49
Jakob ni yi’iynag murung’agen fapi pumo’on ni fak
1 Me pi’ Jakob e thin nge yan ngak fapi pumo’on ni fak ni be ga’ar, “Mmu’ulunggad, nggog ngomed e n’en ni bayi yib ngomed ko tin kabay e rran nga m’on:
2 “Mmu’ulunggad ngam telmed, gimed pifak Jakob;
mu telmed ngak Israel ni chitamngimed.
3 “Ruben, ni bin som’on i fakag nni gargeleg, i gur gelngig,
me gur e bin som’on i fakag nnap’an ni taw nga yangreg ko pagel,
i gur e th’abi tolangan’um, mi gur e th’abi gel u fithik’ urngin e pumo’on ni fakag.
4 Ga bod e ran ni sugubur nge wagey nga daken e binaw, machane dab mpar ni gur e th’abi ga’ fam,
ni bochan e kam pirew reb e ppin rog.
Kam alitnag e k’iniy ni gil’ e chitamam!
5 “I Simeon nge Levi e l’agruw i pumo’on ni yow walag;
yow ma fek talin e cham rorow ngar k’ar cham ngay.
6 Dab gu un ngorow ko thin nib mith ni yow ma puruy’nag;
dab gu mang reb i girdi’en e mu’ulung rorow,
ni bochan e yow ra damumuw mi yow thang e fan rok e girdi’,
ma yow ma marwothnag e garbaw nib gosgos u wan’row.
7 Nge buch wa’athan e damumuw rorow, ya kayigi gel,
ma ngki buch wa’athan e puwan’ rorow, ya kayigi gel e gafgow ni yow be pi’.
Bay gu weregrow u daken e nam rok Jakob;
ma pi’in ni owcherow e bay gu wereg u fithik’ e girdi’ nu Israel.
8 “Judah, pi walagem ni pumo’on e bay ra pininged e sorok ngom.
Bay mu kol k’angan e pi to’ogor rom;
ma pi walagem ni pumo’on e bay ra siro’gad ngom.
9 Judah e ba layon ni bfel’ yangren.
Ma li’ e n’en ni nge li’ me sul ko gin nma mith riy.
Judah e bod ba layon,
ma k’iyag ir nge mol nga but’,
ma dariy be’ nra finey ni nge rin’ ban’en ngak. Num 24:9; Rev 5:5
10 Fare sog ko pilung e dabi chuw rok Judah,
ma ku dabi chuw fa lay i ren ni fen e gagiyeg u thilin e rifrif u ay;
nge mada’ ko ngiyal’ ni bay yib e en ir e fen,
ma bay i fol e girdi’ rok.
11 Ke m’ag e dongki rok ni kab bitir nga ba ke grape,
ni aram e kaen nth’abi fel’.
Ma maluknag e mad rok u fithik’ e wayin nib ra’en racha’.
12 Ke row owchen ni bochan e wayin ni be unum,
ma nguwelen e ba wech ni bochan e milik ni be unum.
13 “I Zebulun e bay i par u to’oben e day;
ma dap’el’ay rok e bayi par ni tafen e barkow;
ma tafen e bay yan nge mada’ nga Sidon.
14 “Issakar e dariy e thilthil rorow ba dongki,
Nike paraw nga but’ ni bay e chugum ni be fek u ruw raba’ i charen.
15 Machane ke guy feni fel’ e gin’em ni ngan toffan riy,
Nge feni manigil e gi binaw nem.
Me simormor nga but’ ni nge fek gilban,
Min towasar ngak nge maruwel ni bod e sib.
16 “I Dan e bayi gagiyegnag e tirok e girdi’.
Bay ra pired ni yad bod e tin kabay e ganong nu Israel.
17 Dan e bayi bod ba porchoyog u barba’ e kanawo’,
Ni ba porchoyog ni bay e yub u l’ugun u to’oben e kanawo’,
Nma k’ad wurilen ay e os,
Ya nganon’ nga wuriyel e en ni bay u daken eos.
18 “SOMOL, gu be sonnag e ayuw ni bay mpi’.
19 “Mi Gad e bay yib baraba’ i moro’ro’ i cham ngak,
Machane bayi cham ngorad nge lol’oegrad.
20 “Ma girok Asher e binaw e bay yib e ggan riy ni pire’.
Ggan nra pi’ e rayag ni nge kay ba pilung.
21 “I Naftali e ba gamanman ni deer ni be yan ko gin ba’adag ni nge yan ngay,
Ni be gargelnag pifak ni bfel’usun.
22 “I Josef e bod ba dongki nib malboch u to’oben ba alublub,
Bod ba fak e dongki ni malboch ni bay u sigre’en bburey.* Josef . . . sigre’en e burey; ara Josef e bod ba ke gek’iy nike tugul u to’oben ba alublub, be yib wom’ngin ni pire’ mab dar pa’ngin nga daken ba yoror.
23 Pi to’ogor rok e bay ur chamgad ngak nib elmirin,
Ra feked e gat’ing nge gan e gat’ing rorad ngu’ur lol’iged.
24 Machane gat’ing rok e ba mayluy,
Ma ruw raba’ i pa’ nni ngongliy nib gel
U gelngin fare Got rok Jakob ni Gubin Ma Rayag rok.
Ni aram fare Tagafaliy e saf, ma Ir e Yoror rok yu Israel.
25 Ayuw nma yib ngom e yib rok fare Got
Nma liyor e chitamam ngak,
Ni yib rok Got Th’abi Gel Gelngin.
Got e bayi fal’eg wa’atham ko n’uw nge yupa’ i lul’ u but’
Bayi fal’eg wa’atham
Nge yo’ornag e pi’in owchem.
26 Nge fel’ rogon ni bayi pi’ ni aram e grain nge floras,
Nge fel’ rogon ni be yib ko burey nike kakrom,
Nge urngin e tin ni bfel’ ni bay ko pi burey, ni burey ni bay i par,
Pi tow’ath ney e ngi i par rok Josef,
Ni ir e ka ni fael ngabang u fithik’ walagen ni pumo’on.
27 “I Benjamin e bod ba gamanman ni wolf nma thang e pogofan;
Kadbul e ma languy e n’en nike li’,
Ma blayal’ me pag e f’oth nga k’on.”
28 Irera’ fa ragag nge l’agruw i ganong nu Israel, irera’ e n’en ni weliy e chitamangirad ngorad. I yibilayrad ngak Got, nra bagayad me yibilay nrogon nib m’ag ngak.
Jakob ni yim’ mi ni k’eyag
29 Me ga’ar Jakob ngorad, “Chiney e aram e nggu wan ngak e girdi’ rog ni karm’ad, marod mu k’eyged gag ngak e pi chitamag u lan fare yiy ni bay ko fa gi binaw rok Efron, ni ir reb e Hittite, 30 ni bay u Makpelah, ni bay ko ngek u Mamre u lan e nam nu Kanaan. I chuw’iy Abraham e re yiy nem nge re gi binaw nem rok Efron, ni ir reb e Hittite, ni fan e re gi binaw nem e ngu’un gum’eyag riy. 31 Ireram e gin nni k’eyag Abraham nge Sarah ni le’engin riy; ma ku ir e ra k’eyged Isak nge Rebekah ni le’engin riy; ma ku ireram e gin ni gu k’eyag Leah riy. 32 Re gi binaw nem nge re yiy ni ba’aram ni bay riy e ni chuw’iy rok fapi girdi’ ni kanog e Hittite ngorad.” 33 Fa’ani mu’ Jakob ko welthin ngak fapi pumo’on ni fak me girengiy ay nga daken e chob me yim’, me yan ngak e girdi’ rok ni pi’in ni karm’ad.
*49:22 Josef . . . sigre’en e burey; ara Josef e bod ba ke gek’iy nike tugul u to’oben ba alublub, be yib wom’ngin ni pire’ mab dar pa’ngin nga daken ba yoror.
DRAFT VERSION — Proofreading in progress