1 Me weliy Saul ngak Jonathan ni fak nge urngin e pi tolang ko salthaw rok nike m’ay i leamnag rok ni nge li’ David. Machane Jonathan e rib t’uf David, 2 ma aram me cheal nge weliy ngak David ni ga’ar, “Chitamag e be guy rogon ni nge thang e pogofan rom. Ere wenig ngom, mu ayuw gabul ni kadbul; mu guy rogon ngam man mmith ngabang ma ga par riy. 3 Ma bay gub gu sak’iy u to’oben e chitamag u daken e ted ko gin’en ni ga be mith riy nggu weliy murung’agem ngak. Ma tin bay kug rung’ag e thin e bay gguy rogon ngam nang.”

4 Me yan i weliy Jonathan fel’ngin David ngak Saul ni ga’ar, “Dab mu rin’ ban’en nib kireb ngak e tapigpig rom i David. Ya dariy ban’en nib kireb nike ngongliy ngom; ya urngin e tin ke rin’ e kefel’ rogom riy. 5 I dow ko pogofan rok ko fa ngiyal’nem ni li’ Goliath, ni aram e ke gagiyegnag SOMOL piyu Israel kar gelgad ko mael. Mu guy faram ma ga felfelan’ ngay. Ere mang ni nge chiney ma ngam finey ni ngam rin’ ban’en nib kireb ngak be’ ni bfel’ e rok ni ngam thang e fan rok David ni dariy tapgin?”

6 Me motoyil Saul ko tin keyog Jonathan me micheg bbugithin nga fithingan SOMOL ndab kun li’ David ngem’. 7 Me pining Jonathan David nge weliy urngin fapi thin ngak; ma aram me fek David i yan ngak Saul, me par David ngi i pigpig ngak Saul ni bod ni i rin’ ko som’on i yib.

8 Miki mael piyu Israel nge pi Filistine bayay. Me mael David ngorad nge li’rad nrib gel e gafgow ni tay ngorad, miyad pigichel ngar milgad.

9 Me reb e rran me gagiyegnag SOMOL ba kan nib kireb nge yibi ying ngak Saul. Ma bay Saul nike par nga but’ u lan e naun rok ni bay e sarey rok u pa’, ma bay David u rom ni be musik ko harp rok. 10 Me guy Saul rogon ni nge rugoy fare sarey ngak David nge richibiy ko rungrung, machane me pilo’ David riy me yan i rog fare sarey ko rungrung. Me mil David rok Saul.

11 Ka re nep’ i n’em me l’oeg Saul boch e pumo’on ni ngar matanagiyed e naun rok David ya nge kadbul miyad li’. Mi Mikal ni le’engin David e yog ngak David ni nge ayuw ni ga’ar, “Fa’anra dab mmil e nep’ ney, ma gabul e gab yam’.” 12 Me nguchuruy David u langan e winda nga but’, me mil David nge yan. 13 Ma aram me fek fare pin ba liyos nge thikiy nga daken e chob; me tayey’nag nga ba gayul nni ngongliy ko bunu’en e kaming, me gulguluy. 14 Fa’ani yan e salthaw rok Saul ni ngar feked David, me yog Mikal ngorad nib m’ar David. 15 Machane me l’ograd Saul ni ngar sulod ngar guyed David nga owcherad. Me ga’ar ngorad, “Mfeked i yib ngaray ni kabay u chob rok nggu li’ ngem’.” 16 Miyad yan ngalan e naun miyad pir’eg fare liyos ni bay u chob rok nike tayey’ ko fare gayul ni bunu’en e kaming. 17 Me ga’ar Saul ngak Mikal, “Mang ni kam ban nigeg kam pag e to’ogor rog ke mil?”

Me ga’ar, “I ga’ar ngog e fa’anra dab gu ayuweg nge mil, ma nge thang e pogofan rog.”

18 Me mil David ngak Samuel nga Ramah me weliy ngak urngin e pin’en ke rin’ Saul ngak. Miyow yan Samuel nga Nayoth ngar pirew u rom. 19 Minog ngak Saul ni bay David u Nayoth ko binaw nu Ramah, 20 me l’oeg boch e pumo’on ngranod ni ngar koled David ngar feked i yan ngak. Miyad guy ba ulung i profet ni yad be weliy e yi’iy, ni Samuel e bay nga m’on rorad. Ma aram me yib i ying gelngin Got ngak fapi pumo’on nike l’ograd Saul, ma ku er rogon yad nra tababgad i weliy e yi’iy. 21 Ma fa’ani rung’ag Saul salaprad me ki l’oeg boch e mol’og ngranod, ma ku aram rogon ra tawgad miyad tabab i weliy e yi’iy. Me l’oeg boch e pi mol’og ngranod ni aram e bin dalip e ulung, ma fa’an ranod ma ku aram e n’en nranod rrin’ed. 22 Me mang ir e yan nga Ramah. Ma fa’ani taw ko fare luwed ni ba ga’ ni bay u Seku, me fith e gin bay Samuel nge David riy, minog ngak ni yow bay u Nayoth. 23 Ma nap’an ni be sor i yan ngaram miki yib i ying fare gelngin Got ngak, me yan nga Nayoth ni be weliy e yi’iy. 24 I luf wuru’ e mad u daken ngi i weliy e yi’iy u p’eowchen Samuel, me mol ndariy e mad u daken e rofen nem ni polo’, nge re nep’ i n’em ni polo’. (Aram e n’en ni rin’ mi i yog e girdi’ e re bugithin ni ba’aray, “Gur mus ngak Saul nike mang reb e profet?”)