1 U lan e bin ni som’on e rran ko bin medlip e pul e ngam mu’ulunggad ni fan e liyor, ma dariy ba maruwel ni ngan rin’. Rofen nem e ngu’un thoy e rappa’. 2 Ngan pi’ e maligach ni mo’oruf ngak SOMOL, ni bfel’ bon u wan’: ni ba garbaw ni pumo’on ni kab bitir, ta’reb e saf ni pumo’on, nge medlip e fak e saf ni pumo’on ni ta’reb e duw yangarrad, ni dariy bang u dowrad nib kireb. 3 Min pi’ e maligach ni grain ni tin th’abi fel’ e flour ni kan athkuy e gapgep ni olive ngay: n’el e pawn riy nga reb fa gali garbaw ni pumo’on, aningeg e pawn riy ko fare saf ni pumo’on, 4 nge l’agruw e pawn riy nga reb fapi fak e saf. 5 Ma ku yira pi’ reb e kaming ni pumo’on ni fen e maligach ko denen, ni irera’ rogon i bangbengnag rogon fare machalbog ni nge tay e girdi’. 6 Ngan pi e pin’ey ni bang ko fare maligach ni mo’oruf ni yu rran ko bin som’on e rran ko pul nib mu’un e grain ni yigagen ngay, nge fare maligach ni mo’oruf ni gubin e rran nge yigagen ni grain nge wayin. Pi ggan ney ni maligach e bfel’ bon u wan’ SOMOL.

7 Mu’ulunggad nga ta’bang ni fan ko liyor e rofen ni ragag ko pul ni medlip; dab mu koyed ba ggan ma dariy ba maruwel ni ngan rin’. Lev 16:29–34 8 Ngan pi’ e maligach ni mo’oruf ngak SOMOL, ni bfel’ bon u wan’: reb e garbaw ni pumo’on ni kab bitir, reb e saf ni pumo’on, nge medlip e fak e saf ni pumo’on ni ta’reb e duw yangarrad, ni dariy bang u dowrad nib kireb. 9 Min pi e grain ni tin th’abi fel’ e flour ni kan athkuy ko gapgep ni olive: n’el e pawn riy ko fare garbaw ni pumo’on, ma aningeg e pawn riy ko fare saf ni pumo’on, 10 nge l’agruw e pawn riy nga reb fapi fak e saf. 11 Ma ku yira pi’ reb e kaming ni pumo’on ni maligach ko denen, ni ba dachug ko fare kaming nni pi’ ni bangbengin e machalbog ni nge tay e girdi’, nge fare maligach ni mo’oruf ni gubin e rran nge fare maligach ni grain riy nge maligach ni wayin.

12 Mmokungad nga ta’bang ni fan ko liyor ko rofen ni ragag nge lal ko bin medlip e pul. Ngam madnom niged e biney e madnom ni ngan liyor ngak SOMOL riy ni medlip e rran ma dab ni rin’ ba maruwel. Lev 23:34; Deu 16:13–15 13 Ma bin som’on e rran riy e ngam pi’ed ba maligach ni ggan ngak SOMOL, ni bfel’ bon u wan: ni ragag nge dalip e garbaw ni pumo’on ni kab bitir, l’agruw e saf ni pumo’on, nge ragag nge dalip pifak e saf ni pumo’on ni ta’reb e duw yangarrad, ni dariy bang u dowrad nib kireb. 14 Min pi’ e maligach ni grain ni tin th’abi fel e flour ni kan athkug e gapgep ni olive ngay: n’el e pawn riy nga reb fa pi garbaw ni pumo’on, ma aningeg e pawn riy nga reb fa gali saf, 15 nge l’agruw e pawn riy nga reb fapi fak e saf, nib mu’un ngay fare maligach ni wayin ni kan duwgiliy. 16 Ma ku yira pi reb e kaming ni pumo’on ni fen e maligach ko denen. Mu pi’ed e pin’ey nib dachug ko fare maligach ni mo’oruf ni gubin e rran nge maligach ni grain riy nge maligach ni wayin.

17 Ma bin ni l’agruw e rran ngay e ngan pi ragag nge l’agruw e garbaw ni pumo’on ni kab bitir, l’agruw e saf ni pumo’on, nge ragag nge aningeg pifak e saf ni pumo’on ni ta’reb e duw yangarrad, ni dariy bang u dowrad nib kireb. 18-19 Mu pi’ed nib mu’un e tin ba’aram e maligach ngay ni kan duwgiliy ni fen e bin som’on e rran.

20 Ma bin dalip e rran e ngam pi’ed ragag nge ta’reb e garbaw ni kab bitir, l’agruw e saf ni pumo’on, nge ragag nge aningeg pifak e saf ni pumo’on ni ta’reb e duw yangarrad, ni dariy bang u dowrad nib kireb. 21-22 Mu pi’ed nib mu’un e tin ba’aram e maligach ngay ni kan duwgiliy ni fen e bin som’on e rran.

23 Ma bin ni aningeg e rran e ngan pi’ ragag e garbaw ni pumo’on, l’agruw e saf ni pumo’on, nge ragag nge aningeg pifak e saf ni pumo’on ni ta’reb e duw yangarrad, ni dariy bang u dowrad nib kireb. 24-25 Mu pi’ed nib mu’un e tin ba’aram e maligach ngay ni kan duwgiliy ni fen e bin som’on e rran.

26 Ma bin ni lal e rran e ngan pi’ mereb e garbaw ni pumo’on ni kab bitir, l’agruw e saf ni pumo’on, nge ragag nge aningeg pifak e saf ni pumo’on ni ta’reb e duw yangarrad, ni dariy bang u dowrad nib kireb. 27-28 Mu pi’ed nib mu’un e tin ba’aram e maligach ngay ni kan duwgiliy ni fen e bin som’on e rran.

29 Ma bin ni nel’ e rran e ngan pi’ meruk e garbaw ni pumo’on ni kab bitir, l’agruw e saf ni pumo’on, nge ragag nge aningeg pifak e saf ni pumo’on ni ta’reb e duw yangarrad, ni dariy bang u dowrad nib kireb. 30-31 Mu pi’ed nib mu’un e tin ba’aram e maligach ngay ni kan duwgiliy ni fen e bin som’on e rran.

32 Ma bin ni medlip e rran e ngan pi’ medlip e garbaw ni pumo’on ni kab bitir, l’agruw e saf nib pumo’on, nge ragag nge aningeg pifak e saf ni ta’reb e duw yangarrad, ni dariy bang u dowrad nib kireb. 33-34 Mu pi’ed nib mu’un e tin ba’aram e maligach ngay ni kan duwgiliy ni fen e bin som’on e rran.

35 Ma bin ni meruk e rran e ngam mu’ulunggad ni fan ko liyor ma dab ni maruwel. 36 Min pi’ e maligach ni mo’oruf nib maligach ni ggan ngak SOMOL, ni bfel’ bon u wan’: reb e garbaw ni pumo’on ni kab bitir, reb e saf ni pumo’on, nge medlip i pifak e saf ni ta’reb e duw yangarrad, ni dariy bang u dowrad nib kireb. 37-38 Mu pi’ed nib mu’un e tin ba’aram e maligach ngay ni kan duwgiliy ni fen e bin som’on e rran.

39 Irera’ fapi gafal nib l’ag rogon ko fapi maligach ni mo’oruf, maligach ni grain, maligach ni wayin, nge maligach nma gapaseg thilin Got nge girdi’ ni ngam pi’ed ngak SOMOL ko madnom riy ni kan turguy. Pin’ey e ngan dachuguy ko fapi maligach ni ngam pi’ed ni nge lebug e n’en nni ognag ara pi maligach ni yugun leamnag ni ngan pi’. 40 Aram me yog Moses ngak yu Israel urngin e tin ni yog SOMOL ni ngan rin’.