrad ko fapi alublub ni bay e ran ko yafos riy; ma bay n’ag Got e lu’ u owcherad.”