1 “Mu pining Aron ni walagem nge pifak ni pumo’on ni aram Nadab, Abihu, Eleazar, nge Ithamar. Mu faelrad nga bang u fithik’ piyu Israel, ya ngar manged tapigpig rog ni prist. 2 Ma ga ngongliy madan e prist ni fen Aron ni walagem, nib gamog ma bfel’usun. 3 Mu non ngak gubin e pi’in bay e salap rorad ni kug pi’, ngar ngongliyed madan Aron ya ngan tabgulnag nge mang prist ngi i pigpig rog. 4 Mog ngorad ni ngar ngongliyed bangi mad ni yima tay nga daken ngorngorey, nge ba efod, nge ba wuru’ e mad nib n’uw, nge ba kenggin ni kan sisyunag, nge bangi mad ni yima bachiy nga lolugey, nge bangi leed ni mad. Ngar ngongliyed e mit i mad ney ni madan e prist nge fanay walagem i Aron nge pifak ni pumo’on, ya ngar pigpiggad rog ni prist. 5 Fapi girdi’ ni yad basalap e ngar faned e tret nib gol; nge bunu’en e saf ni kan k’ad ko ra’en mak’ef, purple, nge row, nge mad ni wech.

6 “Miyad ngongliy fare efod u bunu’en e saf ni kan k’ad ko ra’en mak’ef, purple, nge row; nge tret ni gol ra’en, nge mad ni wech, mi ni sisyunag daken ni fel’ ya’an riy. 7 Ma l’agruw e gafan e mad, nra yag nni m’ag u lik’ipon, e ni puthuy ko fagal raba’ i mad u barba’ ngu barba. 8 Ma leed riy e ngkun lifith u ta’ab mit i ban’en min puthuy ko fare efod nge par ni bang riy. 9 Mfek l’agruw i malang ni onyx nib tolang puluwon ngan ker fithingan fa ragag nge l’agruw i pumo’on ni fak Jakob nga daken. 10 Ra reb fa gali malang ma nel’ e ngachal ni ngan ker nga daken, ni ngan tabab ko en th’abi ilal nge mada’ ko en th’abi wen. 11 Mu fek be’ nib salap i ngongliy e churwo’ nge ker fithingan e fapi pumo’on ni fak Jakob nga daken fa gal malang, min ayliy e gal malang nem nga tagil’ nib gol. 12 Mi ni tay fa gal malang nga daken gafan lik’ipon fare efod ni nge gagyelnag fa ragag nge l’agruw i ganong nu Israel. Aray rogon ni bayi fek Aron fithingrad u daken lik’ipon ni ruw raba’, ma aram e Gag SOMOL e bay gu par ni gubin ngiyal’ ni bay e girdi’ rog u lanin’ug. 13 Mu ngongliy l’agruw e tagil’ ko gol ni go’ gol, 14 nge l’agruw kiy i chen ni go’ gol ni kan bachiy ni bod ba yil’ i aw min puthuy ko fa gal tagil’.

15 “Ma ku yira ngongliy bangi mad nma tay fare Prist ni Th’abi Ga’ nga daken ngorngoren ni nge m’ug riy ko mang e bmagan’ Got ngay. Yira ngongliy u ta’ab mit i ban’en nni ngongliy fare efod riy, ma ngkun sisyunag nta’reb rogon ya’an ngay. 16 Regi mad nem e ngan t’ar u lukngun ni ta’reb ga’ngin rdan nge n’umngin; ni mereb e inch n’umngin ma ku mereb e inch radan. 17 Min ayliy aningeg thal i malang nib tolang puluwon nga daken; thal ni m’on e reb e malang ni ruby, nge reb e topaz, nge reb e garnet; 18 ma thal nl’agruw e reb e malang ni emerald, nge reb e sapphire, nge reb e diamond; 19 ma thal ndalip e reb e malang ni turquoise, nge reb e agate, nge reb e amethyst; 20 ma thal ni aningeg e reb e malang ni beryl, nge reb e carnelian, nge reb e jasper. Pi malang ney e kan ayliy nga tagil’ nib gol. 21 Mra reb e pi ragag nge l’agruw i malang ney ma ngan ker fithingan reb fapi pumo’on ni fak Jakob nga daken, ya nge gagyalnag fa ragag nge l’agruw i ganong nu Israel. 22 Min ngongliy e chen ko gol ni go’ gol ni kan l’aeng ni bod bayil’ i aw ni ku fen fare gi mad u daken ngorngorey. 23 Min ngongliy l’agruw i luwaw ni gol ngan puthuy ko gal nlang e tabthung ko fare gi mad ni fen ngorngorey, 24 mi ni m’ag fa gal kiy i chen nib gol ko fa gal luwaw. 25 Ma taban u baley fagal yil’ i chen e ngan m’ag ko fa gal tagil’, me yag nni the’ nga gafan pon fare efod. 26 Mu kun ngongliy ko gol l’agruw e luwaw nga nip’ nga tabthungen fare gi mad nib migid nga but’ u ba’ ni langgin u taban nib migid ko fare mad ni efod. 27 Mu kun ngongliy ko gol l’agruw e luwaw ngan m’ag u puluwon gafan pon fare mad ni efod nga but’ nib chugur ko wup riy ma bay ngalang ko fare leed ni kan lifith ni bfel’ ya’an. 28 Mi ni m’ag bayil’ i gaf nib ra’en mak’ef ko fa gali luwaw ni bay ko fare gi mad nma par u daken ngorngorey mu kun m’ag ko fa gali luwaw ni bay ko fare mad ni efod, ya nge par e gi mad nem u daken ngorngorey ni bay nga daken fare gi leed ndabi puf.

29 “Nap’an nrayan Aron ngalan e Gin ba Thothup ko fare Tent, ma nge tay nga daken ngorngoren e regi mad ney ni bay fapi malang nib tolang puluwon riy ni kan ker fithingan fapi ganong rok yu Israel nga daken, ma aram e Gag SOMOL e bay gu par ni gubin ngiyal’ ni bay e girdi’ rog u lanin’ug. 30 Mi ni tay fare Urim nge Thumim* URIM NGE THUMIM: L’agruw i ban’en nma nang e prist riy e n’en nib magan’ Got ngay; dan nang rogon ni ur maruwelgad ngay. ngalan fare gi mad nma par u daken ngorngorey, ya nge fek Aron i yib nga p’eowcheg nib thothup. Gubin yay nra yib nga p’eowcheg ma nge m’ag e regi mad ney nga daken ngorngoren, ya nge yag ni nang e tin ba magan’ug ngay ni fan ngak e girdi’ nu Israel.

31 “Fare mad nib n’uw ni bay nga tanggin fare efod e ngan ngongoliy u bunu’en e saf ni ga’ngin nib ra’en mak’ef. 32 Yira kuruf tagil’ i lolugey riy, min lifith bang e mad u mirichlen e gin kan kuruf nge gelnag ndabi mogchoth. 33-34 Mu pgan e re mad ney ni ga’ngin e ngan tay ya’an e pomegranate ngay ni kan ngongliy u bunu’en e saf nib ra’en mak’ef, purple, nge row, ni bay yuchi bel nib gol u thilthilin. 35 Re mad ney e nge yin’ Aron u nnap’an ni be pigpig ni prist. Nap’an nra yib nga p’eowcheg u lan e Gin ba Thothup ara ke chuw u rom, ma yibe rung’ag lingan fapi bel, ma aram e dabi yim’.

36 “Mu ngongliy bochi madeliya ko gol ni go’ gol min ker e yu bug i thin ni ba’aray nga daken, ‘Kan ognag ngak SOMOL.’ 37 Mi ni m’ag nga m’on ko fare turban, † TURBAN: Bangi mad ni yima bachiy nga lolgey. nga bal’ i gaf nib ra’en mak’ef. 38 Aron e nge tay e ran’ey nga lolgen nib migid e madaliya riy nga peri’, ya aram e Gag SOMOL, e ra magan’ug nga urngin e pin’en nra pi’ yu Israel ni kar og niged ngog, ni yug ra mang e kar og niged nib kireb rogon ngog.

39 “Ma ngkun lifith kenggin e mad rok Aron ko mad ni wech, mu kun fal’eg riy fare turban rok nge bangi leed ni kan sisyunag ni bfel’ ya’an.

40 “Min ngongliy boch e kenggin, nge boch e leed, nge boch e uruwach ni fan ko fapi pumo’on ni fak Aron, ya ngar tabgulgad miyad gamog u owchey. 41 Ma gon’ e pi mad ney nga daken Aron ni walagem nge pifak ni pumo’on. Ma aram mag gapgep nagrad ngam yibleyrad ngam og nagrad ni kar tabgulgad, nrayag ni ngar pigpiggad rog ni prist. 42 Min ngongliy ko mad ni wech yuley i tan e mad ni farad, ni mus u lukngurad nge mada’ nga daken bugrad, ni nge upnguyrad. 43 I Aron nge fapi pumo’on ni fak e thangri gubin ngiyal’ ni ngranod ngalan fare Tent u p’eowcheg ara rabad nga altar ni ngar pigpiggad ni prist u lan e Gin ba Thothup, ma dabisiy ni ngar chuwgad ko fa yu ley i mad, ya nge dab gu thang e fan rorad ni bochan e de upong e yungin nge mith u dowrad. Ren’ey e ngi i par nib gam’ing ni ngi i rin’ Aron nge pi’in owchen.