1 Crizi -kaa 'si 'wɩ 'ji 'nan, -e -kaa vɩlɛ -kaa kɔn fɛ -tʋ -le nɔanba -ji dɩ. -Yee "wɛan 'ka 'tɔ 'plɛblɛ, te 'ka 'fli 'tʋɩ -e min 'e 'ka drɛ "nyian -pei -le nɔan -a dɩ!

2 'Ka "trɔɛn "tɔ 'wɩ 'gʋɛ -yrɛ! 'An 'bɔ Pɔl, maan ve 'cɛɛ 'nan, -te kaa wɛɛ 'nan 'ka -fɔa "klɔnmɔn -va bɛ, 'wɩ nɛn Crizi -a drɛ bɛ, ka'a "nɛn 'ble "fo "dɩ. 3 Ɛn min oo min nɛn e -fɔ -klɔnmɔn -va bɛ, maan ve -a san lɛ 'nan, 'e 'ta wʋla -pei -tɔ wɩ -tʋdʋ pɛɛnɔn 'bɔ da. 4 Kaa nɛn kaa -wɛɛman 'nan, 'ta wʋladɩ Moizi -le -pei da man nɛn Bali 'e 'ka "sia min tɩglɩ 'a bɛ, 'ka 'fli "cɛan Crizi man, ɛn "nyian Bali -le "yi "nɛn, yaa -nɔn 'cɛɛ bɛ, ka cɛɛn "man.

5 'Pian 'kʋe vɛ bɛ, 'kʋ 'bli a da 'nan, 'kʋe yi -tɛradɩ Zozi da -le "wɛan, Bali 'kʋ "siala min tɩglɩ 'a. Bali lei 'saun 'bɛ 'maan 'wɩ zɩɛ -a -cin a 'kʋ 'ji. 6 -Te min 'lee Zozi Crizi drɛ min -tʋwli "a bɛ, -te -a san -fɔ -klɔnmɔn -va oo, e ya 'e "tun. Ɛn -te ya'a 'fɔlɛ -klɔnmɔn -va dɩ oo, e ya 'e "tun. 'Pian 'wɩ nɛn Bali cɩ "va "bɛ, -nyrɛn 'nan, min 'e yi -tɛra Zozi da, ɛn 'e -ci -kɔɔn min yɩdɩ "yi "a!

7 'E tɛdɛ bɛ, kaa pou 'sia "yi! -Tɩɛ drɛ, ɛn ka 'ka "vale 'ka 'ta wʋla "nyian 'wɩ tɩglɩ zɩɛ -a da dɩ? 8 'Wɩ nɛn waa 'vɩ 'cɛɛ ɛn ka 'sia "da "bɛ, ya'a 'sia Bali nɛn e 'ka laabʋ bɛ -a va dɩ. 9 -A -cin 'e 'tɔ 'ka 'ji 'nan: «Sɩ 'wlɛ -tʋwli min 'shɛ pɛɛnɔn "tranman!» 10 'Pian 'mɛn vɛ bɛ, an yi -tɛala Minsan Zozi Crizi da, -yee "wɛan 'an 'bli a "da 'nan, 'wɩ nɛn maan 'vɩ bɛ, -a -sru "nɛn ka -taa -sɔɔnlɛa. Ɛn maan -tɔa 'nan, min nɛn e -ta 'ka 'ci lilɛa bɛ, Bali 'wɩ "nɛn -kɔɔnman -a san lɛ.

11 'An "bʋɩ Zozinɔn, minnun -a 'vɩ 'nan, an -fɔdɩ -klɔnmɔn -va 'wɩ ve tian minnun lɛ. "Te 'wɩ 'kpa nɛn bɛ, -mɛ "le "wɛan nɛn Zuif 'nɔn 'tɛ "paa 'an da "mɛn? 'Pian e 'ka 'wɩ 'kpa -a dɩ. Crizi -le -ka nɛn yaa 'wʋ yiba "plan da bɛ, -a 'wɩ nɛn maan ve minnun lɛ, ɛn 'wɩ zɩɛ e "naan o man. 12 Minnun nɛn o -tɔa 'ka man 'nan, 'ka 'fɔ -klɔnmɔn -va bɛ, 'o 'kʋ 'o 'fli 'sa! 'Bɛ "yi mlin.

13 'An "bʋɩ Zozinɔn, Bali 'ka laabʋ 'nan, -e 'ka vɩlɛ 'ka 'kɔn fɛ -tʋ -lɔ nɔan -a dɩ. Te 'ka 'pa 'wɩ zɩɛ -a da, -e 'ka blamin ci 'sɔ wɩ -wlidɩ "drɛ dɩ! 'Pian 'ka cin yɩdɩ "yi "a nɛn, 'ka cin man wɩ drɛ! 14 -Yɛɛ cɩ Bali -le -pei -tɔ wɩnun pɛɛnɔn 'lɛ sɔɔdɩ -a. Kɔɔ e ya 'e 'crɛn -tɛdɩ 'nan:

16 -Yee "wɛan maan laabo 'ka 'lɔ 'nan: 'Ka 'ta wʋla Bali -sru -yee lei 'saun 'le 'plɛblɛ 'a! -Te kaa drɛ zɩɛ, ka -kɔlaman blamin ci 'sɔ wɩ -wlidɩ 'klɩdɩ -a. 17 Kɔɔ blamin ci 'sɔ wɩ -wlidɩ "bɛ, Bali lei 'ka -a ye "yi "dɩ. Ɛn fɛ nɛn Bali lei -a ye "yi "bɛ, blamin 'ka ye "yi "dɩ. -Yɛɛ cɩ 'nan, Bali lei ci 'sɔ wɩ 'lee blamin ci 'sɔ wɩ -wlidɩ "bɛ, o yei 'ka -a ble dɩ. -Yee "wɛan ka'a 'kɔlaman -e 'ka 'wɩ nɛn ka cɩ "va "bɛ -a drɛ dɩ. 18 'Pian -te Bali lei 'saun 'bɛ -si -kɔɔnman 'cɛɛ bɛ, te -pei -le 'plɛblɛ 'ka "nyian 'ka da dɩ.

19 Blamin ci 'sɔ wɩ -wlidɩ "bɛ, -kaa -tɔa 'e pɛɛnɔn. Nyinnandɩ lɩ 'lee 'kɔnnɛn -a te wa'a o cin 'palɛ dɩɛ, e ya -tʋ. Ɛn 'wɩ nɛn e min "tri -tɔa Bali 'lɛ bɛ, -a drɛdɩ a -tʋ. Ɛn -kɔnnɛn -wɛɛdɩ "kaga 'lee lɩ -wɛɛdɩ "kaga "bɛ e ya -tʋ. 20 Ɛn yiba "minnun -pandɩ a -tʋ, ɛn 'bui 'fɔdɩ a -tʋ, ɛn 'nandɩ min man a -tʋ, ɛn 'wɩ 'blɩdɩ a -tʋ, ɛn man bʋdɩ a -tʋ, ɛn 'bli 'fɔdɩ min ji a -tʋ, ɛn bɔɛ "blɩdɩ a -tʋ, ɛn 'cɛndɩ 'e cin man, te min yei 'ka -a ble dɩɛ, e ya -tʋ. 21 Ɛn 'nandɩ min man min lɔ fɛ -le "wɛan bɛ, e ya -tʋ, ɛn min -le 'fli -nɔndɩ -wɛn mlindɩ lɛ 'lee "fɛdinun lɛ a -tʋ, ɛn 'wɩ 'wlidɩ "pee drɛdɩ a -tʋ. 'Wɩ pɛɛnɔn zɩɛ -a drɛdɩ 'ka "yi "fo "dɩ. Maan 'vɩ 'cɛɛ 'e 'cɛn 'va, ɛn an 'wɩ "paala "nyian 'cɛɛ 'nan, min oo min nɛn e 'wɩnun zɩɛ -a -tʋ dra bɛ, ya'a 'ko Bali -le mingɔnnɛn trɛda dɩ.

22 'Pian -te Bali lei 'saun 'bɛ min "paala bɛ, zɩ -a "nɛn bɔala 'gʋ: -A san min ye "yi, ɛn -a san ci "nranman, ɛn -a san man yra flɩɩ, ɛn -a san 'e 'man -sɛanla 'wɩ 'ji, ɛn -a san a min 'kpa 'a, ɛn -a san ci a "yi, ɛn min yi -tɛala -a san da. 23 -A san a "min -trɔɔ -a, ɛn -a san -kɔlaman 'e 'fli 'pladɩ -a. 'Wɩ pɛɛnɔn zɩɛ, -a -tʋwli 'ka -pei -tʋ srɛ wɩ -a dɩ. 24 Minnun nɛn o drɛ Zozi Crizi -le vɛ -a bɛ, o 'bɔ 'ci 'sɔ wɩnun -wlidɩ "bɛ, wɛɛ wo 'trɛ 'ji. E ya "le -a -pɛindɩ -zʋ yiba "plan da.

25 Bali lei 'saun 'bɛ 'belidɩ -nɔn -cɛɛ, -yee "wɛan -a 'bɔ nɛn 'e -kaa 'pla! 26 Te -kaa 'fli -kɔɔn "dɩ! Ɛn te -kaa bɔɛzan -tʋ 'le -wɛɛla dɩ! Ɛn te -kaa man bʋ -kaa bɔɛzan -tʋ -va dɩ!