BABYOR NI PI’ PAUL NGE YAN NGAK E GIRDI’ NU
GALATIA
Fa’an ntabab i weliy fare Thin Ni Bfel’ ni murung’agen Jesus u fithik’ e pi’in gathi yad piyu Israel me mich u wun’rad, me leamnag boch e girdi’ ni pi’in nike mich Jesus u wun’rad e thingar ra folgad ko Motochiyel rok Moses ma fin aram e kar manged e tin riyul’ i girdi’en Kristus. Me yog Paul ni gathi aram rogon, ya ma mat’awnag Got urngin e girdi’ ngak u daken e michan’ rorad ngak Kristus me pi’ ngorad e bin nib be’ech e pangiy. Me yib boch e girdi’ nga Galatia, ni ba nug nu Asia Minor nib milfan nga Roma, nra togopluwgad ngak Paul nrogned nthingar kun fol ko Motochiyel rok Moses ni fan e ngan mat’aw ngak Got.
I Paul e yoloy e re babyor ney ngak girdi’en e galesiya nu Galatia ni bochan e ke fol boch i yad ko re machib nem ni gathi riyul’, ma ba’adag Paul ni nge ayuwegrad ni nge pagan’rad ngak Kristus ni go ir e rayag ni nge mat’awnagdad ngak Got nge pi’ e bin nib be’ech e pangiy ngodad. Tom’on ko babyor rok e be weliy Paul nib mat’aw ni nga ni pining e apostel rok Jesus Kristus ngak, ya pong ni yib ngak ni nge mang reb e apostel e gathi yib rok e girdi’, ya ke yib rok Got. Ma ke l’oeg Got ni nge maruwel u fithik’ e pi’in gathi yad piyu Israel. Me ki weliy bayay ni ngan mat’aw ngak Got u daken e michan’ ngak Jesus Kristus. U lan e tin tomur e guruy e be dag Paul ni pangiy ni bfel’ nrogon girdi’en Kristus e be yib u daken e t’ufeg nge runguy ni ir e wenegan e michan’ rok be’ ngak Kristus.
Tin ni bay riy
Tabolngin 1:1–10
Mat’awun Paul nrogon ba apostel 1:11—2:21
Thin ni Bfel’ ni murung’agen e runguy rok Got 3:1—4:31
Rogon ni be par girdi’en Kristus ni gathi yad e sib ya kar chuwgad u tan e Motochiyel, nge rogon ni ngar paged fare Kan Nthothup ni nge gagiyeg nagrad 5:1—6:10
Tin tomur e thin 6:11–18
1
1 Re babyor ney e yib rok Paul, ni pong ni yib ngak ni nge mang reb e apostel e gathi yib rok e girdi’ ara maruwel Got ngak e girdi’ nge mang girdi’ e pining, machane i Jesus Kristus e yib rok nge Got ni ir e Chitamangiy, ni ir e en ni faseg Jesus ko yam’. 2 Urngin pi walagdad ni girdi’en Kristus ni yad bay u roy e kar uned ngog kug pi’ed e re bugithin ni ba’aray ni nge yib ngomed girdi’en e pi galesiya ni bay u Galatia ni be lungumad:
3 I Got ni Chitamangidad nge Somol rodad i Jesus Kristus e ngu’ur ayuwegew gimed ma yow be pi’ e gapas nga lanin’med.
4 Kristus e pi’ ir ni fan ko denen rodad ni nge pithigdad ko re ngiyal’ i n’ey ntin nib kireb e be gagiyegnag e girdi’, ni bod rogon ni ba’adag e Got rodad ni ir e Chitamangidad ni nge rin’ Kristus. 5 I Got e ngu’un tayfan ndariy n’umngin nap’an! Amen.
Ri ta’reb e Thin Ni Bfel’ ni yib rok Got
6 Kug gin ngomed! Ya rib machreg ni gimed be n’ag e en ni ir e ke piningmed u daken e runguy rok Kristus ngodad gimed be yan nga yugu reb e Thin Ni Bfel’. 7 Ma bin riyul’ riy e dakuriy “yugu reb e Thin Ni Bfel’ ngabang ni yib rok Got.” Gu be yog e re bugithin ney ya bay boch e girdi’ ni yad be guy rogon ni ngar wagagey niged lanin’med, ni aram e yad be guy rogon ni ngar thiliyeged e Thin Ni Bfel’ ni murung’agen Kristus. 8 Machane mus ngomad ni fa’an gamad ra machibnag yugu reb e thin ngomed nib thil ko fa bin ni kug machib niged ngomed ara reb e rin’ reb e engel ni yib u tharmiy, ma bay ni gechignag u fithik’ e nifiy ni dabi math bi’id! 9 Ka’a gogned ngomed ko som’on, me ere chiney e ngku gog bayay ni nge lungug: fa’anra machibnag be’ ngomed reb e Thin Ni Bfel’ nib thil ko fare Thin Ni Bfel’ ni yib rok Got ni ir e ke mich u wun’med, ma bay ni gechignag u fithik’ e nifiy ni dabi math bi’id!
10 Re bugithin ney ni kugog e gimed be finey ma gu be guy rogon ni nggu wan nga laniyan’ e girdi’? Danga’! I Got e gu be finey ni nggu wan nga laniyan’! Ara gimed be finey ni gu be guy rogon ni nggu fel’ u wan’ e girdi’? Fa’an mang e gu be guy rogon ni nggu fel’ u wan’ e girdi’, ma dab gu mang reb e tapigpig rok Kristus.
Rogon ni mang Paul reb e apostel
11 Pi walageg ni girdi’en Kristus, ba’aray bbugithin ni nggog ngomed ni nge lungug: re Thin Ni Bfel’ ney, ni yib rok Got ni ir e gu be machibnag ngak e girdi’ e gathi sum rok e girdi’. 12 Gathi be’ e pi’ ngog ara be’ e fil ngog. Yi Jesus Kristus e ir e ke dag ngog kug nang.
13 Kan weliy ngomed rogon pangig ni ug par ko ngiyal’ ni ba’aram ni gu be tiyan’ug ngarogon kanawo’en nma liyor piyu Israel ngak Got, nge rogon ni ug gafgownag girdi’en e galesiya rok Got nda ug runguyrad mu ug athamgiliy ni nggu kirebnag. 14 Ma ug moy ni gub m’on rok bo’or e girdi’ nu Israel ni gamad ta’ab yangar u rogon kanawo’en nma liyor piyu Israel ngak Got. Ma ri ug tiyan’ug ngay ma gu be athamgiliy nrogon nrayag rog ngu’ug fol u rogon ni ngan liyor ngak Got nike af rok e pi chitamangidad i yib ke mada’ ngodad e tin chiney e girdi’ nu Israel.
15 Machane bochan e runguy rok Got ngog me duwgilyeg u m’on ko ngiyal’ ndawor ni gargelnigeg riy, me piningeg ni nggu pigpig ngak. 16 Nge ngiyal’ ni ba’aram ni turguy riy ni nge dag Fak ngog ni fan e nge yag ni nggu machibnag fare Thin Ni Bfel’ ni murung’agen e en ni Fak ngak e pi’in gathi yad piyu Israel, ma gathi gu wan ngak be’ nge mang ir e yog ngog e tin ni nggu rin’, 17 ara gu wan nga Jerusalem ngug guy e pi’in yad e ar manged apostel. Machane n’en ni gu rin’ e ka chingiyal’ nem mu gu wan nga Arabia, mu gu sul u Arabia nga Damaskus. 18 Ma dalip e duw nga tomuren ma aram mu gu wan nga Jerusalem nggu fith boch ban’en ngak Peter, mu gu par rok ni l’agruw e wik. 19 Ma da kug guy yugu reb e apostel, kemus ni James* yugu reb e apostel, kemus ni James; ara yugu reb e apostel; kemus ni cha’ ni gguy e James. e gguy, ni ir e walagen Somol.
20 N’en ni kug yoloy e ba riyul’, ni gu be yog ngomed u p’eowchen Got ndagur lifith l’ugunag!
21 Me tomur riy mu gu wan ko binaw i yan u lan yu Syria ngu Silicia. 22 Ka aram n’umngin nap’an i yib nge mada’ ko ngiyal’ney ma dawori guy girdi’en e pi galesiya rok Kristus ni bay u lan yu Judea owcheg. 23 Kemus ni tin ke yog e girdi’ ngorad nike lunguy ngorad: “Fare mo’on ni fa’anem ni i gafgow nagdad e be machibnag i yan ko girdi’ murung’agen rogon ni nge mich Kristus u wun’uy, ni ireram fare mich u wun’uy ni ir e i guy rogon ni nge thang!” 24 Ma aram miyad yog e sorok ngak Got ni bochag.
DRAFT VERSION — Proofreading in progress