1 “Mu ngongliy ba altar ko gek’iy ni acacia, ni ngu’un urfiy e incense* INCENSE: Bogi ban’en ni bfel’ bon ni yima urfiy nge yan e ath riy ngak Got. u daken. 2 Re altar ney e ta’reb n’umngin nga radan, ya ragag nge meruk e inch n’umngin ma ku ragag nge meruk e inch radan, ma guyey nge nel’ e inch tolngin. Fa aningeg i gagey ko tabthung riy u daken e ba peth ko re altar nem. 3 Mag ing daken nge liyeg ni polo’ nge fapi gagey riy ko gol, mu kum gabdiyed bathal i gol u mirichlen. 4 Mag ngongliy l’agruw i luwaw ni fen e fek, ngan tay reb u barba’ ma reb nga barba’ u tan fare thal i gol u mirichlen ni gil’ e mat’ ni ngu’un fek. 5 Mu ngongliy e gali mat’ ney ko gek’iy ni acacia mag ing ko gol. 6 Mag tay e re altar ney nga wuru’ fare gi kateng nib gafgaf u mit fare Kahol ko M’ag. Ireray e gin bay gu mada’ nigem ngay. 7 Aron e gubin e kadbul nra yib ni nge ngongliy rogon fapi magal, ma nge urfiy e incense u daken e fare altar. 8 Ku aram e n’en ni nge rin’ ni blayal’ nnap’an ni nge yib i tay e nifiy ko fare magal. Re incense ney ni yima urfiy ni aram e yibe ognag e dab ntal i rin’ ni gubin e mfen nga m’on. 9 Dab mu ognag e incense u daken e re altar ney ndanog ni ngan pi’, ara ba gamanman ni maligach, ara grain, ma dab mu pu’og e wayin ni maligach nga daken. 10 Ta’bayay u reb e duw ni nge machalbognag Aron fare altar ni rogon ko motochiyel, ni aram e nge tay e racha’ ko fa aningeg i gagey u tabthungen fare altar, nracha’en fare gamanman ni maligach ko denen. Ren’ey e ngu’un rin’ ni gubin e duw i yan ngaram. Re altar ney e nge par ni ga’ngin nib thothup, ni kan ognag ngog, i Gag SOMOL.”

11 Me ga’ar SOMOL ngak Moses, 12 “Nap’an ni ga ra the’eg e girdi’ nu Israel, mra be’ ma nge pi’ puluwon e pogofan rok, ya nge dabi yib ba riya’ ngak u nap’an ni yibe math’eg girdi’. 13 Gubin e girdi’ ni kan the’egrad e thingar ra pi’ed e salpiy ni oren ni kanog, ni bod tomalngin ni kan turguy ni ngan pi’. Gubin e girdi’ nthingar ra pi’ed e salpiy ni aram e kar og niged ngog. 14 Gubin e pi’in kan the’egrad ko fare math’eg girdi’, ni pumo’on nike gaman e rliw’ e duw rorad ngalang e ngar pi’ed e salpiy ngog ni rogon ni kanog. 15 Gathi en ba yo’or ban’en rok e nge pi’ nib yo’or, ma en dariy ban’en rok e nge pi’ nib lich, ko ngiyal’ ni ngar pi’ed e salpiy ni rogon ni kanog ni fan ko pogofan rorad. 16 Mu fek e pi salpiy ney rok e girdi’ nu Israel ngu’um fanay ko maruwel ko fare Tent u p’eowcheg. Re tax ney e nge mang bayul ko pogofan rorad, ma aram e bay i par u lanin’ug ni ngu’ug yoror rorad.”

17 Me ga’ar SOMOL ngak Moses, 18 “Mu ngongliy barba’ i dabiy ko bronze ni enggin u but’ e kub bronze. Mag tay e re dabiy ney nga thilin e Tent nge altar, mag pu’og e ran nga langgin. Exo 38:8 19 Aron nge pumo’on ni pifak e ngu’ur faned e re ran ney ni ngar luk niged pa’rad nge rifrifen ayrad ngay 20 u m’on ni ngranod ngalan fare Tent ara ranod ko fare altar ni ngar pi’ed fare ggan ni aram e yad be ognag ngog. Ma aram e dabni thang e fan rorad. 21 Thingar ra maluk niged pa’rad nge rifrifen ayrad, ya nge dab ra m’ad. Nge par e ren’ey nib gam’ing ni ngu’ur rin’ed nge pi’in owcherad ni dariy n’umngin nap’an.”

22 Me ga’ar SOMOL ngak Moses, Exo 37:29 23 “Mu fek e tin nthabi fel’ ko spices— ragag nge l’agruw e pawn e myrrh nib ranran, nge nel’ pawn e cinnamon ni bfel’ bon, nge nel’ e pawn e cane nrib fel’ bon, 24 nge ragag nge l’agruw pawn e cassia (ni ngan thabthabelnag ni bod tomalngin ni kan turguy). Mag puthuy reb e galon e gapgep ni olive ngay, 25 mag ngongliy rebe gapgep ni fen e mathiy nib tabgul, ngam athkuy ni bod e florida. 26 Ni ir e ngu’um gapgepnag fare Tent u p’eowcheg ngay, nge fare Kahol ko M’ag, 27 nge fare tebel nge urngin mam’en, nge fare tagil’ e magal nge urngin mam’en, nge fare altar ni yima urfiy e incense u daken, 28 nge fare altar ni yima urfiy e pi maligach u daken, nge gubin mam’en, nge fa raba’ i dabiy nge tagil’. 29 Mag ognag e pin’ey ngog, ma aram e gubin e pin’ey nra polo i thothup, mra math be’ ara ban’en ngay mra fek’ machan nga gelngin feni thothup.† FEK MACHAN NGA GELNGIN FENI THOTHUP: ku errogon ni bay ko 29:37. 30 Ma aram mag gapgepnag Aron nge fapi pumo’on ni fak, ni aram e kam og nagrad ni ngar manged prist ni ngar pigpiggad rog. 31 Me lungum ngak e girdi’ nu Israel, ‘Re gapgep ney ni fen e mathiy nib tabgul e nge par ni ngu’un fanay ko pigpig rog i yan ngaram. 32 Thingar dab ni pu’og nga daken yug be’, ma dab kum ngongliy reb e gapgep ni ta’reb rogon ko biney. Ya ba tabgul, ma thingar un tay nib tabgul. 33 En nra ngongliy reb ni bod e biney ara fanay boch nge gapgepnag yug be’ ni gathi ba prist, e aram e dabki mang reb e girdi’ rog.’ ”

34 Me ga’ar SOMOL ngak Moses, “Mu fek e pin’en ni ba’aray ni falel’ bon ni ta’reb oren bmit nge bmit — ni aram e stacte, nge onycha, nge galbanum, nge frankincense. 35  Mu fek e pin’ey ngam ngongliy e incense riy, ngam athkuy ni bod e florida. Mu athkuy e sol ngay ngi i par nib machalbog ma ba tabgul. 36 Mu bilig boch nge bod e ab, mag fek ngalan fare Tent nga p’eowcheg, nga mu swerwereg u mit fare Kahol ko M’ag. Mu tay e re incense ney nikari thothup. 37 Dab kum fal’eg reb e incense ni fanam ni nge ta’reb rogon e miti n’en nni fanay ngay ko biney, mu tay e biney ni ba thothup ni kan ognag ngog. 38 Fa’anra ngongliy be’ reb ni bod rogon e biney ni nge fanay ni florida, ma dabkun leamnag ni ir reb e girdi’ rog.”