1 Me yan David i guy Ahimelek ni prist ni bay u lan yu Nob, me yib ngak David ni be t’on me ga’ar, “Mang ni ka mub ngaray ni go’ gur?”

2 Me ga’ar David, “Ke l’ugeg e en ni pilung ni bay e tin nggu muruwliy. Keyog ngog ndab gu weliy ngak be’ fan nike l’ugeg nge tin ku gub ni nggu rin’. Kugog ngak e salthaw rog e gin ngug gakgad ngay. 3 Be mang e bay rom ni yira kay? Mpi’ lal e flowa ni gang’ ngog ara tin ni bay rom.”

4 Me ga’ar fare prist, “Dariy rog e yugu flowa, kemus ni flowa ni ka ni pi’ ngak SOMOL e bay rog; rayag ni gu pi’ ngom ngam ked e salthaw rom ni fa’anra ke yan in e rran nap’an ndar pired e ppin.”

5 Me ga’ar David, “Dawor ra pired e ppin. Salthaw rog e gubin ngiyal’ ni yad be par ni yad ba machalbog nrogon ko yalen, ni mus ko ngiyal’ ni gamad ra yan ni nggu muruwliyed e maruwel ni gamad ma muruwliy. Ere yaney ni nggu warod ni yugu ba reb e maruwel romad e rib mudugil ndar pired e ppin.”

6 Me pi’ fare prist ngak David fare flowa nike m’ay i pi’ ngak Got, ya flowa ni bay rok e kemus ni flowa nike m’ay i pi’ ngak Got, ma kan chuweg u daken fare tebel rok Got kan fek e flowa nib be’ech kan tay nga luwan.

7 (Deog ni be’ u Edom ir e en nib ga’ ko tagafal gamanman rok Saul, ni immoy u rom e rofen n’em, ni bochan e thangri lebguy e maruwel rok u p’eowchan SOMOL.)

8 Me ga’ar David ngak Ahimelek, “Bay ba sarey rom fa bang i saydon ni ga ra pi’ ngog? Thin rok pilung e ke gur nageg kug chuw ni de yag ni nggu fek e saydon rog fa ba talin e cham.”

9 Me fulweg Ahimelek ni ga’ar, “Bay e saydon rok Goliath ni fare Filistine, ni facha’ nim li’ nge yim’ u lan e loway u Elah; bay u roy ni kan bachiy nga bangi mad u fon fare mad ni Efod. Fa’anra ga ba’adag, mag fek — kari mus e re talin e cham ni bay u roy.”

Me ga’ar David, “Mu pi’ ngog, ya dariy bang e saydon u bang ni bod feni fel’ e gin!”

10 Ma aram me chuw David u rom, ni be mil rok Saul, me yan ngak Akish ni Pilung nu Gath. 11 Me ga’ar fapi tolang rok e en ni pilung ngak Akish ni ir e pilung, “Gathi irera’ David ni Pilung ko nam rok? Irera’ fare mo’on nra i churu’ e pi’in ni ppin ma yad be yin’ tangin ni be lungrad, ‘I Saul e thang e fan rok yu biyu’, machane David e thang e fan rok yu ragag e biyu’.’

12 Me aw e pi thin rorad nem nga laniyan’ David, mri gel e marus rok ngak Akish ni Pilung. 13 Ere thilyeg pangin u p’eowcharad, ngi i dake aliliynag ir ngi i ngongol ni bod ba aliliy u nap’an ni yad be guy rogon ni ngar taleged; be yolyol nga daken e garog ko fare binaw, me pag ngubocen ngi i ser u raben nga but’. 14 Ma aram me ga’ar Akish ngak e pi tolang ko salthaw rok, “Amchangargad! Re mo’on nir e ba aliliy! Mangfan ni kam feked i yib ngog? 15 Mogned, dawor gu gaman ko girdi’ ni aliliy? Mangfan ni kum feked bagyad i yib ngi i magawon nageg u roy u lane naun rog nga pangin ni aliliy?”