1 Yug nap’an ni nang Athaliah ni chitinngin Ahaziah ni Pilung ni kani thang e fan rok fare mo’on ni fak, me yog ni ngan thang e fan rok urngin chon fare tabnaw rok e en ni pilung. 2 Kemus ni go’ Joash nib mo’on ni fak Ahaziah e mil. Ri chugur ni nge un ngak boch i yad ngan li’rad, machane me ayuweg Jehosheba ni be’ ni bpin ni walagen e reb e gal labthir rok, re pin nem e chitamngin Jehoram ni Pilung mab thil e chitinngirow Ahaziah. I fek Jehosheba fare tir nge yarif rok ngalan e senggil ni yima mol riy u lan fare Tempel nge mithag u rom rok Athaliah, ere dan thang e fan rok. 3 Nel’ e duw ni chugliy Jehosheba fare pagel ma be mithag u lane Tempel, u nap’an ni Athaliah e repin ni be gagiyeg ni pilung.

4 Machane u lan e re duw ni gaman e medlip ngay me pining Jehoyada ni prist e pi tolang ko salthaw nib milfan ngorad e pi tamatnag ko pilung nge pi’in nma pos u tafen e pilung, me yog ngorad ni ngarbad nga Tempel, ko gin ni yog riy ngorad ni ngar pininged e kefel’ u fithingan Got ko tin ke leamnag ni nge rin’. Me dag Joash ngorad ni fare pagel ni fak Ahaziah ni Pilung 5 ma ba’aray e n’en ni yog ngorad ni ngar rin’ed: “Nap’an ni bay mbad ko maruwel romed e rofen ni Sabbath, ma ta’ab ulung u dalip e ulung romed e nge matnagiy fare naun rok e pilung; 6 ma ku reb fapi ulung u dalip e ulung e nge sak’iy nge matnagiy fare Garog ni Sur, ma bin dalip e ulung ko fapi ulung romed e ngar matnagiyed fare garog nu tabgul u keru’ e tin kabay e tamatnag. 7 Ma fa gali ulung nma mu’ ko maruwel ko Sabbath e ngar matangiyew fare Tempel ni ngar yoror ko fare pilung. 8 Ngam matnagiyed Joash ni Pilung ni kam koled e saydon romed ma demturug e gin nra yan ngay ma ngam uned ngak. Ma en nra yib nga to’obmed e ngan li’ nge yim’.”

9 Me fol fapi tolang ko tin keyog Jehoyada mar feked e pi salthaw rorad i yib ngak — tin yad be n’en ni ngar talgad ko maruwel ko Sabbath nge tin be n’en ni nge yan ko maruwel. 10 Me pi’ Jehoyada ngak fapi tolang e sarey nge yung i shield ni immoy ni fen David ni Pilung ni un ayuweg u lan fare Tempel, 11 me tay fapi pumo’on ni kar koled e saydon ni yad ba liyeg mit fare Tempel, ni yad be yoror rok fare pilung. 12 Ma aram me pow’iy Jehoyada i Joash nga wean, me tay fare te’elyaw ko pilung nga daken lolugen, me pi’ bang i babyoren e motochiyel rok e pi’in ma gagiyeg ni pilung. Ma aram min gapgepnag Joash minog ni ir e pilung. Me waywaynag e girdi’ pa’rad mar tolulgad ni be lungurad, “Ngi i par e en ni pilung nib fos nib n’uw nap’an!”

13 Me rung’ag fare pin i Athaliah nib pilung lungun e pi tamatnag nge fapi girdi’, me gurnag ir nge yib ko fare Tempel, ko gin nike mu’ulung fapi girdi’ ngay. 14 Mu rom e guy fare pilung ni kab be’ech riy nib sak’iy u to’oben fare duga’ ni bay u langan fare Tempel, ya aram rogon ko yalen. Ma ke liyeg e pi tolang nge pi ta thoy e rappa’, ma urngin e girdi’ ni yad be tolulnag e felfelan’ ma yad be thoy e rappa’. Me guchthuy Athaliah e mad rok ni kari kireban’ me tolul, ni be ga’ar, “Ka mu liyab nigedgag! Ka mu liyab nigedgag!”

15 Ma dabun Jehoyada ni ngan thang e fan rok Athaliah u lan fare gin’en ni bay e Tempel riy, ere me ga’ar ngak e pi tolang ko pi salthaw: “Mu feked fare pin nga wuru’ e re gin’ey ni bay u thilin l’agruw thal i salthaw ni matnag, mi gimed li’ nge yim’ e cha’ nra guy rogon ni nge ayuweg.” 16 Miyad kol ngar feked i yan ko fare naun rok e pilung, mu rom ko fare Garog ni Os e ra thanged e fan rok fare pin riy.

17 Me yog Jehoyada ni prist ngak Joash ni Pilung nge pi girdi’ ni ngar ngongliyed ba m’ag u thilrad nge SOMOL ni ngar pired ni yad pi girdi’en SOMOL; miki ngongliy ba m’ag u thilin fare pilung nge girdi’. 18 Ma aram me yan e girdi’ ko fare tempel rok Baal ngar buthuged nga but’; miyad bilig fapi altar nge fapi liyos ni yima meybil ngay, miyad thang e fan rok Mattan ni prist rok Baal u mit fapi altar.

Me tay Jehoyada e pi tamatnag ni yad ba maruwel ko fare Tempel, 19 ma aram me yib, nge pi tolang, nge fare tamatnag rok e pilung, nge fapi tamatnag nu lan fare naun ko pilung ni yad be un ngak fare pilung ni karbad ko fare Tempel i yib ko fare naun rok e pilung, ni be lekrad urngin e girdi’. Me yan Joash ko fare Garog ni Matnag me yan i par nga tagil’ u daken fare chiya ko pilung. 20 Ma urngin e girdi’ ni kar suggad ko falfalan’, ma ke aw e gapas u lan fare binaw, ko ngiyal’nem ni kani thang mit Athaliah u lan fare naun ni tafen e pilung.

21 I Joash e medlip e duw yangren me mang pilung nu Judah.