1 Ba’aray e pi ulung nib mu’un e pi’in owchen Aron ngay. Aron e aningeg e pagel ni fak: Nadab, Abihu, Eleazar, nge Ithamar. 2 Nadab nge Abihu e rmow’ u m’on ndawori yim’ e chitmangrow, ma dariy e pi’in owcharow, ere fagali pumo’on ni walagrow i Eleazar nge Ithamar e ra mangew prist. 3 Me yarmiy David ni Pilung fa pi’in owchen Aron nge yu ulung nagrad ni nge paluw nga rogon e pi maruwel rorad. I pi’ Zadok nib mo’on ni owchen Eleazar nge Ahimelek nib mo’on ni owchen Ithamar e ayuw ngak. 4 Pi’in owchen Eleazar e ni yarmiyrad ni ragag nge nel’ ulung ma pi’in owchen Ithamar e ni yarmiyrad ni yad meruk ulung; nrin’ ni aray rogon ni bochan e ba yo’or e pi pumo’on ni lolgen e pi tabnaw ko pi’in owchen Eleazar. 5 Ma bochan ni bay e pi tolang u Tempel nge prist u fithik’ e pi’in owchen Eleazar nge Ithamar, min yarmiy ni nge fel’ rogon e maruwel ni rogon ni duwgil ko pow nni girengiy. 6 Fa pi’in owchen Eleazar nge Ithamar e u ra thilthilgad ko pow ni yibe girengiy ni nge duwgil ko mang e ngan rin’. Ma aram me yoloy i Shemayah nib mo’on ni fak Nethanel fithingrad nga but’, ni ir e tayol rok piyu Levi. Fare pilung nge pi tolang rok, nge Zadok ni prist, nge Ahimelek nib mo’on ni fak Abiathar, nge fa pi’in lolgen e tabnaw ko prist nge pi tabnaw rok e Levi, e go’ ra manged mich riy. 7-18 Ba’aray yarmen fa rliw’ nge aningeg i ulung ko tabnaw nni pi’ e maruwel nga pa’rad: 1) Jehoyarib; 2) Jedayah; 3) Harim; 4) Seorim; 5) Malkijah; 6) Mijamin; 7) Hakkoz; 8) Abijah; 9) Jeshua; 10) Shekaniah; 11) Eliashib; 12) Jakim; 13) Huppah; 14) Jeshebeab; 15) Bilgah; 16) Immer; 17) Hezir; 18) Happizzez; 19) Pethahiah; 20) Jehezkel; 21) Jakin; 22) Gamul; 23) Delayah; 24) Maaziah.

19 Pi pumo’on ney e ni duwgiliy e maruwel ni nge tay bagyad nge bagyad u Tempel ni bod rogon ni yog SOMOL ni Got nu Israel ngak Aron ni ir e ga’ rorad.

20 Irera’ boch lolgen e pi tabnaw ko Levi:

Jehdeyah, reb i owchen Amram u daken Shebuel;

21 Isshiah, reb i owchen Rehabiah;

22 Jahath, reb i owchen Izhar u daken Shelomith;

23 Jeriah, Amariah, Jehaziel, nge Jekameam, ni bogi pagel ni fak Hebron ni kan yarmiy fithingrad ni tabab ko en ni nganni’;

24 Shamir, reb i owchen Uzziel u daken Mikah;

25 Zekariah, reb i owchen Uzziel u daken Isshiah, nib mo’on ni walagen Mikah;

26 Mahli, Mushi, nge Jaaziah, boch i owchen Merari. 27 Jaaziah e dalip e pagel ni fak: Shoham, Zakkur, nge Ibri. 28-29 Mahli e l’agruw e pagel ni fak, Eleazar nge Kish. Eleazar e dariy e pagel ni fak, machane Kish e bay ta’reb e pagel ni fak ni Jerahmeel.

30 Mushi e dalip e pagel ni fak: Mahli, Eder, nge Jeremoth.

Irera’ e pi tabnaw ko Levi.

31 Ra reb e pi’in lolgen reb e tabnaw nge be’ ni pumo’on ni walagen nib bitir ngak e ngar girngiyew e pow ni nge duwgil e maruwel rorad, nri bod rogon ni i rin’ pibe’ rorad, nge fapi prist ni yad owchen Aron. I David ni Pilung, Zadok, Ahimelek, nge pi’in lolgen e pi tabnaw ko prist nge piyu Levi e yad e mich riy.